لون حبة الرمان ...... بقلم حسين محمود

نفسى القى حبيب
اشم قربة الطيب
ميكنش يشبهنى
ميكنش يعنيلوا له
غير انى أعنيلة
على الشط أنا بحره
على البحر أنا أرضة
على الأرض أنا طرحة
يرسمني فى راحتة
ينقشنى ف الشريان
يورد على مدنى
ويحط عندى الرحال
يسكن قصور جنتى
ميهبش فى محبتى
غير سرى فى شكوتى
يسمح لى انى اشتاق
لون حبة الرمان
وهج الهوى والشوق
أشقر بصوت الشمس
أنور بلون البدر
نادى كما نادية
باسم ف صوت هانى
أنا أصلى فى محبتى
أملك ومملكش
حبى سبق رمشى
وف دايرة الأجفان
بطوف كما الأكوان
صوت المحبة آدان
عالى وبيلبى
الرمش والنينى
والدمع يتوحدوا
أسجد أنا لله
أسجد وأستغفر
أنى أنا الأنسان
أنس أنا بالله
وأشهد بانة الآله
بلمس أنا ف قربة
طاقة بتملانى
أقدر على رحلتى
وأزداد صلابة المواد
وسيولة التكوين
أشهد أنا بيقين
تتحول البساتين
لوشوش من العارفين
ومين يعيش ف الحياة
ألا واليه خطوتة
ف التوهة واللخبطة
ترسم خطوط شخبطة
لكن ف يوم توصل
ف للقرب للفضفضة
أغصان من المسارات
فيوضات من المعرفة
توصل الى حضرتة
تتجلى فى محبتة .