فى موتى شهادة

انا اللى جيت بشهادة -- وقلت الشهادة -- واتمنى الشهادة -- وفى موتى شهادة
انا اللى مكتوب فى الورق -- وانا اللى بمتحن ع الورق -- ويقولوا بالورق انا اسمى ايه
انا اللى مخلوق انسان -- انا اللى مطحون نسيان -- ولسه فى كمان جواكى يا سنينى
انا اللى جيت وانا ببكى ليهم وقافل ادية -- انا اللى هسبهم وفاتح ايدى وهما بيبكوا علية
انا اللى استقبلونى بالفرحة والزغروتة والسبوع -- انا اللى هبقى الذكرى بالحزن والدموع
انا اللى بقفل علية بابى -- انا اللى عارف رقم حسابى -- وحساب الاخرة مخوفنى
انا اللى عدى العمر منى-- انا اللى كنت العب واغنى -- وهيجى يوم الاعتزال
انا اللى يا ما زى كتير -- انا اللى فى القطر مستنى انزل فين -- ومش شايف م اللى قدامى
انا لا الاول ولا الاخير -- انا اللى اهله فاتوة بخير-- والخير هيفوته لاولاده
انا اللى عاش يا ما عاش -- انا اللى هيروح كانه مجاش -- ولقب المرحوم مستنينى
انا اللى الحيرة تعبانى -- انا اللى قلت م الفراق اه يانى -- ورايح مع الرايحين
انا اللى اذنوا فى ودنى ومصلوش -- انا اللى هيصلوا علية مياذنوش -- ونازل مش طالع
انا اللى فى الارض تنتهى قصتى -- انا اللى بدعى ربنا يقبل توبتى -- وفى القبر مع اعمالى
انا اللى دموعى على خدى -- انا اللى فى الخير بسعى على ادى -- والحمد لله رب العالمين