يا تحطّيه على رأسك.. يا تشيليه من رأسك

السلام عليكم
أنا بجد تعبانة جداً، ونفسي في رد يقنعني.. أنا عندي 21 سنة، وتعليمي عالي، وبحب شخص أكبر مني بسنتين؛ بس تعليمه فوق المتوسط.
جه واتقدم لي؛ بس أهلي ما وافقوش، وأمى ما وافقتش إنه ييجي البيت لأني حكيت لها وقالت لي لا ما يجيش خالص، ولو جه أنا مش هاقعد مع حد، كل ده علشان شغال نجار.
بس هو شغال الشغلانة دي علشان -من وجهة نظره- بتجيب له فلوس كتير يكوّن بيها نفسه، وبعد كده هيشتغل في شغل ثابت؛ بس ماما مش موافقة بكده وباصة للمظاهر.. لحد ما قال لي إننا نسيب بعض، وأنا اللي بقيت أتحايل عليه إنه ما يسيبنيش لأني بجد بحبه أوي.
ومع مرور الأيام رجعنا تاني لبعض؛ بس معاملته معايا مختلفة خالص، لحد ما حسيت إنه عادي بالنسبة لي، وهو اللي وصّلني لكده.. بقينا بنزعل، ما بقاش يهمّني ولا حتى هو.. حسيت إنه بيكرّهني فيه.. رجعت معاه زي الأول علشان يرجع يحبني لأني حسيت إن حبه ليّ قلّ.
بقى كل مدى يبعد عني وطريقته وحشة معايا أوي، وأكتر من كام شهر ما سمعتش منه كلمة وحشتيني أو حتى بحبك، وأنا مش هامنني كل ده قد ما هامنني إزاي أقنعه إنه يغيّر الشغلانة من غير ما أجرح كرامته؛ لأن كده كده كرامته اتجرحت أوي.
ولا أبعد عنه؟ بس والله ما هاقدر لأن بجد مش هادّي لأي شخص حب قد ما إديته، ونفسي أقنع أهلي بيه، مش عارفة بجد أعمل إيه.. أنا واثقة في ردكم وإني هاقتنع به.
swiz

لو عايز تفضفض لنا دوس هنا