خد اللي باقي منك وإمشي ..بقلم : مني الحديدي

ومين فينا ما اخدش قرار أنه يبعد عن حد كان وجوده مهم جدا في حياته ؟
مواقف كتير في حياتنا علي أد مابتكون قاسيه وبتوجع علي أد مابتكون درس وبنستفيد منه وبيكون بمثابة دفعه قويه لحاجات كتير حلوة وأفضل واحسن
أشخاص كتير في حياتنا بتلاقي منهم القريب من فكرك وعقليتك واسلوبك ومبادئك بس المواقف ليها دور كبير في البقاء من عدمه مواقف بنمر بيها مع زميل او صديق او جار او حبيب او حتي العلاقات الاسرية
ساعات بتلاقي نفسك استنفذت كل طاقتك من التحمل والصبر والحرص علي الاحتفاظ بالاشخاص دي في حياتك
بس للاسف فيه مواقف مينفعش فيها اللوم او العتاب أو حتي الكلام مواقف بتخليك تقرر تاخد اللى باقى منك وتمشى بس لما تاخد قرار انك هتمشي أوعى تبص وراك
ساعات كتير البعد مش بيكون وحش بقدر ماهو مؤلم بس بتلاقي نفسك إن فيه ناس في حياتك كان لازم تبعد عنهم من يوم ماعرفتهم سواء صديقك او صاحبك أو زميلك او حبيبك أو غيرهم من الناس اللي ماعرفوش ازاي يحتفظوا بيك ويحتضنوك
لكن خليك واثق إن فيه ناس ربنا بيحطهم في طريقك عشان تتعلم وتكسب خبرة وتعرف تميز بين الناس وتعرف الوحش والحلو تميز بين اللي بيحبك واللي بيكرهك بين اللي بيتمنالك الخير واللي بيتمنالك الشر خليك قوي وماتندمش ابدا علي حد مشي من حياتك ربنا كبير ومش بيبعد حد عنك إلا عشان خير ليك “وعسي ان تكرهوا شىيئا وفيه خيرا لكم ”
وإتعلم دايما إن مش أي أي حد تدخله حياتك ودايما خد بالك من إشارات ربنا ليك عشان يبين ليك حقيقة اللي قدامك لكن انت اللي بتتجاهلها وبتغمي عينك عنها خلي علاقتك قوية بربنا سبحانه وتعالي هيختارلك دايما الصح واللي فيه خير ليك وهتلاقي نفسك بتاخد القرار الصح سواء بالبعد أو البقاء بس وقتها هتكون مرتاح نفسيا
ولما تاخد قرار بالبعد عن حد ابعد وانت متأكد انك مش ظالمه ولا جرحته ولا قللت من شأنه ولو بعدت وانت مظلوم هتكون مرتاح نفسيا حتي لو صعبت عليك نفسك سيبه وامشي من غير خناق ولا عتاب ولا لوم ولا انتقام امشى وانت ساكت وصدقني الزمن هيدور والايام بتعلمنا وبتعلم علينا واكيد هيقابل ناس كتير تانيه وكل حد هيقابله هيختلف معاه فى يوم من الايام ووقت الخلاف بيبان الاصل ومش هيلاقي حد يصون العشرة والعيش والملح زيك وساعتها هيدورعليك مع كل موقف هيحصله هيفتكرك ويقول معملش فيا كده ولا كنت بهون عليه هيلاقي نفسه بيهون علي اي حد وانت الوحيد اللي ماهانش عليك هيحن ليك فى كل مره اتكسر فيها من ناس تانيه وهيتمناك تاني وهيندم انه ماعرفش قيمتك في حياته وماعرفش يحافظ عليك وانت هتكون سعيد جدا وراضى عن نفسك وانت شايف حقك بيجى قدام عينك من غير تعب ولا ارهاق لنفسك ولاعتاب ولا لوم
اكيد طبعا مرحلة البعد دي بتكون قاسيه وحارقه للقلب
وانت بتكون متخيل انها أسوأ مرحلة بتمر بيها في حياتك وانك مش هتقدر تتخطاها وبتحس نفسك ضعيف اوي وقلبك موجوع وبيزف من الألم اللي جواك بس حقيقي المرحلة دي بتكون مرحلة اعادة ترتيب الاشخاص في حياتنا وبتلاقي أقرب حد ليك بيكون أكتر حد بعيد عنك
وأكتر حد كنت بعيد عنه بتلاقيه أكتر حد واقف جنبك
واللي وقفت جنبهم وكنت سند وضهر ليهم استغنوا عنك وباعوك وتلاقي حد لسه داخل حياتك جديد خلاك تحس بقيمتك وقدرك وسعادته بوجودك في حياته
حقيقي احنا دايما بنيجي علي نفسنا علشان غيرنا وللاسف بيوجعونا ويرهقونا ومش بيعرفوا قيمتنا الا لما نسيبهم ونمشي الناس دي حرفيا بتكون اهلكتنا واستهلكتنا واستهلكت طاقتنا واحنا بطيبتنا بنديهم الفرصه
المرحلة دي هتعدي وهتخرج منها أقوى وانت هتتفاجئ من قوتك
حاول تعطي لنفسك حقها انها تحزن وتبكي لازم تخرج اللي جواك وتحس بالراحة والهدؤ النفسي
ودايما تذكر إنك قوى وهم ليسوا بقوتك ولازم تثبت لكل من ادار لك ظهره وتركك انه فشل انه يكسرك
ربنا جنبك دايما وهيوقف في طريقك كل اللي يساندك ويقويك خليك فاكر انك دايما معاك ربنا ” فإني قريب صدق الله العظيم “