العجلة مش نايمة

أكتر حاجة استفزتنى بعد الثورة هى عجلة الإنتاج اللى مبدورش، قالوا فى الأول لازم كلنا نشتغل جامد عشان العجلة، مع أن العجلة شغالة الحمد لله، وأنا هتكلم عن تجربة شخصية معايا.. أنا خريج كلية هندسة قسم كيمياء ونووى دفعة السنة دى، الحمد لله اشتغلت على طول بسبب الاجتهاد والبحث والعلم، بعد الثورة زاد الشغل جدا فى المصنع اللى أنا بشتغل فيه، لدرجة إن أنا مش عارف أخد أجازة والسبب ( قالك حاجة العمل لا تسمح) ولقيت فى الإعلام المسئولين بيقولوا أن عجلة الإنتاج واقفة، قلت يمكن إحنا بس اللى عندنا الشغل ماشى، لكن لقيت أن أصحابى كلهم شغلهم ماشى برضوا، غير كده تبص على الطريق الدائرى تلاقى عربيات النقل والمقطورات محملة على ودنه وشغالة ( وده السبب فى إنى بروح الشغل فى ساعتين وبروح فى ساعتين، غير إن الشغل عشر ساعات فى اليوم، ويوم الجمعة بس هو اللى إجازة) فحسيت إنهم بيتكلموا عن عجلة تانية، فلما فكرت حسيت أن الكلام ده ضحك على الدقون، وبيشتغلوا الناس بأى حاجة عشان الناس تخاف تطالب بحقها، يعنى حتى أبسط مطالب الثورة اللى هى حرية إبداء الرأى، وحرية التظاهر والاعتصام مش قادرين نحققها. محمد أحمد