الإضراب بين الثائر و الحائر

بقلم : وحيد لاشين
سؤال برئ لكل واحد بيهاجم إضراب 11 فبراير؟؟؟؟
عزيزي اللى بتهاجم الإضراب ,,, ممكن أسألك سؤال برئ !!!
هو حضرتك مع ثورة 25 يناير و لا لاء !!!!؟
يعنى حضرتك شاركت فيها و ناصرتها و لا لاء !!!!!!؟
يعنى حضرتك ناصرتها و لا لاء !!!!!!؟
يعنى حضرتك شجعتها و لا لاء !!!!!!!!!؟
يعنى حضرتك كام مرة إتباهيت بعظمتها !!!!؟
و كام مرة مَجدّتها في تويتاتك على تويتر و كومنتاتك على الفيس بوك و أحاديثك مع صحابك و العامة !!!!!؟
بزمتك مش كتير !!!!!!!؟
أنا عارف إنها كتير من غير ما تحلف.
طيب ما تزعلش منى ... هسيبك ترد إنت ... إتفضل.
(...................................................)
عرفت بقا إنى عارف إجابتك بإنك شاركت فيها و ناصرتها و عظّمتها و مجدّتها و إتكلمت عنها مع صحابك و مع كل الناس.
طب ينفع منك كدا !!!!!!!!؟
ينفع إنك تهاجم إضراب 11 فبراير و تتهم المُضربين إنهم مش وطنيين و إنهم مش خايفين على مصر و هيخربوها و هيودوها في داهية!!!!!!؟
عارفك هتقولى الإضراب حرام و شيخ الأزهر و المفتى حرموه ... هقولك طب المفتى السابق ما حرموش.
بس إوعى تقول إني مش مقتنع بكلام الشيوخ .. هقولك طب ما إنت برده مش مقتنع بكلام شيوخ زيهم و بالعكس أنا بجلّهم و بحترمهم جميعا و ما تنساش يا أخي إن إختلافهم رحمة.
عارفك هتقولى أصل أحوال البلد ما تستحملش و إلإقتصاد مكشوف و لازم عجلة الإنتاج تدور قبل ما تبقى فيه ثورة جياع ، و إن البلد محتاجة نشتغل بدل ما نضرب و اللى يحبها ما يضِربش !!!!
مش هقولك هو إحنا كان عندنا عجلة إنتاج إمتى !!!!؟ على الأقل حتى فى الفترة اللى فاتت!!!!
بس لو كان عندنا عجلة إنتاج ،، ما سئلتش نفسك أمال ليه كل وزراء المجموعة الإقتصادية فى النظام السابق موجودين حالياً فى السجون أو هاربين من تنفيذ أحكام !!!!؟
يمكن عشان كانوا مشغلين العجلة كويس !!!!!؟
بس عارف هقولك إيه!!!!!!!......
طب إنت ليه شاركت في الثورة !!!! ...
هو إنت مش عارف الفترة بين 25 يناير و 11 فبراير2011م دى كانت إيه !!!؟
حضرتك ما تعرفش إنها كانت عصيان مدنى و ما كانتش إضراب بس !!!!!؟
أكيد إنت عارف يعنى إيه الفرق بين الإتنين، و لو ما تعرفش دوّر على الفرق عشان تعرف!!!!.
و لو عرفت و لسه هتفضل على حالك بتهاجم الإضراب في 11 فبراير ، ياريت تنسلخ بقا عن ثورة 25 يناير و ما تعملش فيها عبده الثائر عشان ترتاح و تريحنا معاك لأن اللى هيشاركوا في الإضراب ما قالوش عنك خاين و لا عميل و لا ضد الثورة و لا قلبك مش على البلد لمجرد إنك مش هتشارك ، فليه إنت بتهاجمهم و بتخونهم و بتدعي عليهم إنهم مش حابين البلد!!!!!!!؟
و أخيراً ....
كلمة من ثائر إلى حائر:-
"بلاش تقتنعنى بكلامك لأنى ما إتعودتش أسمع كلام واحد متناقض"