اليوجا والميديتيشن.. اسلوب حياه مقابلة مع علي الألفي (Yogi Ali)

"الميديتيشن لازم يكون أسلوب حياه.. الدقايق اللي بتقضيها في الصلاه والتسبيح لو قضيتها بروحك وقلبك، ممكن تكفيك وتغنيك عن احتياجك للسفر.. احنا بنسافر احيانا علشان نهرب من روتين يومي ومن ضغوط ونرجع بعد كده لنفس الحياه، لكن لو اتعلمنا اننا نخلي الميديتيشن اسلوب حياه هنقدر نتسق مع روحنا ونوصل لها اكتر ونحصل على سلامنا الداخلي".. ده كان كلام علي الألفي أو Yogi Aliزي ما هو معروف كمدرب لليوجا والميديتيشن اللي عرفنا في المقابلة على تفاصيل كتير وجاوب على اسئلة كتير مهمة.

الميديتيشن بيخليك تشوف الحاجات زي ما هي مش انعكاس للي جواك
نفسية الإنسان بتأثر على استقباله لنفس المشهد. ممكن اتنين يبصوا على منظر النيل، واحد يقول إيه القذاره اللي حواليه دي، وواحد يقول الله .. حياه. الميديتيشن بيساعدنا نشوف الحاجه زي ما هي من غير ما نعكس عليها اللي جوانا.

اليوجا الأول ولا الميديتيشن؟
التأمل meditation شيء صعب، إحنا متعودين نشتغل، نجاهد طول الوقت لكن مش بندي نفسنا فرصة للتأمل. اليوجا من الحاجات اللي بتساعد على التأمل، بتقوي الجسم، وتديه ليونه، وبتعلم الواحد يكون على وعي بنفسه وبجسمه، وبتعلمه يقدَّر نفسه، فبيكون قادر أنه يقعد هادي ويتأمل.

بس حاسبي!! اليوجا من غير (النيه) بتنفخ الأنا
اليوجا بتحسسك بنفسك أحسن وبجسمك، لإنك بتلاقي جسمك مرن أكتر وبتوعى بأكلك وصحتك، فبتزود من ثقتك بنفسك. التأمل meditation بيقلل من ذاتك في مقابل الكون والخالق بالتأكيد. معلمي الهندي بيقول "اليوجا من غير النيه بتنفخ النفس (الأنا). فاليوجا تمرين أو تكنيك بيساعد الواحد على الميديتيشن.

اليوجا رياضه بدنيه وروحيه
الناس اللي بتيجي مختلفين عن بعض حتى في استقبالهم. فيه ناس جايه تخس، فيه ناس جايه عشان تقرب من ربنا، فيه ناس بتستكشف وحاسه بحاجه بتخليها عاوزه تجرب.
كمان استجابتهم مختلفة: فيه ناس راح منها الخجل الزايد وبقت تتكلم بشكل مباشر أكتر، فيه ناس اتعلموا يقعدوا بشكل أحسن وواعيين لحركة جسمهم. فيه ناس فيه اصوات جواها بتقولها مش هتقدر تعمل حاجه معينه، لكن ما استسلمتش وجربت تاني ونجحت، ده بيخليها تشوف قدرات جواها.
الرياضه فيها تنافس لكن اليوجا بتمارس فيها تقوية جسمك بغرض أكبر من كده، بغرض إني أنمي عقلي وروحي، الجسم أداه فيها مش هو الأساس. اليوجا ممارسه روحانيه، بنقرب فيها من ربنا.

من مونتريال للهند لمصر رحلة تأمل واكتشاف للذات
"ابتديت يوجا في الجيم في مونتريال في كندا من باب الاستكشاف وهي اللي أدت إلى التأمل. من يومها حصل لي تغيير كبير في حياتي. أول حاجه حصلت؛ إني ابتديت أكون على وعي بالحاجات اللي باكلها واختار الصحي أكتر فخسيت."

الهند تجربة لا تنسى ومرحله شكِّلِت حياتي
"سافرت مع إبن عمي الهند، كرحلة زي أي حد بيسافر علشان يهرب من كل حاجه. تاني يوم لقينا نفسنا في مدرسة يوجا، عباره عن مجتمع كامل الواحد فيها بيساعد في المطبخ أو أي أعمال تانيه، كل واحد له دور بياخد باله من المجتمع ده.
هنا برضو كنت واصل للمكان من غير نيه، لكن من أول يوم حسيت روح المكان وحسيت إن فيه حاجه ليا. أكلت الأكل بتاعهم: نباتي ومن غير بصل ولا توم ولا سكر كتير ولا ملح تقريبا ولا شطه. عشت حياتهم: بنصحى الصبح الساعه 5 ونعمل يوجا من 6 ل 8، نفطر في صمت، مفيش كلام من 9 بالليل ل 9 الصبح.

تأمل مش عبادة نار
كل يوم بيكون فيه طقس بالليل، بنقعد حوالين النار وبيكون فيه كل عناصر الطبيعه: الأرض، النار، الهواء، الماء، وبيتكرر فيه كلام زي الأدعية فيه جرعة روحانية. اللي يبص للطقس ده من بعيد يقول دول بيعبدوا النار، وانا كنت بفكر كده برضو في الأول لما سمعت عنهم.

