لا تستسلمي لليأس

السلام عليكم، أنا عندي مشكلة كبيرة ومش لاقية لها حل أنا الحمد لله من صغرى وأنا متفوقة في دراستي بس دخلت المدرسة الفنية المتقدمة نظام الخمس سنوات وجبت مجموع والحمد لله يدخلني كلية التجارة بس حصل شوية لخبطة في الورق اتسببت في أني أروح جامعة عين شمس وأنا أساسا من بلد في الصعيد أمي ماكانتش موافقة إني أسيبها وأروح القاهرة لوحدي بس أقنعناها بس كان فات الأوان، نزلت القاهرة على أواخر شهر 11 كان فايتني طبعا في الدراسة كتير بس جمعت اللي جمعته وذاكرت على قد ما قدرت مع مراعاة إني مش حابة الناس اللي قاعدة معاهم ولا البلد وحاسة إني غريبة بمعنى الكلمة.. المهم ضغطت على نفسي وكانت نفسيتي وحشة جدا وخصوصا إن أهلي بعيد عني ومش لاقية حد يقف جنبي ودخلت امتحانات التيرم وطلعت النتيجة إني جايبة مادتين ضعيف جدا ومادة ضعيف من أصل 6 مواد قلت الحمد لله وتتعوض وذاكرت التيرم التاني وأنا عارفة إني هاسقط بس عشان حتى لو سقطت يبقى على تلت أو أربع مواد أحسن من السنة كلها قامت طالعة لي مشكلة في السكن وكانت ساعاتها حالتي النفسية مستواها في الحضيض رحت واخدة قرار إني مش رايحة امتحانات التيرم ده ومعايا بنات من نفس البلد في الكلية راحوا امتحانات التيرم التاني، ولما ظهرت النتيجة كلهم سقطوا بس هما واخدين الحكاية عادي وعرفت إنهم هيعيدوا السنة ما عندهمش مشاكل.. أنا دلوقتي في حيرة أكمل في الكلية ولا أبطل وأقعد في البيت ويبقى معايا مؤهل فوق متوسط وخلاص، مع العلم إن بابا عايزني أكمل ومستعد يصرف عليّ من جنيه لألف وأهلي كلهم عايزيني أكمل بس مش راضين يضغطوا عليّ عشان لو حصل حاجة ما أجيش في الآخر وألوم عليهم ودلوقتي أنا عايزة أعرف ردكم؛ لأن الدراسة خلاص بعد العيد فلو كان بالإيجاب ألحق أشوف سكن وأرتب أموري أرجو الرد سريعا ولكم مني جزيل الشكر..
ب