المسحراتى

أنا شغلتى مسحراتى أدق على الطبلة
وأصحى أهل البلد قبل الأدان حبة
وألف أنا وطبلتى انده على النايمين
وأقول لراعى البلد أحرس غناماتك
وخلى بالك وحافظ على الغنم حبة
أنا شغلتى مسحراتى أنده على النايمين
وأدق فوق طبلتى وأفوق السارحين
وأسال اللى شرد وأقوله رايح فين
وأساعد اللى وقع واللى انغرز فى الطين
وأغنى للى انجرح واللى حزن حبة
أنا شغلتى مسحراتى وحافظ المواويل
أسهر أغنى ليلاتى فوق شطوط النيل
راضى أنا بشغلتى وحظى منها قليل
الناس تنام وأنا سهران بطول الليل
خايف يضيع السحور لو نمت يوم حبة
أنا شغلتى مسحراتى وبشتغلها بلاش
نفسى اصحى اللى يسوى وانسى اللى مايسواش
ونفسى أقول غنوتى اللى مغنتهاش
يسمعنى ابن البلد اللى ضربها طناش
ويفوق بقه لدنيته ويعيش بطل حبة
أنا شغلتى مسحراتى وألف فى السراديب
وبصحى أهل البلد تمسك معايا الديب
ولو إن أنا مش غفير لكن مزاجى عجيب
عاشق تراب البلد وليه ألف حبيب
ويطلع نهارى وأنا ما غفلت ولا حبة
أنا شغلتى مسحراتى طول شهور العام
لا فى يوم نسيت طبلتى ولا قولت هاخد كام
بتحمل البرد والمطرة وبتحمل اسى وكلام
وسهرت أحرس شوارع لما غفيرها نام
ورحت أصحى الغفير قالى كمان حبة
أنا شغلتى مسحراتى بس أقول يا مين
وأنا أهلى م المغربية فى الجحور لابدين
الدنيا صحيت وهمه من زمان نايمين
وغلبت أنادى فى ناس حطه فى ودانها عجين
والدود نخر عضمهم ولا سبش ولا حبة
أنا شغلتى مسحراتى وشكوتى لله
تعبت قلبى وأنا لطلبت مال ولا جاه
كان نفسى أصحى الغفير وشيخ الغفراياه
سابوا الحرامى هرب فى الزحمة منى تاه
سرق الشعير م البلد ولا سبش ولا حبة
أنا شغلتى مسحراتى بسحر العمدة
وأقوله ليه الولد تاخد عليه فرده
وليه دخلت بنعيمة وهية فى العدة
وظلمت أهل البلد وحكمت كام مده
كان يجرى أيه لو رحمت وفتنه حبة
أنا شغلتى مسحراتى وعارف القوانين
وعارف اللى ظلمنى وساعد الفاسدين
وعارف اللى سرق واللى نهب ملايين
وعارف الباشا هرب كل ماله فين
كان يجرى أيه لو ترك للمحرومين حبة
من كام سنة يا بلد سهران بصحيكى
وتعبت قلبى وأنا بصوتى بناديكى
شايفك تعبتى وأنا نفسى أداويكى
وأجيب بأيدى الدوى تقولى كمان حبة