بما أن آخر الشهر هل علينا وأخدنا المرتب. وكل واحد فينا يدخل على المحاسب "وقلبه مقبوض" ويقرأ آية "الكرسى" في سره وكأنه داخل امتحان الثانوية العامة. تلاقي ناس طالعة مبسوطه قوي وناس تانية طالعة على وشها مرسوم النكد النكد النكد. وناس تانية طالعة تبرطم بالكلام من نوعية أقول إيه للمدام والله ماهتصدق وهتفكر إنى "خنصرت" المبلغ المخصوم تلاقي واحد صاحبه يقوله ولا يهمك أنا أروح معاك البيت وأقنع المدام إنك قبضت المبلغ ده بس. واحد تاني يصرخ ما أنا عارف إنها ليلة سودة من أولها "ويمط شفايفه لقدام طز" وإيه يعنى هي جديدة ما هو أول كل شهر بيحصل كده وأكتر خناقة تلاتة أربع أيام وفي الآخر صلح. وأنت بتسمع كلام من هنا وهناك وما تسمع غير رنين الموبايل وتبص تلاقي المدام شيء إلاهى "ركبك" تضرب في بعض "وأسنانك" تخبط في بعض وقلبك يتقبض وريقك ينشف فجأة وتحس أن عزرائيل جاي يقبض روحك دلوقتي. وتتمالك أعصابك وترد آلووووووووووووو. تلاقي المدام بصوت "مرعب" قبضت؟ تتعرش وترد أيوه يا حبيبتي والنبي ما تزعلي أبدا. ما تسمع غير الصراخ يعني كام يا حبيبي؟ تتنهد وتحاول أن يبقى لك شخصية وتقولها زي الشهر اللي فات بس خصموا 200 جنيه. ما تسمع غير كلمة نعممممممممممممممم؟ وتبدأ في طرح المشكلة طب والجزار والبقال والإيجار ومصاريف العيال والكهربا والمية والزبالة مع أن مفيش حد بيشيل الزبالة لكن بندفعها قولي أعمل إيه فهمني _وتصرخ_ اتكلم؟ تحاول إنك تبقى إيجابي مرة في حياتك وتفهمها إنك لا ذنب لك في الموضوع وإن هو ده المرتب أعمل إيه؟ صراخ المدام لا يتوقف وتقولك أنت عارف حضرتك أن الأسعار بقت نار والسلعة أم جنيه بقت بتلاتة قولي بقى هتعمل إيه ياعم الناصح؟ تحاول تمسك أعصابك وتقولها قوليلى يا حبيبتى أعمل إيه أنا تعبت وزهقت. وفجأة يعلى صوتك أعمل إيه خلاص حرام عليكي حرقتى أعصابى أنا جالى الضغط وفي الطريق للسكر وكل ده بسبب الفلوس. أنا الحمار اللى بيصرف ماشي بس الحمار ده ليه طاقة كفاية بقى كل ده والمدام ساكتة. وبهدوء ترد عليك معلهش يا حبيبي لينا بيت نتكلم فيه صح؟ أعصابك تبوظ بمجرد ما تسمع كلمة لينا بيت وتحاول تعتذر وتفهمها أن الزملاء حواليك وكان لازم تعمل كده. عشان شكلك ما يبقاش وحش. ما تسمع غير المدام وهي بتقول هات المرتب وخلص شغلك وتعالى ومش عايزة أسمع كلام تانى خالص فهمت يا حبيبي؟ تلاقي نفسك مضطر إنك تكمل التمثيلية وتزعق. حرام عليكي يا ستي أعمل إيه أنا خلاص جبت الآخر وتصرخ بعلو صوتك: انا مخنووووووووووووووووووووووق!
