حافظ الشاعر يكتب عن : يوميات زوج مفروس جداً!!

جلس فى حجرة التلفاز ومعه زوجته وأولاده الأربعة ؛الأولاد يتابعون مسرح مصر ؛فهم دائبون على متابعته كل يوم جمعة ..فى الثامنة مساءا الجميع يغلق كتبه ويتوافدون على الحجرة ويتكأ كل منهم على أريكته المفضلة ،والأب يمدد جسده على أكبر كنبة للأنتريه ،والأم تجلس القرفصاء على الأريكة ؛وأمامهم فى طبق ب 2 جنيه "لب سورى"؛لأن الميزانية لا تسمح باللب الأسمر أو الأبيض أو الفول السودانى أو الفستق أو ما شاكل .
الشهر يلفظ أنفاسه الأخيرة ..الشقة صامتة اللهم إلا من صوت التلفاز وقهقهة الأولاد من مشاهدة المسرحية ..الزوجة تباغت زوجها قائلة :قبضت النهارده..يومأ إليها بطرف عينيه ..فى اشارة إلى أن الكلام ليس أوانه عندما تنتهى المسرحية ويخلد الأولاد إلى حجرتهم ؛ ولكنها بغتاتة تعاود السؤال عليه :قبضت النهارده؟!! يومأ لها بطرف عينيه وجسده النحيل ممدد على الكنبة ..ويستدير وجهه للتلفاز ..تعاود بصوت عال قائلة : أنا مش بكلمك ما ترد عليا ..ببرود رد قائلا: اهمدى يا وليه ..أنتى مبتفهميش كررتى سؤالك ميت مرة وبصيتلك فى كل مرة يعنى افهمى لما المسرحية تخلص ..بقالك عشرين سنة معايا ومش فهمانى لحد دلوقتى ..أنت إيه طور الله فى برسيمه ..هتخلينا نغلط بس ..أيوه قبضت مرتبك ومرتبى يا ستى ارتحتى !!
رد الدم فى وجهها ولم تعير أى اهتمام لقصيدة السب التى وجهها لها زوجها ..كل همها ..قبض ولا لأ..وأرخت ساقيها على السجادة وتناولت "كبشة" من اللب السورى" وأزأزته ..ولما فرغت من أزأزة اللب ..كانت المسرحية على وشك الإنتهاء .
فصرخت فى وجه أبنائها ..ياله ياض انت وهى قوموا ناموا ..ادخلوا الحمام الأول واظبطوا المنبه على الساعة 6 عشان نقوم نروح نشوف شغلنا ..الأولاد طبعا سمعا وطاعة ..ينظرون إلى آباهم ويتبادلون بعيونهم علامات الإطراء والتعجب والتريقة على أمهم ..وينظر إليهم آباهم ويشير بيده يعنى ادخلوا ناموا لما أستلم حصتى فى الردح منها ..الله يكون فى عونى.
يدخل الأولاد إلى حجرتهم ..وتفترب الزوجة من زوجها ..وتبادره ايه يا أبو العيال المرتب زاد ..زاد إيه يا مدام ..الله مش الحكومة لغت قانون الخدمة المدنية ..آه ..بس..قبض الشهر ده على قديمه ومن مارس هترجع الحوافز تانى ..الله أيوه كده خلينا نحس إننا عايشين شوية ..متفرحيش يا مدام الحكومة ودت للبرلمان قانون تانى وأشك إنه نفس قانون الخدمة المدنية بس على شوية تعديلات .
الزوجة :يعنى ايه همه معدتش وراهم غيرنا ..هو احنا انتخبنا السيسى عشان يعمل فينا كده ..الله ..الله ..الكلام ده جديد ..أنت قلبتى يا مدام ..لأ ..بالعند فيك ..السيسى حبيبى ..فيرد الزوج الله يلعنك يا شيخة وأمثالك ودتوا البلد فى داهية ..أنتم مالكم ومال السياسة ..فيه فرق بين إنى أنتقده وفرق بين إنى أنتقضه ..الابلد تايهة ومش عارفه رايحه فين!!
ومسكها زوجها من كتفها قائلا : اجلسى :أنتى بتقبضى 1450 جنيه وأنا بقبض 1630 جنيها يعنى المرتبين بيساوى 3080 جنيها ..فاتورة المياه الشهر ده بكام 400 جنيها ..ليه يا مدام ..هى زادت الشهر ده والريس قال نستحمل ..طاااااااااااااايب نحطهم فى جنب ؛فاتورة الكهرباء 550 جنيها ..الزوج ينزعج ويقول يا نهار أسود ليه يا مدام ..ده أنا لا أجلس فى البيت ولا عندى مصنع ..ما هو الريس قال لازم نجوع عشان نبنى بلدنا ..طاااااااااااااايب يبقى كده كام ..ترد الزوجة 950 جنيها.
فاتورة التليفون 135 جنيها ..ليه يا مدام ..بقالى سنة ما دفعتش وهشيله ..الزوجة تقول ..احنا علينا فاتورة قديمة وتشيله ليه ..أهلى عايزه أطمن عليهم وعايز أطمن على أمى ..طااااااااااااااايب..كده المجموع 1085 جنيها.
دروس الأولاد :أحمد فى الثانوى العام عايز 800 جنيه للمدرسين وكتبهم وأخته فى الإعدادى بتاخد فى كل المواد عايزه 400 جنيها والولدين التانيين كل واحد 300 جنيه ..يعنى دروسهم كام 1800 جنيها ..يا نهار أسود ..والمدارس مش بياخدوا فيها حاجة ..مدارس إيه ولادنا لازم يطلعوا دكاترة ..دكاترة ايه يا مدام ..ده الواحد يجبلهم توك توك ويلفوا به دائرى فى البلد أحسن ..يا رجل أنت عايز تفضحنا ..كده المجموع كام يا مدام 2885 جنيها ..طااااااااااااااايب
مصروف العيال كل عيل 2 جنيه فى اليوم يعنى إيه همه 4 فى 2 ب 8 جنيها فى اليوم فى 30 يوم بيساوى 240 جنيها ..الزوج يحدث نفسه ويحسبها نضيفهم على ال 2885 يبقى 3125 جنيها .
ايه ده يا مدام ده فيه عجز يعنى احنا كده هنستلف ولسه أكل الشهر وأنا بطلت شرب سجاير ومواصلاتى والفاكهة وبتاع الوصلة وشحن الموبايل ..ايه ده ..ونظر إليها بحسرة قائلا : منك لله ..مش عارف أعيش فى البلد دى !!يارب ارحمنا برحمتك
تبادره قائلة: احمد ربنا إنك عايش ..يرد الزوج يا وليه الشهر اللى فات كان ماشى كويس لحد يوم 7 فيه ..ده بعد زيادة الميه والكهربا مش عارفين نبتدى فيه .
ترد عليه ..اسمع لازم نجوع عشان نبنى بلدنا
روحى منك لله يا بعيدة هو أنا كاره البلد ..ما أنا بحبها برضه ..بس مش أشحت ..مفيش عدالة فيها عشان كده ..مش عارف أبتدى الشهر ..رحمتك ياااااااااارب .
وفجأة انخفض ضغط الزوج وتم نقله للمستشفى فى حالة حرجة !!