الشاعر زغلول الطواب يكتب باللهجه الصعيدى : حكايه ملهاش نهايه

عندينا فى الصعيد
جلب الراجل حديد
الدم ف عروجه حامى
والطبع جواه مولع نار
ممكن بسبب كلمه غلط
أو مين إللى هيسجى أرضه جبل التانى
أو بسبب تحريك فى الغيط بطال
والبطال حدانا هو الفاصل بين الأرض والأرض
وممكن عيل يهين راجل
تجيد الدنيا وتولع النار
تبجى عيطه كبيره
توجف الشومه فيها جبل العصايه
وإللى معاه بندجه وضرب بيها طلجه
تطلع كل البنادج والرشاشات والمدافع
والضرب يبجى فى المليان
السما تبجى ضباب
من عفار التراب ومن دخان ضرب النار
يوجع واحد وإتنين وعشره وميه
بسبب كلمه هايفه تخرب الديار
وتجيد بين العيلتين النار
بسبب العند
ده يشد وده يشد
وتبقى الدنيا دمار
الكل راكب راسه
مش هامه إللى هيتجتل من ناسه
أصله خايف يا ولداه من العار
عليه العوض فى العيلتين
هيخلصوا على بعض
واحد ورا واحد راجل جبال راجل
عيل جوصاد عيل
يا ناس كفايه
إرحموا جلوب الصغار
أسكت لسه منتهاش التار
والله لو مبجاش فاضل غير الحريم
ولا ف يوم يجول علينا دول حريم
يكشى الدنيا تخرب
وما يبجى فيها عمار
الأرض تبور مش حكايه
البهايم تغور برضه مش حكايه
العيال تتيتم وإيه يعنى
بكره يكبروا يبجوا رجاله
يا ناس الدم ف العروج عيغلى
جايد جوايا وعيلسوعنى
متجولش عليه دم
إللى عيجرى ف عروجى مش دم
لا يا مايه دى مية نار
كيف أسيب تارى
وإللى إتجتل واد عمى
وأبويا وأبوه وجدى
وواد خالى وواد خالتى
لو مبجاش ف العيله غيرى
مش هسيب ف يوم حجى
وآخد بيدى يا مايا تارى وتارهم
ولا يركبنى ف يوم العار
مش عيجولوا العين بالعين
والسن بالسن والبادى أظلم
طيب أمال أيه الحكايه
مين فينا إللى إبتدى وجاد النار
ومين إللى أبتدى الحكايه
عيب والله يا مايه
ولدك يلبس طرحه
وهمه يلبسوا ويتعايجوا بالعبايه
أشوفهم كيف ماشيين على الأرض
كيف لما يدج الطبل
يتعربنوا ويرجصوا بالعصايه
الناس يجولوا عليا أيه
جاعد وسط الحريم ليه
لو كنت أخدت بتارك
كنت لما يدج الطبل
بأديا كنت رجصت العصايه
كيف أعيش وعلى الأرض أمشى
وأملى بطنى بالعيش وأشبع
يا مايه ولدك مخاصم النوم
وعنيه معترمشى
كيف أعيش
ويبجالى ف الدنيا عيش تانى
ويشاورا عليا الناس ويجولوا
جبان خواف وجليل الربايه
لا يا مايه
كده متنفعش الحكايه
والله ف سماه
ما تبرد نارى ولا بال يهدالى
غير لما آخد حجى
وأغسل بأديا عارى
وآخد من إللى جتل الرجاله تارى
هولعها نار ماهى كده كده خربانه
الحكايه
مفيش فايد فيك يا ولدى
بايع نقسك وحارج عليك جلبى
ربنا يهديك
وترجع عن إللى ف راسك
عود لرشدك وإرسى وفكر بعجلك
ومتودرش وراك ناسك
راح إللى راح
أبوك وعمك وجدك
وواد عمك وواد خالك
وواد خالتك
باجى مين غيرك يا حزين
يا واكل بالعند ناسك
رايح للموت بنبوت
هيجتلوك يا فجرى
هيطخوك بالنار
جبل ما توصل بالنبوت يا ولدى
مجفل راسك ليه
هاين عليك شبابك
هو إنت أشطر من أبوك وعمك
ومن كل إللى راحو جبلك
ليه عايز تطفى بعندك
آخر شمعه ف العيله بأديك
ليه عايز تضلمها وتسودها
وتمرر حنكى عليك يا ولدى
والله حرام عليك
تموتنى بالحسره يا ولدى
كفايه دمار
كفايه حرج بالنار
خربت الدنيا وإتخرب دارك
الغيطان بارت
البهايم من الجوع ماتت
وأديك بعنيك شايف
حتى اللجمه الحاف
مخاصمه الشفايف
أرفعلك توبى
وتشوف الحجر إللى ربطاه
على بطنى ساده بيه جوعى
حتى نيرخ النخل
كله الطير إللى طاير
حتى الميه ف الزير نشفت
مفاضلشى غير الغربان
عتحوم حوالينا ف كل مكان
والجوج عيجوج حوالينا
والخراب فوجينا وتحتينا
إستهدى بالله يا ولدى
وإخزى الشيطان وإنسى التار
خدنا أيه من وراه
غير الحزن والمرار
وموت الرجاله وخراب الديار
إرحمنى يا ولدى
يا حزنى عليك بدرى
يا مرارى يا حرجة جلبى
إرحمينى إنتى يا أمايه
و بطلى تعديد ليل ونهار كفايه
عايزانى أجعد جنبك
هاتيلى طرحه من عندك
وغيرى إسمى
وإحلجيلى شنبى
وسمينى شلبايه
لو ده يرضيكى يا أمايه
هاتى توب من إتوابك
وغطى راسى بالبرده من عندك
وخبينى من عيون الناس يا مايه
وإللى يسألك عليا
جوليلهم مات من شويه
ولو جالولك مين إللى جاعده جارك
جوليلهم بتى شلبايه
يمكن يجينى عريس
يكون راجل
مالهوش أم تخاف عليه
وشنبه فوج حنكه
يوجف الصجر عليه
ولا يتهزش
والبندجه فوج كتفه
متجله جلبه معيفطش
عارفه ليه يا أمايه
علشان أمه
كانت عايزاه يكون راجل
لا يتعاير ولا يدارى وشه
ولا فيه نديد يهزه
علشان راجل
خايفه عليا من الموت
مخلاص وجع النبوت
ومات فيا الراجل
دا لو طخوا كلب
برصاصه طلعت كدب
النار تجيد ف الجلب
وعياخده جوصاده ميت كلب
إشحال إللى راحوا رجاله
والله ف سماه لو هموت
من غير ما أجول آه
ولو كنت عضمه ف جوفه
وماسك ف إيدى جشايه
لاخد بتارى
من إللى جادوا فى جلبى نارى
أنى جولتها كلمه
ومش عايز أسمع بعديها كلمه
كفايه يا أمايه
وعمره التار ما كان له نهايه
ودى بداية الحكايه
ف كل بلد تار
وناس بتتعاير
وخراب ودمار
ونار يتاكل الرجاله
المخ مجفل والعند مسيطر
وملهاش نهايه الحكايه