إزاي تختاري ديكور مطبخك بنفسك؟!

أكيد أي بنت نفسها إن منزلها يكون عبارة عن لوحة فنية، علشان كده إحنا النهارده معاكِ؛ علشان نساعدك على تحقيق هدفك ده بنفسك من غير ما تحتاجي لمهندس ديكور...

وهنبدأ كلامنا النهارده، ونقول لك إزاي ممكن إنك تختاري ديكور مطبخك بنفسك بشكل صح الصح؟!

قبل ما تختاري تصميم مطبخك فكري!!

في حاجة مهمة أوي لازم تاخدي بالك منها قبل ما تختاري تصميم مطبخك، وهي إنك لازم تبصي لمساحة المطبخ اللي عندك كويس وعلى الأساس ده تبدئي في تحديد هذه الأشياء...

* تحديد عدد الأجهزة الكهربائية التي يحتاج إليها المطبخ؛ زي مثلاً "الثلاجة والبوتجاز والفرن وغسالة الأطباق"، وده علشان لما تيجي تصممي وحدات المطبخ تصمميها على أساس مضبوط مناسب لهذه الأجهزة.

* تحديد حجم الأجهزة الكهربائية، بحيث يكون في تناسق بين مساحة المطبخ وحجم الأجهزة الكهربائية الموجودة فيه.. (يعني مش معقول تجيبي بوتجاز حجمه كبير في مطبخ مساحته صغيرة).

* تحديد المكان المناسب لوضع الأجهزة الكهربائية، والتأكد من إن أبواب الأجهزة الموجودة في المطبخ بتفتح بشكل جيد جداً من غير أي عوائق.

* تحديد مكان حوض الغسيل، ويُفضّل دائماً إنه يكون موجود أسفل شباك المطبخ أو على حسب مكان وجود الصرف في المطبخ.

* تحديد أماكن وجود التوصيلات الكهربائية، والتأكد من مناسبتها لأجهزة المطبخ الموجودة حالياً أو المحتمل وجودها في المستقبل.

إزاي تختاري وحدات المطبخ؟!

في أكتر من خامة ممكن إنك تستخدميها في تصميم وحدات المطبخ، فهناك الخشب أو الألومونيوم أو الاستانلس، كمان ممكن إنك تستخدمي أكتر من خامة مع بعض؛ زي مثلاً الخشب مع الزجاج، أو الألومونيوم مع الخشب، أو الاستانلس مع الخشب، وطبعاً الاختيار في النهاية بيرجع ليكِ أنتِ ولذوقك وإمكانياتك.. بس لازم تاخدي بالك من شوية الحاجات البسيطة دي...

1- إنك تراعي المساحة العامة للمطبخ؛ بحيث يكون فيها تناسق بين مساحة المطبخ وحجم الوحدات الموجودة في المطبخ... يعني مش معقول تختاري وحدات كبيرة الحجم أو كتيرة في مطبخ مساحته صغيرة.

2- إنك تسيبي مساحة فاضية تسمح لك بالحركة بشكل كافٍ داخل المطبخ.

3- لاش موضوع إنك تصممي أدراج في الوحدات الموجودة أعلى البوتاجاز أو على جنبي البوتاجاز؛ لأنها مش عملية بالمرة ومن الصعب إنك تستغليها بسهولة.

4- راعي وجود وحدات بين الثلاجة والبوتجاز، وبلاش تحطي الثلاجة جنب البوتاجاز؛ لأنها بتدي شكل غير جمالي للمطبخ.

5- حطي في دماغك عند اختيار وحدات المطبخ الغرض اللي أنتِ هتستخدميه فيها؛ وده علشان تقدري إنك تستخدميها بالشكل الصح اللي يتوافق مع احتياجاتك.

6- إذا كانت مساحة مطبخك كبيرة، فممكن إنك تعملي ترابيزة متوسطة الحجم ومعاها أربعة كراسي؛ ودي ممكن تستخدميها في تحضير الطعام أو لتناول بعض الوجبات السريعة، أما إذا كانت مساحته صغيرة فممكن إنك تصممي ترابيزة صغيرة جانبية قابلة للطي في حالة عدم الحاجة إليها.

