صفحات للبلطجية على الفيس بوك

لو بلطجي او تسعى انك تكون بلطجي تعالى، ولو تعرف بلطجى خليه ييجي معاك ويدخل الصفحات دي على " الفيس بوك " : ( أنا أسف يا بلطجية) ، (يا بلطجية مصر اتحدوا) ، (الصفحة الرسمية لأتحاد بلطجية مصر) ، (انا بت بلطجية مش حتة طرية) ، (رابطة بلطجية مصر) ، (احنا اسفين يابلطجية) ، ( بلطجية الفيس بوك).
وظهرت في الآونة الاخيرة الكثير من الصفحات والجروبات على موقع التواصل الاجتماعي "فيس بوك" تدافع عن البلطجة ودورها مؤخرا في الاحداث التي مرت بها البلاد فعلى حد قولهم :
اعلنت صفحة ( رابطة بلطجية مصر ) : نحن روابط للم شمل كل بلطجية مصر، احنا جزء من المجتمع المصري وبرضه بنحب مصر وبنحب الانخراط في المجتمع والتواصل مع كافة أطياف الشعب، نريد حلا!!
فيما يقول مؤسس صفحة (انا اسف يابلطجية): أنا شاب مصرى عندى 22 سنة لا ليا فى السياسة ولا بحبها ولا اتبع اى حزب ولا اى نظام وعملت "البيدج" عشان أقول ان البلطجية دول هم اللي اتظلمو في وسطنا .. الناس دي كان قصدها تصلح البلد وتوقف الفتنة .. وفي الآخر كمان يتقبض عليهم ويتشوه صورتهم في وسائل الإعلام !! .. لازم كلنا نرد ليهم الجميل .. وده أقل واجب نقدر نعمله لهم .
بينما علقت صفحة ( يابلطجية مصر اتحدوا ) : من اجمل الحاجات اللى غيرتها الثورة ان اطفال زمان كانوا بيلعبوا عسكر وحرامية.. ودلوقتى بيلعبوا ثوار وبلطجية !!
بينما دعت روابط البلطجة الاخرى للنزول للشارع بقولها : كلنا هننزل الايام الجاية نقول لالالالا للشرطة ..لا لإهانة البلطجية.. مش هنكون سلبيين بعد كده... بلطجية مصر ميتهانوش أبدا.. موعدنا في الانتفاضة الشعبية لعودة البلطجة لشوارع مصر، كفاية سكوت وسلبية بقى ..لازم ننزل كلنا في مسيرة الكرامة لبلطجية مصر.
والعجيب في الامر اجماع البلطجية على مطالب محددة وهي:
- الإعتراف بالبلطجة كوظيفة رسمية في البلاد.
- لازم نعرف وسائل الإعلام العالمية ان بلطجية مصر ميتهانوش بالشكل ده .. لأنهم جزء هام في المجتمع.
- إنشاء معهد عالي لتخريج دفعات من البلطجية كل عام .. مع ضمان توفير فرص عمل للبلطجة.
- لابد أن "لا يتعامل" الجيش مع البلطجية على انهم خارجين على القانون أو مجرمين، لأن البلطجية برضه جزء هام في المجتمع.
- لازم الشرطة تحترم البلطجية لأن لحم كتاف الشرطة من خير البلطجية لان لولاهم مكنوش كلو عيش.
- لازم نوصل صوتنا للعالم ان الوحيد فعلا اللي عارف قيمة البلطجية في مصر هو (جهاز أمن الدولة) .. له منا كل شكر وتقدير.
- في حالة اذا لم يتم تنفيذ مطالبنا .. هنعمل اعتصام لحين تنفيذ المطالب.
- وأخيرا لازم نعرّف البلطجية إننا عارفين قيمتهم وفضلهم علينا طول السنين اللي فاتت دي .. ولازم نرد ليهم الجميل.
وفي المقابل، ظهرت صفحات مضادة لتلك الظاهرة مثل : "حملة للقضاء على البلطجية فى مصر" و "ارفعوا ايدكم عن مصر لن تنقسم -حملة ضد البلطجة والفتنة" و" مصري ضد البلطجة".
وطالبوا بالاعتراف بأننا نعيش بلا أمن ولا دولة، والدولة بمعناها الأشمل من "الحكومة" فقد انفرط العقد الاجتماعى وسادت حالة من الفوضى وانتشرت البلطجة في كل مناطق الجمهورية ، لذلك يجب التعاون مع القوات المسلحة و الشرطة للوقوف وصد هذا الارهاب الجديد الذي كان من سلبيات الثورة.
وأوضحوا ايضا أن البلطجة في مصر انتشرت منذ سنوات بسبب البطالة وغياب الوعي وانتشار الخوف ، مطالبين الحكومة والجهات الأمنية بعمل حملة ضخمة ضد البلطجة في الشارع المصري يساندها ويشارك فيها كل المصريين .