حكاية نوجا

صلوا علي النبي المختار واعرفوا انة كل شئ بأوان وعلي رأي الست ام كلثوم ياما قلوب هايمة هايمة حواليك تتمني تسعد يوم برضاك وقبل ما نعرف حكاية اليوم ادعيلكم ونفسي بالهداية والبعد عن الرجيم محب الغواية
يخرب بيت شهدك وعسلك وحياتك يا رب ونعمتك ونورك اللي ملوش حدود ولانهاية انا بحبك يانوجا لان نوجا منك وانت اللي باعتها 00مش انت اللي باعتها ؟اشهد يا زمان اشهد يا مكان وحياتك ياحدث وحياه غلاوتك ياذروه وعشان خاطرك يا حبكه انا بحبك يانوجا
اوصفها ازاي الموضوع كبير قوي والكلام اصلا عاجز خسيس مهما كان عظيم وكبيروحقيقي انما عمرة ما كان زي الحقيقة لانة تو ما طلع من بقك لازم هيكون غير شعورك واذا كان زي شعورك عمرة ما هيعبر بالظبط علي اللي عايز تقولة لازم هيكون فية فرق صدقني 00مش كدة00 لازم هيكون فية فرق؟ افهمني وحسني وأسمعني
صلي علي النبي المختار اخر من حمل رسالة من ربة لاء انا اسف كلنا حاملين رسالات وكلنا رسايل قصدي اخر نبي منزل رحمة مهداه ياعم وسع دماغك واوعي تتعجب واستعيذ دايما من الكداب اتباعة
يخرب بيت عسلك وشهدك والله لامشي في شوارعك شارع شارع، حاره حاره وزقاق زقاق وعطفه عطفه وخن خن هدور لحد ما اقع من طولي علي نوجا شوفوا البت وعمايلها اهي استخبت في فرحه بنت صغيره شوفوا حركاتها واستعباطها اهي بقت قمر منور عالي في السما حرام عليكي يا نوجا هوه انتي من البشر زينا لاء انت اكيد ملاك بس الملايكه ليهم جناحات وبيطيروا واكيد حجمهم اكبرمننا بكتير مش ملايكه ياجدع يبقي اكيد نوجا حاجه كده بين البشر والملايكه زي كده الفاصل بين الحق والبهتان ايوه نوجا هي الحق الكامل والنور الموصول اللي لاينقطع ولاحد يقدر يخفيه ايوه يا أخي بكلمك عن نوجا _ نوجتي- مش عارفها أزاي دي البت الغلبانه اللي بتشتغل وتصرف علي اخواتها عشان يكملوا تعليمهم انت متعرفهاش نوجا هي البت الممرضه الي كانت بتسهر جمب ابويا كل يوم وهوه في العنايه المركزه ولما مات قعدت تعيط وقلتلها جري ايه بقي يا نوجا هوه ابويا ولاابوكي
قالتلي الفراق صعب وانا لازم ابكي علي كل مفارق
قولتلها قوليلي نكته يا نوجا
قالتلي ادفن ابوك الاول
قولتها ابويا ما متش ده بس بياخد تعسيله يا نوجا صدقيني
قالتلي خلاص هكتب عليك الضحك انت الراجل اللي هيضحك ويضحك الناس
نوجا يا جدعان انتوا مش عارفينها دي احلي من القمر واجمل الشمس وارق من النجوم وموج البحر والسما واعلي من اعلي جبل واصغر من اصغر نملة بس هي ليها حركات كده بيتغيب يتغيب بس متاكد انها هترجع تاني هوه حد يقدر يعيش من غير نوجا ياكريم يا رب يا طيب يارب انت حلو قوي يارب
والنبي عايز اشوف نوجا- نوجتي-
صلوا علي حضره النبي كمال النور ونور الكمال
ايوه فكروا بقي معايا ازاي الاقي نوجا؟
يا جماعه دوقوا بنفسكم ده عسلها وده شهدها
ايه مش سامع ، علوا صوتكم شوية ليا حق اتجنن لاء معلش انا مش مجنون انا لاسع بس، لان ده اللي عرفته واللي عرفته علي قدي ودوخني السبع دوخات هدور يا نوجا عيلكي يا اجمل صبيه ايوه اجمل صبية رمشها ايه! يفرش علي رمش الحبيبه فدان؟ ده الفدان ده صغيرقوي يا جدعان يفرش علي رمشها الكون لاء كل الاكوان يا مدوخاني يا عسل يا احلي حبيبه اوصفك ازاي عايز لغة تساعدني انا بتحرق ياخلق واللي خلق الخلق و النار والنور البحر المسحور علي رأيكم بوصف للناس الجنة وأنا في النار هوه فيه طبق يشيل كل الجمال اللي في الكون اما انا غبي قوي اذا كان الكوكب الدري موجود في مصباح جوه زجاجة في مشكاة هي بقي الطبق اللي شايل كل الحلاوه والجمال بنت الاية عاملة هبلة وعبيطة
جري ايه يا نوجا بطلي دلع واظهري خليهم يحسوا ويعرفوا النور والخير بالزوفه بس كل واحد يشيل كفايتة مش عايزين زحمه دي نوجا دي والله لاتخلي الحب في قلوبكم يفيض اكتر من الميه في البحار والمحيطات ايوه ولو كانت كل الميه دي مداد هينفذ ولا ينفذ الحب في قلوبكم يعني اشتم بقي ولا ايه! ما تفهموني يا خلق لو حد بس يصدقني كنت سيبتوا كل اللي في اديكم ودورتوا معايا علي نوجا وقولتو ورايا يخرب بيت شهدك وعسلك يانوجا
يقول الراوي يا ساده يا كرام ان الشيخ المهيب الذي اصبح فيما بعد صموتا كتوما لم يعد يبحث ابدا عن نوجا ولا عن اي شئ بل يمكن القول ان من يمر بجانبة يشك اصلا في وجود دلائل علي انة حي وان كان الطعام الذي يجلبة لة اهل الخير وظل يوردونة له كل يوم بل وهناك من كان يتجرأ ويضع إلي جواره بعض من المال -الذي وجدوه مقطعا إلي اجزاء صغيره جدا ذلك أذا كان مصنوعا من الورق ومطبقا إلي أشكال غير مفهومة أو معلومة هذا أذا كان من معدن- بعد أن كان يترك الفرشة التي كان يجلس فيها ويخرج هائما في الشوارع والميادين والحارات ثم يعود إليها إلي ان اصبح يهيم في الوديان والسهول ثم إلي الصحاري والبراري المكفهره وهناك من يقول ان كلمة النوجا التي تعبر عن الحلويات حتي يومنا هذا أخذت من كلمة هذا الشيخ المهيب لانه كان كل عده ايام وشهور حينما يخرج عن صمتة يقول نوجا00 نوجا او يخرب بيت عسلك وشهدك ، وهناك من يقول انة مات في دمشق ولة مسجد هناك وهناك من يقول انة مدفون بحلب ولايعرف لة قبر محدد او مثبت في كتب التاريخ وان كان البعض يرونة في جنح الظلام وفي شوارع وحواري المدينة وفي لحظات الضيق يوزع الحلوي والنوجا علي الاولاد والفتيات الصغيرات وان بدايته كدرويش ثم كمجذوب ثم كصاحب مقام كانت بعد حبة الشديد لنوجا والتي لايعرفها احد بشكل أكيد.