مسنة "مسحراتية" بملاحة بلقاس نادية المسحراتية ل"الزمان المصرى" : أنا ذى ورقة اليانصيب ومش موظفة حكومة ..أنا عملاها ثواب لله

لم يخطر ببال الست "ناديه" 56 عاماً.. أن تكون "مسحراتية " ذات يوم ، ولكنها أمام شظف العيش أخذتها "مهنة" لتستطيع أن تأوى أطفالها الست ، فهى أرملة ،وتعيش على حد الكفاف ولا يسأل فيها سوى الفقير مثلها ، فيقتسم معها "كسرة" الخبز ،حتى تقوى على المعيشة ، وهذا ما فعله العم " نعيم " مسحراتى قرية "الملاحة " مركز بلقاس ؛ فكان عونا لها ، وعندما اشتد به المرض وقبيل أن يتوفاه الله أعطاها أمانة سحور القرية ؛ فقبلتها بالرغم من أنها امرأة .
"الزمان المصرى" تتحاور معها
* كيف دخلتى مهنة "المسحراتى" بالرغم من كونك امرأة ؟
كان هناك رجل طيب وهو عمى "نعيم" المسحراتى ، وكان هو الذى يقوم بسحور الناس ،وعندما شعر أنه سيفارق الدنيا إلى دنيا أخرى ..قال لى خدى السحور فقلت له : أنا مأدرش فقال لى : يا "ناديه" أنا بدهالك عشان عيالك أنت عندك 6 عيال وايدك مش طايله ..فقلت له ماشى وأخذت السحور وقلت توكلت على الله ..أصل عمك "نعيم" كان حاسس بى وعارف إنى صاحبة عيال وغلبانه ، وكان بيجيب الأرز لى فى الفراجيه بتاعته ،رغم إن حالته مش أوى .
* حياتك شكلها إيه؟
الحمد لله ..أدينى عايشه ..عندى 6 عيال وأرملة ومفيش ولا واحد منهم بيجيب نص جنيه.
* أنت مخفتيش لما عمك "نعيم" قالك تبقى "مسحراتيه" لأنك ست يعنى وهتمشى تسحرى الناس بالليل؟
لا..مخفتش ولا حاجة ..أنا كنت نوياها لله ..بلف البلد الساعة 2 صباحاً ولما بخلص "سحور" يكون قرآن الفجر اشتغل ،وأخاف من إيه والبلد كلها عارفانى ، ومجبورة على كده ..أعمل إيه والأيام صعبة ، والنفر منا حى عشان يجيب حباية حبوب فى الدار ،والأيام الحلوة عشناها والمرة عشناها وأهى ماشيه ..أنا عملاها ثواب لله ..عندى ايلى بيجيب زى ايلى مبيجبش ،وفيه واحد عنده نظر وفيه معندوش .
شوفى أنا ذى ورقة اليانصيب ومش موظفة حكومة ..أنا عملاها ثواب لله. ولأنى نوياها لله مخفتش ولا حاجة ومشيت وقلت ربنا معايا ،ولكن مهما يحصل الواحدة مش زى الرجل.
مرة الكهربا تقطع عليه ومرة حد يقابلنى يخبطنى بس أنا بقول ..يارب. وأصحى الناس لأن الظروف ايلى كنت في فيها كانت صعبة بشترى كيلو الأرز ويأضينا يومين ؛فمرة عيش ومرة أرز وهى ماشيه.
* هل بتبقى سعيدة وأنت بتسحرى؟
بالرغم من لفى البلد دى كلها لواحدى ؛إلا إننى بحس إنى طايرة من الفرحة وكأنى ذى الريح ،ليالى الكهربا بتقطع على وربنا بينورها لى وأنا ماشيه .
* رغم إن أولادك كبروا محدش منهم قالك ريحى بأه واحنا نريحك؟
لا..محدش قالى مطلعيشى بالليل ..وبقالى 7 سنين بصحى الناس ومحدش قالى "اإعدى يا أمه"وعشان أصحى واحد منهم مبيرداش يصحى ،وربنا كبير وأحسن منه مفيش وإحنا بنقول ربنا اللى بيرزق ..الكشاف فى ايدى والعصايا معايا .
مرة ألاقى جدعان جايه ومرة آلاقى حد صاحى ومرة آلاقىلا البلد ذى الأموات ،وربنا بيعنى ..شوفى أنا بلف البلد دى كلها وربنا اللى بيعنى .
* مفيش موقف اتعرضتيله وأنت بتسحرى؟
مرة اتعرضلى شاب فى منتصف الليل وقال لى هاتى سيجارة ،ناولته بالجركن وفضل ماشى ورايا ،لحد ما شافه شابين ،وقالوا له أنت عاوز منها ايه ؟قال عاوز سيجارة ، قالوا له هى بتسحر مش بتشرب سجاير ..ومشوه .
* الناس بتكرمك ازاى فى نهاية الشهر؟
فيه ناس بتجيب أرز وناس بتجيب فلوس وفيه ناس مبتسألش وأهى ماشيه والأرزاق على الله وربنا كبير وأحن منه مفيش .