يوميات أم مفروسه / الحلقة الرابعة عشر / الجزء الثاني ...أنا عاوزة أتجوز / بقلم رانا هاشم

قوليلي أنت ِثورة أزاي وأنا أخويا اللي هو من لحمي و دمي بدأ يكفرني و
يقولي ألبسي ما تلبسيش وماشي مع الهوجة أحنا هنقرع على بعض ما كلنا بنصلي
و بنصوم و عارفين ربنا من غير أحزاب ولا شللية حاملين رايات الدين اللي
بيقولولنا أعملوا ومتعملوش كل يوم بقضية و بفيلم و بافعال فاضحة و يا
سبحان الله متلفقة كلها شفتي أنيل من كده الاتنين في فعل فاضح في الطريق
العام ودقنه يقش بيها شارع جامعة الدول يقبضوا على البت و يسيبوا حضرته
علشان الحصانة البرلمانية شالله يا حصانة
و يا ترى عنده حصانة ربانية كمان من المسخرة ؟؟
طيب الاعلام تناول الموضوع أزاي علشان ما نظلمش عاوز يجيب حق البت رغم
فعل الأثم معاها , كل يوم أسمها بالبنط العريض و بلدها فين وكانت عند مين
أيه يا جماعة الخير ما براحة شوية ما سمعتوش عن حاجة بتقول
من ستر عورة مسلم في الدنيا ستر الله عورته في الاخرة
طيب مسمعوش قول الله تعالى في أيه النور :-
إن الذين يحبون أن تشيع الفاحشة في الذين أمنوا لهم عذاب أليم في الدنيا
و الأخرة و الله يعلم و أنتم لا تعلمون
في الاخر البنت أتفضحت ده ربنا غفور بيرحم أحنا مش هنرحم و ده ليه لانها
ست وهو زمانه متلقح ومتحصن مع حد جديد بس واخد باله المرة دي
محدش رفض شرع الله في الحكم, محدش يكره دينه.. و سيبكم من سخافات ومقولات
دول هيخلونا افغانستان دول هيحجبونا دول هيخلونا قطعان غنم عاملين زي
اللي سابو الحمار ومسكوا في البردعة
مبصوش أن أساساً الحكم الديني في بلد زي مصر ومع جماعة زي الأخوان
المسلمين وموقفهم من المرأة ووعودهم على مر السنين هي هي.. مشكلتهم إن
كلامهم واحد مبيتغيرش مبيحاولوش يجددوا أو بمعنى أصح مساحة من الثقة
المتبادلة بينه و بين شعب أتربى وأتعلم أغلبه على أنهم حزب مخيف و هيدمر
حاجات كتير ..
ثقة و وعد أن هما قد التغيير و يستحقوا ده و رغم كده ورغم فرحي الشديد
بأني مكنتش فلول لأنها وصمة عار على كل واحد أنتخب الرموز القديمة ومحدش
يقولي كل واحد حر في فرق كبير بين الحرية و الاستهانه بدم أستباح في
بلادنا دم ولادنا و أتحدى أي واحد أنتخب الرموز القديمة أنه بيحس أو
بيشعر ..
بالك كان هيحس إمتى لو أبنه ولا إبنها جاي بقطع ذبحي زي اللى حصل فى ولاد
الالتراس ولا برصاصة مباشرة في الرأس زي قناصة أمن الدولة كان ساعتها
يعرفوا ان الله حق
واللي انتخب الاخوان حاسس أن كده الدنيا خلاص هتمشي صح بغض النظر عن رفض
قطاع عريض من الشعب ليهم..
بيتكلموا الجهلة على انهم هيدفنوا الممثلين والرقاصات وغالبية الفنانين
بيلطموا بنفس الشكل و ربنا شوية متخلفين كل واحد ماسك في منطقة هبلة
وسايبين الاساس
هما هيقدروا ينهضوا صحيح بالبلد هيقدروا نعدي لبر الامان محدش رافض
التغيير ولا انا ضدهم و خلاص بس أديني الامان وحمايتي و كفكف دموع
الاهالى على ولادهم , سكن الشباب وشغلهم رجع عباقرة البلد شجع الفن
الراقي أنهض بجامعاتك أمنع سيل الفتاوي الحقيرة من منتفعين الدين إقفل
القنوات اللي طول الوقت بتتكلم عن قال الله وقال الرسول و النيوزر بار
تحت مبيذعش إلا إعلانات الفياجرا وست تلاتينية عاوزة تتجوز جواز المسيار
وخلي دول على جنب و تعالى بئا لأشباه المثقفين المتحولون بدون ذكر أسامي
عيشي ياما ...
النهاردة في مظاهرت الرئيس المخلوع هو هواه بكرة في لا للرموز السابقة
وبقدرة قادر معارض وأخيراً فلول مرة أخرى يخربيتهم الناس دي مبتحسش
والمشكلة إنهم مطبلاتية ناقص يمسكوا صاجات يالا علشان الشعب يتكيف
و تقوليلي عيب و ما يصحش ..كل حاجة تقرف و أساساً مشروع الجواز ده فاشل
والرجالة كلهم عاوزين يتحطوا في ميدان عام ويتولع فيهم بسبب أنانيتهم
المفرطة مع أن الست في كل كتاب وكل ملة متكرمة
و رغم كده بردو عاوزة أتجوز مش عاوزة أتعرض لكلام الناس السخيف والمؤذي
معنديش إستعداد أعيش في مجتمع متخلف ناقصني حاجة زي دي
أنا عاوزة أتجوز
مش حاجة تفرس ??