*الحمار بتاعي بعتبره عيل من عيالي *بقول لرئيس الحكومة الناس تعبانة *الثورة خربت البلد *ربنا اللي بيرزقنا ..لا مرسي ولا غيره "أحمر وحلاوة يابطيخ "، "طرّي علي قلبك ياعطشان " هذه هي الكلمات التي يستخدمها "عم حنفي" ليشد اُذن من يسمعه في الشارع في هذا الجو الملتهب من فصل الصيف . "عم حنفي" أحد محترفي البيع المتجول في شوارع قاهرة المعز منذ 20 عاماً، بعربة الاجرة التي يجرها حماره، الذي يعتبره كأحد أبناءه، اقتربنا منه لنعرف قصته ومدي إدراكه للواقع الذي يعيش فيه فوجدنا انفصاله عن الحياة تماماّ وخاصة السياسة، لأنه يلهث لجلب قوت يومه، ويعمل طوال اليوم ليتحصل في النهاية علي ثلاثين جنيهاً، واكتشفنا أنه لا يعرف اسم رئيس الحكومة، بل يعرف عن حماره أكثر مما يعرفه عن الحكومة. وقد أكد في حوار مع شبكة الإعلام العربية "محيط" أن هذا المبلغ يكاد يكفيه ليعيش هو وأبناءه الأربعة الذي يعاني أحدهم من بتر في قدمه بسبب حادثة، اتهم الحكومة بإهماله وأبنائه، ويدعو الله بإصلاح الحال، وكان مع عم حنفي هذا الحوار: إزاي بتبدأ يومك ياعم حنفي ؟ أول ما أقوم من النوم، أسحب الحمار من الجراش، وأطلع علي أكل عيشي، وأحط البطيخ علي العربية وأتوكل علي الله . فيه مناطق معينة بتلف فيها ؟أنا بلف علي البيوت طول النهار في الطالبية، والزهراء، وساقية مكي، وأدخل كل الشوارع، وأي حد أقابله في طريقي أبيع له، وماليش زباين معينيين، كل الناس بتشتري مني وكله تمام الحمد لله. وليه اعتبرت الحمار زي أولادك ؟ هو سبب لقمة عيشي، ومن غيره ما أعرفش أروح أي مكان، أمال هشيل البضاعة على العربية إزاي، وعلى فكرة ده اّخر حمار اشتريته، وبقاله شهر معايا، وبحبه قوي، عشان كده بعتبره زي أي ولد من ولادي، وأنا من غيره ما آكلش ولا أشرب. أكل عيشي أهم طب وإيه أخبار السياسة معاك ؟ أنا معرفش حاجة في السياسة، أنا بدور على أكل عيشي بس . يعني ما شاركتش في أي انتخابات قبل كده ؟ لا ..خالص . وتعرف اسم رئيس الحكومة ؟لا، أنا ما اعرفش اسمه ولا اي شئ عنه، أنا يابنتي حماري هو الحكومة. ربنا اللي بيرزقنا مش مرسي. أكيد تعرف الرئيس محمد مرسي ؟ "مرسي "!!. ربنا يصلح الحال يابنتي . طيب كلمنا عن أحوالك وأنت شايف الدنيا ازاي ؟ وعاوز حاجة من الرئيس ؟ أنا بقول الحمد لله، وربنا وحده الذي بيرزقنا مش حد تاني لا مرسي ولا غيره، بس يابنتي الدنيا خربانة ومشفناش الكلام اللي بيحصل ده قبل كده، كل يوم خناقات وسرقة وضرب، والّلي على باب الله هو المظلوم . وتقول إيه للشعب المصري والحكومة ؟ ربنا يهديهم ويصلح الحال، وربنا يرزق الناس واللي مش لاقي شغل يشتغل وربنا يديكم الصحة والعافية، وبقول للي بيتظاهروا عاوزين نشتغل وناكل لقمة عيش ونشوف حالنا. معاك كام عيل ياعم حنفي ؟ عندي أربعة، 3 صبيان، وبنت متجوزة، وواحد منهم رجله مقطوعة ومحجوز في القصر العيني بسبب حادثة، ومش عارف أصرف عليه، ولا أجيبله كل العلاج اللي عاوزه عشان اللي جاي على قد اللي رايح . فيه حد في أولادك متعلم ؟ أنا طلعتهم من المدرسة عشان يساعدوني، لأني مش قادر أصرف عليهم، وأبني الكبير عنده 35 سنة، شغال موظف في مطبعة ومرتبه بسيط ،وأكتر واحد عندي متعلم خد دبلوم، والباقي طلعتهم من المدرسة عشان مش قادر أصرف على تعليمهم . على باب الله يعني دخلك قد إيه في الشهر ؟ أنا علي باب الله، يوم فيه رزق وفلوس، ويوم مفيش وكل يوم برزقه، لكن يوم ما ربنا بيفرجها ممكن أكسب 30 جنيه في اليوم . وأنت شغال من إمتى في الشغلانة دي ؟ الشغلانة دي مش سابتة على حسب الموسم، يعني مرة بطيخ زي ما أنتي شايفة ومرة طماطم، أو برتقان، أو سفندي، أو كانتلوب، لكن طول الصيف ببيع بطيخ بس . العربية اللي بتبيع عليها بتاعتك؟ لا العربية دي اُجرة والبطيخ بالاُجرة، أنا بأجرها بالشهر مش باليوم، واخدها من صاحبها بسبعين جنيه في الشهر، والراجل اللي بأجر منه البطيخ بيديني 30 جنيه على البطيخ اللي سرحت بيه في اليوم . طيب ال30 جنيه دي بتكفيك؟ ولا بتعمل حاجة،أنا عندي 4 عيال منهم واحد رجله مقطوعة بصرف عليهم كلهم، ومصاريف العلاج لوحدها الله أعلم بيها . عاوزين الدنيا تهدا عم حنفي سمعت عن وقفة يوم 30 /6 عشان يوقعوا النظام ؟ لا يابنتي، بس ربنا يهدي ويصلح الحال، وعاوزين الدنيا تهدا ، عشان العملية ما تخربش، وحال الناس يوقف أكتر ما هو واقف . في رسالة عاوز تقولها لرئيس الحكومة اللي أنت مش عارفه ؟ عاوز أقوله "الناس تعبانة" ياريت توفر لنا لقمة عيش إحنا وعيالنا، وربنا يصلح حال البلد، عاوزين نحس بالأمان . ليه بتقوله الناس تعبانة أنت شايف انه مقصر في شغله ؟ أيوة، أنا مش شايف حاجة منهم يابنتي، ده مافيش أمان زي زمان، من كام يوم بلطجي وقفني بمطوة، وقالي يا تجيب الفلوس اللي معاك يا اّخد الحمار، وخد مني 200 جنيه، وفديت الحمار وحياتي بالفلوس، الحمار بالدنيا كلها ! . الثورة خربت البلد طيب ياعم حنفي أنت شايف قبل الثورة أحسن ولا بعدها ؟ ما فيش فرق، قبل زي بعد، ده الزبون نفسه تعبان ومش قادر، وهو قدامك الست بعد ما خدت بطيختين رجعتهم ودفعت حقهم من جيبي، أنا عارف إن قبل الثورة كانت الدنيا خربانة بس بعدها الدنيا خربت أكتر، ولا فيه حكومة ولا فيه أمن، دا أنا إبني خبطته عربية، ورجله اتقُطعت وضاع حقه، ومعرفتش مين صاحب العربية اللي داسه. وليه ما عالجتوش على نفقة الدولة ؟ المشكلة مش العلاج على نفقة الدولة، أنا عملت كده بس فيه علاج وإبر من بره، ما أقدرش أجيبهم، وبضطر أستلف على قد ما أقدر .