البلا دية

انا مش جاهل او معرفش استهجى الحروف اه والنعمة بتكلم عن جد "باللبنانى" انا عارف انها البلدية بس اي كلمة لازم تظهر معناها والكلمة دى بقا بالذات علي عدلها مش ظاهرة لمعناها وعشان كده سميتها بالمعنى البلا دية او هي
المهم نعرف فين البلا كل يوم اقوم حوالي الساعة اتناشر الظهر علي ميعاد شغلي بقوم مستعجل جدا رغم ان كل اللي في البيت بيعدوا عليا زيزو زيزو زيزوووووووووووووووووووووووووو قوم بقا وانا اول حاجة بعملها اما اقوم من النوم اوجه اللوم كل اللي في البيت محدش صحانى ليييييييييييه..
المهم باخد الدش التمام البس انزل مش بلحق افطر او مش بحب افطر لان فطاري مختلف جدا باخد العربية رايح الشغل في عربية موز كده بتاعة واحد صعيدى كل يوم بعدى عليه ومع الوقت بقيت بكتفي انى اقف قصاده بس
وهو يجيب الكيلو وياخد الخمسة جنيه معتش بيحصل اي نوع من انواع الحوار بينا...وفي يوم كان مختلف نزلت ابص علي بتاع الموز ملقتوش ولا هو ولا عربيته اصابتنى حيرة ياتري هو ورث؟؟
ولا هو لقا مكان تاني احسن يقف فيه؟؟
ولا ايه الحكاية..
فضلت يومين علي لحم بطنى والحمد لله ما اتجهتش للفول السودانى ولا لتسلق الشجر بس اختارت انى اصبر جايز راح بلدهم اجازة..
.في اليوم التالت خلاص معتش قادر و قررت انزل من العربية ابص يمين وشمال جايز واقف في حته ضلة مع ان الحتة اللي كان فيها مبتطلعش عليها شمس بصيت يمين ملقتش عربية الفول ولا بياع العيش ملقتش اي حد من الناس اللي بتبيع قولت ممكن عاملين اضراب؟؟
دخلت السوبر ماركت المجاور سلام عليكم اومال فين بتاع الموز...رد عليا بطريقة كلها حزن اوحتلي انه كان عليه تار ومات او انه تعبان في مستشفي ومحتاج للسؤال...وفجأة قطع صاحب الماركت حبل افكاري وقالي منهم لله مسبوش اي حد ف حاله...
حتي بتاع العيش اخدو عربيته وحتي... وحتي..
.ابص يمين شمال الحياة ماشية والدنيا زحمة اهى وكلهم مصرين والله اصل من فترة ماشوفتش جرايد ولا لقيت دبابات ولا مدرعات في الشوارع قولتله بتتكلم عن مين ياعم.
.قالي البلدية
وهنا قلبي اطمن شوية منا فينا يعنى طيب.
..قررت انسي الموضوع واتجه لشغلي اللي اتاخرت عليه ساعة كاملة نصها في النوم ونصها في الموز ومكنتش اعرف ان في ساعة تانية هطير لما شوفت بعينى بياعين كتير فارشين في الارض بيلموا الحاجة بسرعة بسرعة وطالعين يجروا وكأن الطوفان وراهم وعربيات نقل وحكومة وطخ طيخ واضرب وعبي الحاجة ولحقوا اللي لحقوه واخدو اللي اخدوه ومفضلش لعينى الا شارع خربان بواقي حاجات متكسرة وناس ماشية تتحسبن..
بياعين وعاملين اشغال طريق او يمكن شكلهم مش حضاري اصل بالصلاة ع النبي بلدنا كل حته فيها بتشع حضارة حتى مواسير المجاري
انتهى الموقف لانى جريت علي شغلي
بس منتهاش تفكيري!
عربية بلدية وناس بتعبي حاجات الغلابة يعنى جاز للعربيات ومرتبات للي بيشيلوا وتضيع وقت البلدية ودى مشكلة بقالها كتير اوى طيب..
السؤال بقا ليه ميخصصوش اماكن للبياعين دول بالاجرة ويبقي زى سوق كده تخصيص ها مش خصخصة
اصل اكبر بياع من الناس دول
راس ماله في الحياة شوية الحاجات اللي معاه يعنى سعي وطعن البطالة وحاول يجيب قرش حلال نضربه نهينه ناخد فلوسه...؟!
عمر ما في مشكلة بتتحل بالعنف والتخويف وعلي راي المثل "ان حبيت تشيل هات البديل" خصصلهم مكان امنحهم فرصة عمل من غير مطاردات ولا اهانات ولا حد يتحسبن عليكم ولا حد يكرهكم
عايزين كلنا نعمل لمصلحة تراب البلد دي مش كل واحد يفرض سيطرته علي غيره لمجرد مكانته وسلطته وناسي ان الاقوى فيه الاقوى منه..