المصرى انسان

يا مصر إبنك إنسان
في الشده يرد الإحسان
ياما عنك صد العدوان
على دمه إشهد يا زمان
بطولات يحكيها الفرسان
بصراحه أنا منك زعلان
إبنك على أرضك يتهان
وكرامته في طي النسيان
كان طينك بالخير مليان
من نيلك وقت الفيضان
عن كرمك يحكي القرآن
فين خيرك و الكل جعان
شباب م الفقر ف توهان
عشان ينسى راح للإدمان
ويهاجر فيموت غرقان
زهقوا خلاص م الحرمان
م القهر ال شافوه ألوان
م الظلم وشرب الطغيان
ليه يخلوا الأبطال خرفان؟
يا عظيمه شعبك حزنان
وباعتلك بلساني بيان
لو حتى هيتذل كمان
ولا ابيعك ولا اكون خوان
وبعاهدك وبكل إيمان
واقسملك بربي الرحمن
ليشوف من ظلمك بركان
بقلوب الشعب الغضبان
ونعيدلك مجدك ألوان
تتلون أرضك بستان
تتباهى بحسنك أزمان
وهتشهد كل البلدان
بإن إبنك فعلا إنسان