انسفي حمامك القديم.. بسيراميك مودرن وشيك

لأن "قمر 14" دايماً معاكِ في كل المناسبات والاحتفالات، وبتحاول تلبّي لكِ كل الطلبات...
ولأنك دايماً بتسألي عن الموضة والديكورات، جبنا لكِ النهارده كل حاجة عن موضة سيراميك المطابخ والحمامات...
ونزلنا معرض ICS "المعرض الدولي للسيراميك والأدوات الصحية" لتجهيزات المطابخ والحمامات علشان نجيب لكِ كل المعلومات...
وكان لينا مع العارضين لقاءات....
وعرفنا فيها حاجات ومحتاجات...
إيه الجديد اللي بيقدّمه المعرض؟
المعرض بيقدّم تصميمات لا تعدّ ولا تُحصى علشان تناسب جميع الأذواق واللي بتمشي مع موضة السنة الجديدة واللي هي "البيلت إن" اللي بتكون متقفلة بوحدات خشب أو سيراميك.. وهنلاقي إن وحدات الإضاءة بقت مودرن أكثر وكمان المرايات، وهنلاحظ إن النجف بقى ليه مكان جوه الحمام وما بقاش مكانه الغرف وبس.
وبالنسبة لأكثر حاجة هنلاقيها منتشرة السنة دي هو الدش المغلق والمنفصل، واللي بيكون فيه منه أشكال كثيرة أوي بيختلف سعره باختلاف إمكانياته الداخلية.
بانيوهات
* صحة وجمال
اضغط على الصورة لمشاهدة الجاليري:
إيه هي موضة سيراميك حمامات 2010؟
موضة السيراميك السنة دي زي ما بيقولوا على كل شكل ولون، فهنلاقي سيراميك بملمس وشكل الخشب، لدرجة إن العميل أوقات كتير بيتلخبط ما بينه وبين الخشب، بس طبعاً السيراميك بيكون أكثر عملية، وكمان فيه سيراميك له ملمس وشكل القطيفة وسيراميك مطعّم بمية الذهب، ومن أكثر الأشكال اللي نازلة بقوة السنة دي هو السيراميك اللي شبه الطوب أو الأحجار.
إيه آخر تقليعة نازلة للسيراميك في 2010؟
من أكثر التقاليع اللي لفتت النظر وكمان نازلة بقوة السنة دي هي براويز السيراميك، واللي بتكون عبارة عن لوحة كاملة بتتعلّق على الحيطة وبتكون من السيراميك وفيه منها أشكال كثيرة أوي.
هو لسة الاستيللو "الوَزَرة" موضة؟
الاستيللو (الوزرة) اللي بتقسّم حائط السيراميك مش موضة أوي زي السنين اللي فاتت، بس فيه ناس بتطلبه، يعني هو موجود بس على حسب الطلب، وهنلاقي إن فيه منه جديد بقى بمية الذهب وأسعاره رخيصة جداً، فهنلاقي القطعة ب3 و4 جنيه.
موضة سيراميك 2010
* صحة وجمال
اضغط على الصورة لمشاهدة الجاليري:
طيب بالنسبة للأرضيات الشطرنج هي لسه موضة ولّا لأ؟!
الأرضيات الشطرنج خلاص اختفت، وما بقتش موجودة خالص دلوقتي، الناس دلوقتي بقت بتفضّل الأرضيات الهادية، واللي داخل فيها الرخام وما فيهاش شغل كثير.
لسه السيراميك موضة في الغرف؟!
بالنسبة لموضة سيراميك غرفة المعيشة وغرف النوم فهي مستمرة بس برضه بقت بتعتمد على السيراميك الهادي اللي ما فيهوش شغل كثير، وكلها مقاسات صغيرة يعني 30×30؛ لأنها بتدي منظر هادئ يعني على عكس الحمامات.
زمان كانت كل أرضية غرفة في الشقة بلون، يا ترى دي لسه موضة؟
موضة كل حجرة بلون دي برضه اختفت، وبقى توحيد لون سيراميك الشقة هي الموضة لعام 2010.
طيب بالنسبة لموضة ألوان سيراميك 2010؟!
هنلاقي إن الألوان اتغيّرت تماماً عن زمان، وبقت كلها جريئة وجديدة وفيها تداخل للألوان، يعني هنلاقي إن فيه سيراميك للحمام بيمزج ما بين اللون البيج في الروز والموف في الأصفر والأزرق مع الرمادي والأحمر في النبيتي.
إيه المختلف عن موضة السنة اللي فاتت بالنسبة لسيراميك الحمامات والمطابخ؟
اللي اختلف عن السنة اللي فاتت هو إن السيراميك بقى كبير ومقاساته أعرض والألوان دلوقتي بقى في منها مط وروستيك "لامع شوية"، وفيه كمان سيراميك مقاوم للرطوبة.
