اعتذار لمصر

بقلم كارم عمران
كل واحد فينا مدين بالاعتذار لمصر ... من اصغر واحد فيها ... لأكبر واحد فيها ... غلطنا كتير فى حقها ... واكتر ناس لازم تعتذر لمصر ... هما الجيل السابق ... ابائنا وامهاتنا ... لانهم مقدروش يطالبوا بحقوقهم ... وربونا على الخوف والقلق واننا نمشى جنب الحيط ... واحنا فضلنا طول عمرنا بنسمع كلامهم وخايفين ... لحد ما بقى يتقال علينا ... شباب الفيس بوك . والانترنت . شباب فاضى . يأس من حياته . معندوش القدرة على انه يفكر ليوم جديد جى فى حياته . مش لسنين ...دى كانت الصورة اللى متخدة عن شباب مصر ... بس الشباب ده اول من اعتذر لمصر وبشكل عملى ... لما خرج يوم 25 يناير وطالب بحريته وبالعدالة الاجتماعية وبتغير حياته للافضل ... وقتها قال لمصر لسا ولادك بخير ... لسا فيك رجالة بتحبك وتخاف عليكى ... وبتعتذرلك على اللى فات كله ... بس لازم الاعتذار ده يكمل بتطوير مصر فعلا وبشكل ايجابى .. وكل واحد يقوم بدوره . ويخاف على مصر بجد من اى خطر يقرب ليها وخصوصا فى الوقت الحالى . لان فى ناس كتير ممكن تستغل الظروف دى فى اللى يضر بمصر . لازم نبقى واخدين بالنا كويس اوى .
اما ابائنا وامهاتنا ... فأعتذرهم يكون بدعمهم لولادهم .. وتقوية روح الشجاعة جواهم . مش التقليل منهم .. والوقوف جمبهم ومساندتهم ...والفخر بيهم وباللى عملوه وحققوه ولسا هيعملوه .
اما رجال الدولة والمسئولين .. فأعتذارهم يكون بالسماع للشباب وتنفيذ مطالبهم المشروعة .. وتطوير مصر فى كل الجوانب من اقتصادية وسياسية واجتماعية .. وقبل كل ده ان يحاكموا كل من كان سبب فى قتل الشهداء فى هذه الثورة وكان سبب فى الفوضى وعدم الامان وتأمر على مصر .. وده اقل اعتذار منا لمصر .
وانا بعتذرلك يامصر .. اسف يا ام الدنيا