هذا الشتاء.. إكسسواراتك على مزاجك!!

لو كنتِ بتدوري على أحدث موضة لإكسسوارات الشتاء وتعبتِ من اللف... ولو مش عارفة إيه هي أحدث ألوان الإكسسوارات في شتاء 2010... ولو كنتِ بتصرفي كثير على إكسسواراتك وعايزة توفري ومش عارفة!!!
دلوقتي مع قمر 14 هتلاقي وتعرفي كل اللي إنتِ عايزاه من غير لف ولا دوران، وهتقدري كمان توفري فلوس كثيرة أوي كنتِ بتصرفيها؛ لأننا جبنا لك النهارده محلات الإكسسوارات لغاية عندك...
وده عن طريق الجولة اللي عملتها لكِ قمر 14 في شوارع حي "الحسين"؛ باعتباره من أشهر الأماكن لبيع الأحجار بجميع أشكالها... وهناك قابلنا أصحاب أكبر محلات الإكسسوارات والأحجار الكريمة؛ علشان نجاوب لكِ على كل الأسئلة اللي بتدور في دماغك..
في البداية كان لنا لقاء مع "هشام محمد خليل" مصمم إكسسوارات و"لضام" وسألناه...

يعني إيه "لضام"؟!
اللضام: دي كلمة اتاخدت من "اللضم"؛ وهي عبارة عن توصيل الفصوص أو الحجارة مع بعضها عن طريق خيط في شكل عقد أو حلق أو أسورة؛ بحيث إن شكلها يكون جميلاً في الآخر، وممكن يكون الخيط ده نايلون أو معدن رفيع أو فضة أو حتى ذهب.

إيه هي نوعية الأحجار المستخدَمة في الإكسسوارات؟!
كل اللي بيستخدم دلوقتي في صناعة الإكسسوارات أحجار نصف كريمة وهي أحجار طبيعية ومش غالية زي ما معظم البنات والستات متخيّلة، ومنطقة "الصالحية" في الحسين هي مقر الأحجار الكريمة وكل اللي بيحتاج أحجار كريمة بييجي يشتريها من هنا، وإحنا كمان بنستورد معظم الأحجار الكريمة من الخارج.

ممكن تقول لنا الأحجار الكريمة دي بتتكوّن من إيه؟
الأحجار الكريمة تتكوّن في باطن الأرض على أعماق مختلفة، وقد تتحد مع عناصر أخرى أو تكون عبارة عن أكاسيد بعض المواد الموجودة في الطبيعة؛ فمثلاً حجر زي "المالاكايد" بيكون عبارة عن أكاسيد النحاس اللي بتتفاعل مع بعضها وبتدينا لون الحجر الأخضر، أما حجر "الروبي" فبيتكوّن من أكاسيد الرصاص، و"الألماس" بيتكون من أكاسيد الكربون، أو تكون في صورة حرة؛ مثل الألماس الذي يوجد في بعض الأحيان على عمق 160 متراً تقريباً.. والبعض الآخر يُستخرج من قاع البحر؛ مثل المرجان واللؤلؤ.

إزاي البنت تفرّق بين الأحجار الطبيعية والمغشوشة؟

للأسف مش أي حد يقدر يفرق ما بين الأحجار الطبيعية والمغشوشة؛ لأن ده بيكتسب بالخبرة والعمل في مجال الأحجار، يعني على سبيل المثال الزجاج بيعرفه الخبير فوراً ويعرف يفرق ما بينه وبين الأحجار الكريمة، عن طريق إنه يحط قطعة الزجاج في النور ويبص فيها هيلاقي نقط هواء وفراغ، أما الحجر الطبيعي مش بيكون فيه فراغات.
كمان ساعات الحجر بيكون فيه شروخ، فلو كانت الشروخ دي مطفية، يبقى حجر طبيعي، لكن لو كانت بتلمع يبقى الحجر مش طبيعي.
وفي حاجة تانية ممكن إننا نفرّق بيها بين الحجر الطبيعي والمغشوش لتتعرف بيها البنت على الحجر اللي هتشتريه وتكون مطمئنة، وهي كثافة الحجر وثقله؛ يعني لو واحدة شافت حجر وعجبها لازم تمسكه وتوزنه بإيدها وتشوفه كويس؛ لأن الحجر الطبيعي بيكون أثقل من المغشوش والبنت ممكن تحس من ثقله إذا كان طبيعياً أو لأ.

يعني لو أي بنت عجبها موديل إكسسوار معين ممكن تعمله لنفسها؟

بالتأكيد لو أي واحدة عندها موديل معين ونفسها فيه ولفت عليه كثير ومش لاقياه، ممكن إنها تيجي عندنا وإحنا هننفذ لها التصميم والموديل اللي هي عايزاه، وهنكون معاها خطوة بخطوة، وممكن لو هي عايزة حاجة خاصة بيها تميزها وتكون بتاعتها لوحدها، ممكن برضه إنها تيجي وتطلب تصميم خاص بيها يليق على لبسها أو على طقم معين عندها.

