يوميات أم مفروسه / الحلقة الثالثة عشر / الجزء الأول ....ما هو أنا لازم أتجوز / بقلم رنا هاشم

ماما
نعم
أنا عاوزة أتجوز
حد يجيب كوباية ميه شرقت
بسم الله الرحمن الرحيم مالك يختي سخنة ولا حاجة
لا يا ماما انا مش عيانة أنا في كامل قوايا العقليه وعاوزة أتجوز
صراحة ومن الأخر معنديش إستعداد أبئا عانس
طيب أرد عليكي بنية إنك بنت مثقفة ومهندسة قد الدنيا على اعتبار ما سيكون
إن شاء الله ولا بنت مبتفهمش ؟؟
ردي باللي أنت عاوزاه
أولا يا بنتي الدنيا مطارتش
ثانيا ده نصيب
ثالثا مش أحنا اللي بنشد العريس من قفاه يجي يتجوز ده بيجي على أعتبارات
كتير أدبك ثقافتك أخلاقك عيلتك
القصد من ده هيحصل أمتى
مالوش توقيت
ده بئا الغلط يا حاجة
يعني أيه
أقصد لو أنا أستنيت اللي بتقولي عليه ده تقريباً هتخطب و أنا 45 سنة و
غالبا هيكون أرمل عاوزني أربي ولاده أو عازب أفتكر فجأة أنه متجوزش
ومحتاج ونس في البيت زي العصافير كده حاجة تعمل دوشة وخلاص
أو راجل كبير عامل فيه شون كونري وهو أخره وحياتك
عبد الفتاح القصري أول ما يغسل وشه الصبح
خبر أسود أيه اللي بتقوليه ده يا بنت
بقولك الحقيقة أفتحي شباكك وبصي على منى جارتنا
قمر دكتورة قد الدنيا جاه ومال و جمال و ثقافة معيدة في الكليه
مشهورة في الجامعة أنها ند لزمايلها و طبيعة الراجل اللطيفة ماشية بمنطق
أحب أه بس تبئا أحس منى لا لا لا باللي في رجلي
ومن ناحية تانية نظرات الناس متجوزتش وعندها ده كله ؟؟ يبئا فيها حاجة
أستغفر الله أدي أخرة التعليم و الهم مش جايب الا الفضايح .. وعيشي يا
حاجة انتِ مبتسمعيش اللي بسمعه رغم ان منى دي بخمسين راجل من عينة رجالة
اليومين دول بس تقولي أيه .
اللي أنت بتقوليه ده مش مضبوط محدش يفكر كده
تفكيرك يا ماما يصلح لأيامكم لنقاء سريرة أفكاركم القديمة لما الدنيا
كانت همومها قليلة أحنا دلوقتي في عصر التخلف و القمع والتجارة بالدين
عصر كنا مفكرينه هيدي الست حقها بس أصل الثورة هتنجح أزاي مش لما ننجح في
تغيير نفسنا الأول مش لما الراجل يفهم أنه مش كائن لوحده في العالم ده
وانه محتاج يبص من برجه العاجي شويا للكائنات اللي هي أحنا على أنها
والله بني أدمين زيهم تمام مش حشرات تداس بالرجلين
ولا الست تفهم أن دورها ولموأخذة مش شريكة أمر واحد وتحت الطلب هي حاجة
ليها شعور وأحساس و والله بتتعب زيها زي الراجل اللي طول اليوم بيعايرها
أنها في البيت تحت التكييف مش بتشقى زيه وإنها متبطرة على النعمة طيب
خليه كده يقوم من الصبح يعمل اللي بتعمله ويشيل بيت و تنضيف و أكل و ولاد
و توصيل و يوريني هيحط راسه على المخدة ازاي فى الاخر لآ ولازم أعجبه ولا
الملايكة تغضب عني ماشي موافقين سنة الحياة .
..................
البقية في الحلقة القادمة