لمؤاخذة!

فلان: بالذمة مش مكسوف من نفسك؟
علان: اشمعني؟!
فلان: فاشخ ضبك.. والبلد في أزمة.. وكله بياكل في بعضه!
علان: ما هو ده سبب انشكاحي!!
فلان: يا سلام.. ليه بقي يا فيلسوف.
علان: لاني في وسط العتمة شايف طاقة نور جميلة وكل أهل مصر ملفوفين حواليها.
فلان: وايه كمان يا عم الرومانسي؟
علان: نظام المخفي الله لا يرجعه.. كان مخوف الناس من بعضها.. الإخواني من الليبرالي.. والناصري من الساداتي.. والمسلم من المسيحي.. والغني من الفقير.. والأهلاوي من الزملكاوي.
فلان: ودلوقت شايف الحب مرفرف بجناحاته علينا.
علان: شايف لغة جديدة بتتولد من قلب المحنة.. وشايف مصلحة واحدة تقدر تلم الكل حواليها وشايف اختلافات وده أمر طبيعي.. لكن معاها احترامات.
فلان: كفاية كفاية.. انت بتكلمني عن مصر والمصريين ولا عن بلد في خيالك لوحدك.
علان: لا باكلمك عن مصر اللي عشنا فيها قدما عشنا وآن الأوان نعرفها صح.. ونحبها صح.. عشان كل واحد فينا مكسور يبقي "واحد صحيح"!!
ابن البلد