أنا صحفي و الصحاف كثير

بقلم د.رؤوف رشدى
الطريق الى النجاح
سلسلة تحقيقات احدثت دويا لدى كاتبها فقط
ملخص ما لم ينشر
كصحفي تحت التمرين ، كلفني السيد / رئيس مجلس ادارة المجلة, بكتابة سلسلة تحقيقات عن النماذج الناجحة في المجتمع. وربما ان سيادته لم يتفضل بتحديد معايير ذلك النجاح ، فقط تجاسرت و سألت رئيس التحرير ، الذي أحالني الى مدير التحرير ، الذي أحالني الى زميل قديم ، أحالني بدوره الى عم عبده بتاع البوفيه لأنه ( أقدم واحد وعارف كل حاجة ).. وأجابني عم عبده بثقه " ناجح يعني مريش " ثم أردف بمودة : أنت باين عليك جديد هنا... لو عوزت حاجة فى أى وقت ... تعال ...
أنا صحفي و الصحاف كثير
فى الموعد المحدد دخلت مكتب الأستاذ الكبير "طالع واكل ". وهو صحفي ناجح بمقياس عم عبده . وأغلقت سكرتيرته الجميلة الباب خلفي بينما كان يتحدث تلفونيا :
- إيه ؟!...صحافة إيه اللى عايزين يخصخصوها ؟! لالالا... مستحيل ... أيوه ... ... صحيح احنا كل يوم بنكتب عن الخصخصة و بنادى بيها بس الكلام ده عن القطاع العام وكده ... إنما الصحافة ؟! واحنا نروح فين لما يخصخصوها ؟! ... ده كلام ؟! ... هو اللى بنعمله فى الناس حيطلع على جتتنا ولاأيه ؟! ... (ألتفت فرآنى ) طب يا عزيزى حاكلمك تانى ... (كنت لاأزال واقفا )
- أيوه يا ابنى انت جاى من طرف مين ؟ّ!
= سيادتك أنا صحفي تحت التمرين باعمل ريبورتاج عن النماذج الناجحة فى ال ...
- طيب طيب ...اتفضل...
- تررن تررن (التليفون)
- آلو ...صباح الفل يا ست الكل ... إزيك إنت وازى فنك ... الباسبور الجديد وصل مش كده ... يا ستو العفو ... ... بتقولى مطلوب إيه ...
آه ... موافقة الآ داب علشان السفر ... سهلة ... على فين المرة دى ... يا ستو أشكرك على كل اللى حاتجيبيه ... مقبول .. أوكى ... سى يو ...
التفت إلى ...
- أيوه يا ابنى بتقول ريبورتاج عن النماذج النا ...
تررن تررن (تليفون )
- ألو ... إنت لسه فى الأرشيف يا أحمد ؟! بسرعة اتصرف واختار أى ثلاثين أربعين مقالة قديمة لى علشان حانشرها تانى ... يا أخى ما تخافش الناس مش حيفتكروا ... هو حد بيقرأ ... خد بالك ما يكونش لهم علاقة بأحداث جارية ... سلام ...
(ألتفت إلى وهو يطلب رقما )
- أيوه يا ابنى بتقول ريبورتاج عن النما...
آلو ... صباح شريف يا سعادة الباشا ... أظن بقى أنا نشرت لسيادتك الواقعة بأسلوب ميه ميه ... وصورتك كانت تجنن ... ... و الله عايزين موافقة صغيرة من الآداب ... آه فنانة ... يا سيدى تشكر ... ما عندكش بقى أخبار جديدة ... بتقول مين ؟! الشيخ "دافع جامد " وصل النهارده ... هو ده الخبر ... سلام يا باشا ...
(ألتفت إلى من جديد وهو يطلب رقما جديدا وقال )
- أيوه يا ابنى بتقول ريبورتا ...
- آلو ...إزيك يا سعيد ... خبر سقع ... الشيخ "دافع جامد " وصل النهارده .. جرى عل الأوتيل يا عم ،إلحق إعمل لك إعلانين تلاتة ...علشان تعرف بس إنى أصيل ... أى خدمة ...
(نظر إلى طويلا بدون كلام ثم طلب رقما جديدا )
آلو إدينى غرفة سعادة الشيخ " دافع جامد " ... السلام عليكم ... حمدا للة بالسلامة ... وازى صحة سعادته ... شوف ... فيه صحفي اسمه سعيد جاى دلوقت الأوتيل يتجسس على سعادته علشان ينشر أشياء لا تليق ... إنت فاهم طبعا ... أشكرك ... ... أيوه علشان سعادته يعرف مين معاه ومين ضده ... وعليكم السلام .
(ألتفت إلى فوقفت و قلت بإصرار وبسرعة شديدة قبل أن يرن التليفون )
- سيادتك أنا صحفي تحت التمرين ... ترررن ترررن (لم أهتم وظللت أتكلم ) ... وجاى تررن ...علشان ترررن ... أعمل ترررن ريبورتاج ترررن عن النماذج ال ترررن!!