كلنا ولاد تسعه ..بقلم :حسين الحانوتي

مش معنى ان ربنا ميزك واختارك و اداك حاجه زياده و اخد من غيرك حاجه دا يخليك تبقى فوق الجميع
الرسول الحبيب عليه الصلاة والسلام قال
إِن الله لا ينظر إِلى صوركم وأموالكم و لكن ينظر إِلى قلوبكم و أعمالكم
فمتنساش ان غالبا احنا جيل وارث وضعه الاجتماعي من والدينا يعني احنا لم نؤثر في المجتمع او اكتسبنا و ضعنا فيه بعرق جبينا اللهم الا القليل المكافح العصامي واللي الظروف والمسؤليه فرضو عليه انه يحارب عشان يعيش ويعدل وضعه
و في الغالب مش الكل فمتفرحش قوي ان انت ابن ناس لأن الوضع اللي فيه مش بايديك ولا ليك دور فيه انت مستهلك لوضع قائم حصرتك اتولدت لقيته
وسبحان الله كان ممكن متبقاش في المكانه دي او ربنا يخلقك لاب و ام تانين و تتولد تلاقي نفسك بتشحت في الشارع رغم وجود ابوك وامك واخواتك وعيلتك كلها
وبرضو مش معنى انك ابن ناس تبص للاقل منك انه حشره او مخلوق غريب من كوكب تاني او انه ميستاهلش الحياه خليك متواضع الدنيا دوراه ممكن تقلب في ثانيه بترفع ناس وتدهي ناس
و مش معنى انك ابن ناس دا يمنعك انك تعمل خير وتكون متواضع في معاملتك مع الاقل منك وضعا اجتماعيا او ماليا ومتتحرجش تطبطب على طفل يتيم او تمد ايدك و تدي حسنه لفقير خليك طيب منكسر جابر للخواطر مشارك في اي عمل اجتماعي نافع ليك واللي حواليك
و مش معنى انك ابن ناس ترمي الزباله في الشارع عادي او تنكسف تشيل طوبه او زباله مرميه في نص الشارع خليك ايجابي متقولش انا فلان ودي شغلانة فلان وتستهزئ
وكمان مش معنى انك ابن ناس تفتكر انك الصفوه في المجتمع و ان اللي خلقك مخلقش غيرك و ان لازم يبقى منخيرك في السما والمعامله مع البواب والسايس والعامل تقل قيمتك ووضعك بالعكس دا التواضع ومن تواضع لله رفعه
احب اقول في ولاد ناس قوي بيعملو خيير وبيدورا علي الخير فين عشان يعملوه و مؤمنيين جدا و قلاشين جدا و متواضعين جدا نفسهم البلد دي تبقى انضف بلد وناسها ارقي ناس في الدنيا مبيفكروش في نفسهم بس لا بيفكروا يسعدوا الناس قبل ما يفكروا في سعادتهم هيبقوا اجدع دكاتره واكبر مهندسين واعلي مناصب و مش هيفرق معاهم انهم دخلو كليات قمه و مش هيشوفو نفسهم و مش هتفرق معاهم الفلوس ولا المكانه و هيفضلو يعملو الخير لحد ما يلاقو وجه كريم لانهم علي يقين ان لو رجع الزمن بعائلاتهم قبل ما هم يتولدوا كان ممكن يلاقوا ظروفهم زي ظروف اي حد من اللي بيشوفوهم لكن هي ايام يداولها الله وطبقات وضعها ربنا جل وعلا لا الغني كان غني وهيفضل غني ويتوارث الغني ولا الفقير هيفضل فقير ويتوارث الفقر وانهم متخلقوش بوضع اجتماعي اغني من الناس اتخلقوا زي الناس
مش ناس اتخلقت بسمنه وناس اتخلقت بزيت يعني كلنا ولاد تسعه وكلنا من التراب واليه وعشان الناس دي وصلوا بعقيدتهم وايمانهم للحقيقه دي عرفوا ان الكل سواسيه فمش فارق معاهم انهم يتواضعوا بمعاملاتهم مع البشر عشان كده بتلاقيهم كلما زاد تواضعهم زادت محبتهم مع غناهم بل مرتاحين نفسيا وكلما تصالح الشخص منهم مع نفسه ومع عباد الله ظل في معية وحفظ الله ورفع قدره في قلوب وعيون الناس
و مهما كانت الظروف حواليه قناعته دايما ان يوم لك ويوم عليك فخلي لك رصيد من ايام الغني ينفعك في ايامك الجايه اللي مش عارف هيبقي شكلها ايه... دمتم بالتواضع