7- حاولي في اختيارك لوحدات المطبخ إنك تبعدي نهائياً عن اختيار الوحدات اللي فيها نقوش كثيرة أو انحناءات كثيرة؛ لأنها صعبة جداً في التنظيف، وأنتِ عارفة إن المطبخ تحديداً بيحتاج بصفة دائمة للتنظيف.

8- حددي المسافة اللي أنتِ عايزة تسيبيها بين الوحدات العلوية والوحدات السفلية لمطبخك، وخدي بالك إن المسافة دي دائما ما يترواح طولها ما بين 50 - 70 سم.

للمطبخ أربعة تصميمات

يوجد أربعة تصميمات أساسية للمطبخ وهي...

التصميم الأول
وفيه بيصمم المطبخ على شكل خط مستقيم، والشكل ده مناسب جداً للمطابخ ذات الأحجام الصغيرة جداً، حيث بيتم وضع وحدات المطبخ كلها على حيطة واحدة فقط داخل المطبخ.

التصميم الثاني
وفيه بيصمم المطبخ على شكل خطين متقابلين، والتصميم ده مناسب لو كانت مساحة المطبخ واخدة شكل مستطيل عرضه مترين وأربعين سنتيمتر، حيث بيتم توزيع وحدات المطبخ على حائطين متقابلين.

التصميم الثالث
وفيه بيصمم المطبخ على شكل حرف ال"L"، وهتلاقي إن الشكل ده مناسب جداً، خاصة لو كانت مساحة المطبخ واخدة شكل مربع أو مستطيل، حيث بيتم توزيع الوحدات على جدارين متصلين، وفي الشكل ده ممكن إنك تصممي ترابيزة طعام في منتصف المطبخ.

التصميم الرابع
وفيه بيصمم على شكل حرف ال""U ويتم فيه توزيع الوحدات على ثلاثة جدران، شرط ألا تقل المسافة بين الحائطين المتقابلين عن 150 سنتيمترا ولا تزيد على ثلاثة أمتار، وفي التصميم ده ممكن إنك تصممي ترابيزة طعام في منتصف المطبخ.

للمطابخ ألوان متعددة... لكن!!

للمطابخ ألوان متعددة زي الأبيض والزيتي واللبني والروز... بس طبعاً بنصحك إنك تختاري الألوان العملية زي البني الغامق بدرجاته المختلفة؛ وده لأن الألوان دي تحديداً هي أكتر ألوان بتستحمل البخار أو الدخان، لكن لو كانت مساحة مطبخك صغيرة جداً فيُفضّل إنك تختاري درجات فاتحة من البني الفاتح علشان تديكِ إحساس بالاتساع.

تصميم حوض الغسيل بشروط

لو كانت مساحة مطبخك كبيرة، يبقى تقدري إنك تختاري حوض ذا حلتين استانلس، وده طبعاً على عكس لو كانت مساحة مطبخك صغيرة، حيث يُفضّل اختيار حوض بحلة واحدة... واوعي تنسي إنك تقفلي المنطقة الموجودة أسفل الحوض؛ وده علشان تستفيدي من المنطقة دي في حفظ الصابون أو أدوات النظافة الخاصة بالمطبخ، بالإضافة إنك ممكن تستغلي حيطة الحوض؛ لوضع مطبقية لتصفية مياه الأكواب والأطباق والملاعق عليها بعد غسلها.

التهوية داخل المطبخ

هناك نوعان من أنواع التهوية اللي لازم تراعي وجودها داخل مطبخك...

النوع الأول:
بيكون تهوية طبيعة مصدرها شباك المطبخ.

النوع الثاني:
وهي تهوية صناعية؛ وتنقسم إلى:
"شفاط البوتجاز": تهوية فوق البوتجاز مباشرة؛ ودي هدفها شفط البخار والدخان المتصاعد من البوتجاز.
"شفاط المطبخ": وهي تهوية شاملة للمطبخ كله.


