المصريون يُمطرون "عكاشة" بوابل من العبارات الساخرة

انفجرت صفحات التواصل الإجتماعى - "فيس بوك وتويتر " - على شبكة الإنترنت من الضحك والقفشات اللاذعة بعد السقوط المُدوى للإعلامى توفيق عكاشة في إنتخابات المرحلة الثالثة لمجلس الشعب المصرى، وأمطر المصريون عكاشة - صاحب قناة الفراعين - بوابل من العبارات الساخرة، والكاريكاتيرات الأكثر سخرية، خاصة بعدما تناثرت أنباء عن حصوله على أقل من 1000 صوت فقط، علي الرغم من تكراره الدائم بأنه محبوب من كافة أطياف المجتمع المصرى - حتى الجماعة الماسونية - أنه ليس عميلاً لأي جهات أجنبية " على حد قوله " .ومن أطرف ما كُتِبَ عن واقعة سقوط توفيق عكاشة اليوم على الشبكة العنكبوتية :
• بعد النتائج المبدعة وغير المسبوقة لتوفيق عكاشة قررت اللجنة العليا للإنتخابات عمل مقعد شرفي له وهيقعد لوحده خالص.. فوق قبة البرلمان.
• عكاشة : عارف يا سي البرادعى حزمة الجرجير فيها كام عود ؟، البرادعى يخرج عن صمته ويرد : أكيد أكتر من الأصوات إللى انت أخدتها فى الإنتخابات.
• عكاشة بعد سقوطه المُدوى : ياشماتة التحرير فيّا.
• يقولك مره واحد عكاشة دخل الانتخابات.. طلع من الناحية التانية .
• آلاء نور، والشيخة ماجدة، والمذيعة أم باروكة "حمرا" قالوا لتوفيق: إحنا بنحبك وعايزين نتجوزك ، قاللهم: لأ لأ .. خلينا أصوات أحسن.
• تقريباً إللى خلى عكاشة يسقط هو صوت "أحمد سبايدر".
• يا شماتة الماسونيين فيك يا عكاشة.
• عكاشة اللى خلّاه يرشّح نفسه إنه كان فاكرها إنتخابات "برّمائية".
• توفيق عكاشة مقدم طعن فى نتيجة الانتخابات لأنهم منعوا "البط" من التصويت.
• عكاشة أخد 112 صوت .. منهم 150 "باط"لين.
• هو ممكن يبقى فيه "بط" فى المجلس؟
• إنها ليلة بكي فيها "البط" وذبل فيها "الجرجير".
• يا سيد عكاشة "اتبط" بقى واقعد ساكت.
• متعملش في نفسك كده إنت لسه صغير ووراك كوم "بط" عايز يتظغط .
• أعلن البط احتجاجه الشديد على سقوط عكاشة وقرر عمل وقفة احتجاجية على كوبرى طلخا.
• خبر عاجل: لعبة المزرعة السعيدة تعلن الحداد لمدة ثلاث أيام حزناً علي خسارة توفيق عكاشة في إنتخابات مجلس الشعب.
• إنتوا فاكرين إن عكاشة خسر الانتخابات.. بالعكس ابسولوتلى .. الانتخابات هى إللى خسرت عكاشة !
• يا جماعه المجلس هو اللي خسر يعني مين دلوقتي إللي هيمسك اللجنة الكوميدية إللى كانو هايستحدثوها في مجلس الشعب !!
• ها يطلع يقول فى قناة الفراعين : مش ساقط حتى لو حصلت على صفر من الأصوات، من أنتم؟ .. من أنتم ؟
• أنا حزين إن أهالي الدقهلية مش عارفين مصلحتهم واختاروا الماسونية بدل الوطنية.
• هيقول: مؤامرة، ماسونية، شيوعية، اشتراكية، ميكافيلية، ليبرالية، إخوانية، سلفية، علمانية، عباسية ..عباسية ..عباسية .
• أحب أهدي للدكتور عكاشة أغنية: والله وعملوها الرجالة.
لا شماتة ، و الله كنت بأضحك من قلبي لما أسمعه عامل زي الأرجوز الهندي - و أفتكر بعد الهزيمة المنكرة - هيحاول يبرر موقفة من خلال الماسونية الإسرائيلية .