وإيه الجديد في أشكال الأحواض السنة دي؟!
من أكثر الحاجات الجديدة واللي عليها أقبال كبير هي الأحواض المنفصلة البيضاوية أو المربعة، وهنلاقي كمان الأحواض الزجاجية المقاومة للكسر واللي فيه منها أشكال مبتكرة وجديدة، وكلها "بيلت إن" داخل الحمام.
أحواض
* صحة وجمال
اضغط على الصورة لمشاهدة الجاليري:
إيه المختلف في موضة الخلاطات السنة دي عن السنة اللي فاتت؟
اللي اختلف عن السنة اللي فاتت إن حجم الخلاطات ابتدى يصغر أوي.. وتصميمات السنة اللي فاتت كانت بتعتمد على الفخامة، لكن السنة دي بقت الموضة بتعتمد على البساطة.
طب والخلاطات اللي مطلية بالذهب برضه لسه موضة؟
لأ دي كانت موضة قديمة وخلاص راحت عليها، لكن دلوقتي كل الموضة تركزت على السيلفر البسيط واللي ما فيهوش شغل كثير، وهنلاقي إن الخلاطات اللي بتشتغل بالليزر برضه نزلت بقوة، بس ليها استعمالاتها المحدودة يعني مش كل الناس بتستخدمها.
وبالنسبة لأسعار الخلاطات؟
الأسعار في متناول الجميع فهنلاقي إن فيه حاجات بتبدأ من 500 جنيه وفيه ب350 جنيهاً، وهنلاقي إن فيه منتجات بتخاطب الفئة فوق المتوسطة فهنلاقي أطقم ب1250 جنيهاً.
خلاطات
* صحة وجمال
اضغط على الصورة لمشاهدة الجاليري:
وبالنسبة لموضة المطابخ سألناهم إيه الجديد في مطابخ 2010؟
السنة اللي فاتت فيه حاجة ظهرت اسمها "هاي جلوس" اللي هو المطبخ اللي سطحه لامع وبيكون زي المرايا، لكن دلوقتي نزل اللي أعلى منه وملمسه بقى زي الزجاج.
هل فيه أي إضافات جديدة لوحدات المطابخ؟
الجديد في وحدات المطابخ إن التكنولوجيا دخلت فيها وتم دمجها بخاصية اللمس اللي ما بقتش في التليفونات ولا المنتجات الكهربائية بس، لأ دي بقت كمان في المطبخ نفسه فهنلاقي إنه بلمسة واحدة ممكن تفتحي درج المطبخ.
وإيه الجديد بالنسبة للدرف؟
الدرف ما بقتش "بتترزع" مهما قفلتيها بقوة، وكمان هنلاقي إن الأدراج لها تكنيك معين عند فتحها وإغلاقها وبتفتح بالكامل، ولو تفتكري زمان كانت الأدراج لما بتتفتح بتسيب حوالي 10 سم في الآخر من غير استخدام وما بنقدرش نوصل لهم، لكن مع التكنولوجيا الجديدة هنعرف نفتحهم على الآخر ونستغلهم صح.
وكمان الدرف الحصيرة بقت موضة جداً وبتتفتح وتتقفل بكل سهولة، وده غير كمان المرايات اللي دخلت المطبخ وبقى يتفرد لها مساحات كبيرة وبقت من أبرز موضات 2010 ولها أشكال كثيرة وجميلة؛ وده لأن المرايات بتدي وسع للمطبخ، وبتزيد من جماله وشياكته.
هل موضة 2010 هتتناسب مع مساحات المطبخ الضيقة؟
أكيد؛ وده لأننا هنلاقي إن المطبخ كله بقى "بيلت إن" وكله بقى متقفل بالخشب سواء الثلاجة أو أي جهاز داخل المطبخ غير طبعاً الأحواض، وده غير توفير الراحة والعملية داخل المطبخ، فهنلاقي إن الموضة السنة دي بتعتمد على استغلال كل مساحة صغيرة في المطبخ أحسن استغلال وتحاول توفر الراحة والعملية لست البيت.
إيه هي موضة ألوان المطابخ ل2010؟
الألوان اللي نازلة جديد وواخدة انتشار ومساحة في السنة الجديدة هي الألوان الجريئة زي الأسود والبرتقالي والأحمر والأزرق وكمان بالنسبة للخامات فالخشب والألومنيوم منتشرين أوي في 2010.
طيب وبالنسبة للأسعار؟!
الأسعار مختلفة وفي متناول الجميع يعني الشباب اللي لسه بيجهزوا نفسهم هيلاقوا حاجات مناسبة لهم.
مطابخ
* صحة وجمال
اضغط على الصورة لمشاهدة الجاليري:
وبكده يكون خلص الكلام وخلص موضوعنا كمان..
ويا رب يكون عجبكم واستفدتم منه وفي انتظار رأيكم واستفساراتكم...
وإلى اللقاء،،،،