توزيع الإضاءة داخل المطبخ

علشان تقدري تحصلي على مطبخ مضيء، بشكل جيد لازم تكوني عارفة إن المطبخ بيحتاج إلى أربعة أشكال من الإضاءة داخل المطبخ، بالإضافة طبعاً إلى الضوء الطبيعي الداخل من الشباك والأشكال دي هي..

الشكل الأول
ودي هتكون بتحتل الجزء الأكبر من المطبخ، وهيكون مكانها في السقف، وبتكون عبارة عن لمبة أو اثنين أو ثلاثة فلورسنت، وبيتم تحديد عدد اللمبات على حسب مساحة المطبخ، يعني كل ما زادت مساحة المطبخ هاتزيد عدد اللمبات؛ وده علشان تحصلي على قوة أكبر من الضوء.

الشكل الثاني
ودي هتكون إضاءة إضافية في الأماكن اللي بتحتاج إلى إضاءة زيادة زي مثلاً منطقة الفرن أو منطقة الحوض.

الشكل الثالث
والهدف منها هو إعطاء شكل جمالي للمطبخ، وعادة بتكون الإضاءة دي مركبة داخل وحدات المطبخ نفسه.

الشكل الرابع
وفيه بيتم وضع إضاءة متدلية من السقف، ودي مناسبة جداً للمطابخ ذات المساحات الكبيرة؛ لأنه بيتم وضعها أعلى الترابيزة الموجودة في وسط المطبخ.

اختاري إكسسوارات مطبخك بعناية

في بعض الإكسسوارات البسيطة اللي ممكن إنك تضيفها على مطبخك؛ علشان تضيفي لمسة جمالية؛ ومن الديكورات دي...

زجاج المطبخ... بعد ما تختاري نوع الوحدات اللي هتصممي مطبخك بيها ممكن إنك تضيفي إلى الوحدات دي بعضاً من ألواح الزجاج اللي ممكن تكون على شكل أرفف، وأنسب مكان لها هو الوحدات العلوية للمطبخ، وعادة ما بيتم استغلالها في حفظ الأشياء الصغيرة الحجم زي الأكواب أو الكاسات.. كمان ممكن إنك تستخدمي الزجاج في عمل أبواب لهذه الوحدات وبرضه هتلاقي إن أنسب مكان لها هو الوحدات العلوية...
وهناك الكثير من أنواع الزجاج فهناك الزجاج الشفاف، وهناك الزجاج المبروم، وهناك الزجاج المثلج، وهناك الزجاج الملوّن... والاختيار في النهاية بيرجع ليكِ ولذوقك الشخصي.

الرخام أو الجرانيت... من الحاجات اللي ممكن تضيفيها لمطبخك لإعطاء شكل فخم، وبيتم وضع الرخام أو الجرانيت على الوحدات السفلية، واختيار لون الرخام أو الجرانيت بيكون على حسب لون وحدات المطبخ أو لون السيراميك الموجود في المطبخ.

ستارة المطبخ... يا ريت إنك تختاريها من القماش؛ وده لأنها بتكون سهلة التنظيف، بالإضافة إلى أنها لها أشكال كتيرة ومتنوعة.

كمان ممكن إنك تضيفي بعضاً من الإكسسوارات الصغيرة الموجودة في الأسواق، واللي بتاخد شكل طباخ بيوضع على أحد جوانب المطبخ، أو التي تاخد شكل حبل يوجد به بعض من أنواع الخضراوات أو الفواكه البلاستيك؛ لإضافة لمسة من الجمال على مطبخك.


ودلوقتي هنقدّم لكِ جاليري يحتوي على تشكيلة متنوّعة من المطابخ المودرن والكلاسيك، ممكن إنك تستعيني بيها في اختيار تصميم مطبخك بالشكل اللي يناسبك...

تشكيلة متنوّعة من المطابخ المودرن والكلاسيك
* صحة وجمال
اضغط على الصورة لمشاهدة الجاليري:


ولغاية هنا.. خلص كلامنا وفي انتظار أسئلتكم واستفساراتكم وإلى اللقاء