رجب.. معاق يعمل "ساعاتى" بقدميه "وله فى الكمبيوتر كمان"

رجب محمد شاب فى الثلاثين من عمره، متزوج وعنده ولد وبنت، يعمل "ساعاتى" ويعيش بقرية نائية تسمى كفر حجازى بالقليوبية، إلا أنه متمرد بطبعه، عنيد، أخذ العهد على نفسه أن يصبح مصدر فخر لأبنائه وأهله وناسه، محمد معاق وُلد بأذرع لا تعمل، ولكنه تحدى ظروفه وقهرها واستخدم بدائل أخرى بجسده حتى يستطيع أن يعيش الحياة. لم يطوع أصابع قدميه ليستطيع بواسطتها الأكل والشرب والكتابة فقط، بل وصل به التحدى إلى أن يستخدمها فى تصليح الساعات أيضًا.. فكان لليوم السابع معه هذا الحوار:
أنت راجل متعلم يا رجب؟
محصلتش على شهادات، لكنى تعلمت فى الكتّاب وقعدت فيه خمس سنين وحفظت أجزاء من القرآن، وبعرف أقرا وأكتب لأن بسبب حالتى كان لازم ما بين كل فترة أروح المستشفى فمقدرتش أواظب فى المدرسة.
ومين علمك الكتابة بقدميك؟
أنا علمت نفسى لأنى لما كنت بروح الكتاب وبشوف الأطفال بتكتب على الألواح، وكان الشيخ بيعفينى من الكتابه علشان ظروفى، كنت أنا بزعل لأنى عايز أتعلم، فصممت أنى أكتب، وفعلا كنت بستخدم صوابع قدمى، وطوعتها للكتابة والأكل وعشان أشتغل بيها وأسوق الماكنة إللى بركبها كمان.
وليه اخترت تشتغل ساعاتى؟
أنا اشتغلت أول ما اشتغلت مكوجى، لكنها تعبتنى قوى، وأنا من زمان كان فى بالى الإلكترونيات وإنى أتعلم التعامل معها، وفى الأول بدأت مع صديق ليا فى سنتر كمبيوتر خاص بيه واتعلمت الكمبيوتر واتعلمت أركب كيسة، لكن لظروفى مقدرتش أكمل لأنها كانت بتتعبنى لكن بعد كده اتعلمت إنى أفك ساعات، وكنت بروح عند واحد صديقى فى العتبه أشوفه وهو بيفك الساعات وبيصلحها وكنت بتعلم منه خطوة بخطوة لغاية ما قدرت أعمل الدكان بمساعدة ولاد الحلال.
بتكسب كويس من الشغلانة دى؟
يعنى ربنا بيرزق يوم 10 يوم 20 جنيه يوم مافيش بس الحمد لله دلوقتى أنا ليا زبونى إللى بييجى علشان خاطر رجب.
ولادك متعلمين؟
الحمد لله محمد 10 سنين 5 ابتدائى ونورهان 7سنين تانية معهد أزهرى.
ليه محمد ما بيساعدكش ويشيل عنك فى الشغل؟
لأنه لسة صغير وأنا ناوى أعلمه أحسن علام، ده غير إن الشغل عايز حد يكون كبير علشان يقدر يستحمل.
ايه حكاية الماكنة إللى أنت اخترعتها؟
هى فى الأول كانت ماكنة موتوسكل عادية وكنت بسوقها لكنها كانت بتعملى مشاكل كتيرة، خصوصا أن الطريق طويل علشان انزل البلد أجيب قطع غيار فبعتها وكملت على تمنها وجبت موتسيكل معين ورحت لواحد حداد وكنت أرسمله الرسمة إللى انا عايزها وهو يعمل إللى أنا عايزه علشان أقدر أتعامل بيها برجلى.
هى مرخصة؟
لا الحقيقة هى مش مرخصة لأنهم ماعرفوش يحطوها تحت أى بند.
والأمن بيعمل إيه؟ معاك لما بيشوفك بيها؟
محدش بيكلمنى لأنى بعرف أسوق وبحترم قواعد الطريق ومش لازم يكون معايا رخصة علشان أقدر أسوق
أنت راضى يا رجب؟
الحمد لله أنا راضى باللى وصلتله لكن نفسى حد يهتم شوية بيا ويضع فى الاعتبار ظروفى.. خصوصا إنى شايف إنى مش واخد حقى.
قصدك إيه مش واخد حقك؟
يعنى مافيش تقدير من البلد لظروفى أنا لو تعبت يوم وماشتغلتش ما بيدخليش دخل، دا غير إنى أنا بحثت على الإنترنت ما فيش واحد فى العالم بيشتغل سعاتى بقدمه، وإللى بيفوز بجوائز كبيرة بيكون فى مسابقات أى كلام.