طيب لو فيه تصميم معقد شوية وداخل فيه خامات تانية غير الأحجار، إيه الحل؟
دي حاجة بسيطة جداً، وما فيهاش أي مشكلة خالص ولو في تصميم داخل معاه قطع ذهب أو فضة أو حتى خشب ما فيش أي مشكلة خالص؛ لأن الحسين هو أصل الذهب والفضة والنحاس والخشب، وعلشان كده مش بنواجه أي صعوبة في تنفيذ أي موديل.

طب إيه أخبار الأسعار؟
السعر ده أكيد مسألة نسبية، يعني بيختلف على حسب الشغل الموجود في قطعة الإكسسوار سواء أكانت خاتماً أو عقداً أو حتى كوليه، فكل ما هيزيد الشغل كل ما سعر القطعة هيزيد، وخصوصاً لو كان فيه كمان فضة أو ذهب، ولكن بشكل عام السعر أكيد هيكون أقل كثيراً من سعر الإكسسوار الجاهز، وكفاية إن البنت هتكون هي اللي أشرفت عليه وكانت موجودة وهو بيتنفذ خطوة خطوة.

وعملية "اللضم" وتنفيذ الإكسسوار.. بتاخد وقت أد إيه؟
بالنسبة للوقت فبرضه بيختلف باختلاف شكل قطعة الإكسسوار وكمية الشغل فيها، بس عامة لو كان في حجز قبلها وميعاد مسبق، فممكن يخلص الشغل والعميلة موجودة عندي، يعني مش هياخذ وقت طويل يعني على أكثر تقدير 3 ساعات.

إيه هي أكثر الأحجار انتشاراً في مصر؟
أكثر أنواع الأحجار انتشاراً في مصر؛ هو حجر "الجاد" ولونه بيكون أخضر بدرجاته؛ يعني هتلاقي منه الأخضر الفاتح لحد الغامق، وكمان في أحجار زي "المرجان" بدرجاته "الروز لغاية النبيتي" حجر "لابيس" بدرجاته "أزرق فاتح لغاية الكحلي" وحجر "الفيروز" و"الأماتيست" و"اللولي".

بنات كثيرة بتفضّل الإكسسوارات المصنوعة من اللولي.. بس المشكلة إنه غالي شوية؟
فعلاً "اللولي" من الأحجار المتربعة على عرش الإكسسوارات في مصر، بس أحب أطمئنك إن فيه أنواع منه في مصر مش غالية أوي؛ ففيه مثلاً أنواع منه بتكون مزروعة في مياه حلوة ودي بتيجي من شرق آسيا، وسعر فرع اللولي اللي طوله "40 سم" بيتراوح من 30 ل100 جنيه على حسب حجم الحباية ولونها.

ولغاية هنا وخلص حوارنا مع "هشام"... ثم انتقلنا لمحل "حسيب" وتحدّثنا مع صاحبه، وسألناه عن:

يا ترى إيه هي موضة ألوان إكسسوارات شتاء 2010؟

بالنسبة للألوان فهي بتتغير كل سنة، وهي غالباً بتيجي لنا من أوروبا وبنعرفها عن طريق الإنترنت، والصيف اللي فات كانت الإكسسوارات الأوكسيديه هي الموضة، أما بالنسبة لموضة ألوان شتاء 2010 فهنلاقي إن الألوان المتربعة على عرش الموضة الشتاء ده؛ هي البني والأزرق والموف والألوان الغامقة بشكل عام.

ممكن تدينا فكرة عن أسعار الإكسسوارات الموجودة عندك في المحل؟
أولاً: أحب أوضح لكم إن كل الإكسسوارات الموجودة دي من تصميمنا وتنفيذنا إحنا وعلشان كده الأسعار بتكون معقولة جداً، فمثلاً..
سعر عقد مصنوع من حجر "الجاد" يتراوح ما بين 20 ل50 جنيهاً.
أما سعر عقد اللولي فبيتراوح ما بين 10 ل5000 آلاف جنيه، وميزة اللولي إن جميع ألوانه مبهرة وجذابة؛ ففيه مثلاً لولي روز وأبيض وأصفر وأسود وبنفسجي وعلشان كده هو بيناسب جميع الأذواق.
والمرجان بيتراوح سعر الفرع فيه من 10 ل5000 آلاف جنيه، وفيه منه ألوان رائعة زي الروز والنبيتي والأحمر الناري.
أما الأحجار من نوعية "اللابيس" و"الأكوامارين الأزرق" و"الجارنت النبيتي" فده سعر الفرع فيهم بيتراوح ما بين 40 ل200 جنيه، والأعقاد الفضة فسعرها بيبدأ من 100 جنيه.

وبكده تكون خلصت جولتنا في "الحسين" ويا ريت يكون الموضوع عجبكم واستفدتم منه ويا ريت تبعتوا لنا آراءكم واقتراحاتكم...

ودلوقتي تعالوا نتفرّج على مجموعة متنوّعة من الأساور

مجموعة متنوّعة من الأساور
* صحة وجمال
اضغط على الصورة لمشاهدة الجاليري:

ودي مجموعة متنوّعة من الحلقان
مجموعة متنوّعة من الحلقان
* صحة وجمال
اضغط على الصورة لمشاهدة الجاليري:

ودي مجموعة متنوّعة من الكوليهات
مجموعة متنوّعة من الكوليهات
* صحة وجمال
اضغط على الصورة لمشاهدة الجاليري:

وإلى اللقاء في العدد القادم،،،