الروح هي كل حاجه بس احنا مشغولين بالعقل اكتر
باقي اليوم فيه وقت فراغ كتير، بنروح نسمع مدرسين بيتكلموا عن فلسفة اليوجا. روحت عملت ميديتاشين بأشكال مختلفة فيها في الأول صريخ وزعيق وبعدها ميديتيشن هادي، هنا حسيت بحاجه تانيه وعيت بيها (الروح وربنا)، حسيت بنور وحالة مش ممكن حد يعرف يعبر عنها بكلام. سألت المدرس ازاي افضل هناك قالي: "قدَّر كل حاجه حواليك". إحنا بنفكر (نستخدم عقلنا) أكتر ما بنحس (نستخدم روحنا).

اعملي ثوره على نفسك وانتِ تغيَّري اللي حواليكِ
لقيت اللي كنت بدور عليه واللي عاوز ارجع اعمله هنا في مصر. اما فكرت ان الواحد ممكن يكون نيته كويسه وعاوز يغير من اللي حواليه وياخد منصب ويجتهد يغير من المكان ده للأحسن ده جميل، لكن الأفضل إنه يعمل ثورة على نفسه ويكون هو أحسن فيغير اللي حواليه بشكل تلقائي من غيرما يجبرهم. أما يشوفوا حاجه نافعه يمكن يطبقوها على نفسهم. قررت آخد كورس تدريس اليوجا في الهند وأرجع أعلم الناس يوجا وميديتيشن.

ليه بتروح الهند كل فتره؟
في الهند بكون في مجتمع كله بيعمل يوجا فبيكون اسهل إني اتواصل واني ما افصلش من نفسي. كمان الواحد أما بيسافر بيكون شخص جميل متسق مع نفسه وسايب كل مسؤلياته وانشغالاته وروتينه اليومي. فبيكون فيه مساحه لنفسك وفكرك.
برجع كل فتره اتعلم اكتر واجدد من روحي. المدرس دايما جواه طالب عاوز يتعلم. كل ما اتعلم احس ان جوايا اكتر وعاوز أعرف اكتر.

صوفي يوجا
قريت كتاب شعر للرومي لقيت روحي واخداني اني اعرف اكتر عن الصوفيه اللي ما كنتش اعرف عنها حاجه. بعد وقت كتير درست فيه عن الصوفيه وحضرت حلقات للذكر، اتولدت جوايا فكرة الصوفي يوجا وده لإن الميديتيشن واليوجا والصوفيه طقوس روحانيه بالأساس.



تواصلي مع نفسك وروحك باليوجا والميديتيشن
"بعد اليوجا والميديتيشن بقيت واعي بروحي وإن حالتي النفسيه مش مرتبطه بحد، لو صحيت يوم متضايق وغضبان، بعرف إن ده وقت وهيعدي، ولو قابلت ناس واتبسطت معاهم مش برمي كل الانبساط عليهم لكن بكون عارف اني جزء منه. بقى فيه اتساق بيني وبين نفسي وروحي وقل انشغالي بالافكار والارتباطات، بقيت اشوف الحاجات وكإني ببص على نفسي من فوق، ما بخليش الحاجات تسيرني. الوعي بالروح أهم."

ممارسة اليوجا والميديتيشن لوقت أطول بتخليكي توصلي لنوع من التواصل مع وعيك وروحك. مثلا: لما حد بيحاول يمارس عليكي أي تأثيرات زي إنه يحسسك بالذنب مثلا إنتِ بتكوني على وعي أكتر وما بتسيبيش نفسك لأي مؤثر خارجي. وأما بيكون فيه موقف صعب بيمر بيكِ وتقفي تفكري فيه ما تخليهوش ياخدك معاه في موجة حزن، بتقفي وتقولي أنا هنا والموقف هيعدي. كل ما بقيتي أكثر اتساقا مع روحك ووعيك كل ما قدرتي تحققي ده أكتر وده بيتحقق بممارسة الميديتيشن (التأمل) لوقت أطول.

محتاجه إيه علشان تبدأي؟
فيه ناس فاكره انها لازم تروح تتمرن شويه أو تعمل دايت وتيجي علشان تقدر تمارس يوجا مع إن هو ده اللي بتعمله فيكِ اليوجا، بتوصلي بالجسم إنه يكون مرن أكتر. بنوصل للي احنا عاوزينه بالنيه، لكن لما تقعد تأجل اللي إنت عاوز تعمله ده مش هتوصله.

هقول لكل أنثى زي ما معلمي قال لي أول مره:
"Respect, appreciate, be proud of yourself and love yourself"
"احترمي وقدَّري وخليكي فخوره بنفسك وحبي نفسك ". استثمري في نفسك كل يوم. أنا لقيت نفسي مع اليوجا والميديتيشن بس ده مش معناه ان كلنا هنكون كده أو إن دي السكه الوحيده عاشان تلاقي نفسك. أكيد إحنا محتاجين حاجات كتير، وكل واحد بيدور وبيجرب مع نفسه لحد ما يعرف ويوصل للحاجه اللي عاوزها وتحقق له السعاده. اكتر حاجه الواحد بيخاف منها هي الوحده مع إن في الوحده بتلاقي نفسك وبتبدع وتطلع اللي جواك. فيه ناس بترسم، فيه ناس بتكتب شعر، فيه ناس بتلعب يوجا، وناس بتغني، وناس بتطبخ. دوَّر على الكنز جواك.