ازاي اقدر احدد انا اشتغل ايه ؟

مفيش شاب دلوقتي مش بيدور على فرصة عمل مناسبة ليه، ولو لقى الفرصة دي بيبقى محتاج يكون مؤهل ليها عشان ما تروحش منه، ولأن "كلمتنا من الشباب وللشباب" ويهمنا انكم تلاقوا الفرص المناسبة في شغلكم،هنقدم لكم بالتعاون مع خبيرة الموارد البشرية "رشا خليفة"، وصاحبة جروب "نصايح رشا" على الفيس بوك.. كل النصايح اللي انتم محتاجينها، وكمان "رشا" هترد على كل استفساراتكم وهتقول لكم على كل اللي انتم محتاجينه عشان تلاقوا فرص العمل المناسبة ابعت لرشا واتكلم معها واستفسر منها علي
shoghlana@kelmetnamag.com
ازيك يا استاذة رشا..
انا كنت عايزة اعرف رأي حضرتك فى حاجتين
قبل ما اقولهم لحضرتك هعرفك بنفسى الاول،انا اسمى مى،لسة متخرجة جديد السنة دى من تجارة القاهرة قسم محاسبة بتقدير جيد جدا، عندى نسبة من الذكاء والقدرة على الاقناع مش قليلة ، وسرعة الفهم وبحب اتقن فى الحاجة اللى بعملها جدا ، ومعتمدة على نفسى دايماً فى كل حاجة ، ودايماً تفكيرى ايجابى ومش بيأس ، بس عيبى انى خجولة فى تعاملاتى مع الاخرين يعنى مش لبقة ، بس بحاول اصحح العيب ده فيا بنفسى وبالكورسات ، نفسى اشتغل فى وظيفة متكونش روتينية وأقدر ابدع فيها واحس انى حققت حاجة فى حياتى.
نرجع بقى للحاجتين اللى عايزة اعرف رأى حضرتك فيهم..
اولا،انا قدمت فى منحة اكتساب المهارات الاساسية فى مجال العمل تبع جمعية جيل المستقبل وعملت انترفيو ومستنية النتيجة اخر الشهر وسمعت عليها كلام كتير بس كل الكلام كويس فكنت عايزه أعرف رأى حضرتك فيها ، ولو مقبلتش فيها سمعت ان فى منحة شبهها فى مكتبة سوزان مبارك تبع ميكروسوفت ، ياريت برضوه أعرف رأى حضرتك فيها..
اما ثانيا ، فأنا قولت لحضرتك انى عايزه أشتغل فى حاجة مش روتينية ومفتكرش شغل المحاسبة ينطبق علية الكلام ده ، ممكن حضرتك تقوليلى ايه الوظايف اللى ممكن تناسب مؤهلاتى غير المحاسبة واحس انها مش روتينية..
انا عارفة انى طولت على حضرتك بس بجد محتارة ومش عارفة اعمل ايه او افكر ازاى ، ياريت تساعدينى ، واسفة لو كنت بضيع وقتك..
بصي يا ستي .... انتي مش محتاجه نصيحة .... دا انتي مخططة و مظبطه .... طبعا جيل المستقبل مفيش عليها كلام و انا بنصح أي شاب بانه يروح جيل المستقبل و منح ميكرو سوفت برضه هايله مفيش كلام .... بصي من الاخر طول ما المنحة من مركز تدريبي محترم مش مركز تحت السلم ... و لا شقة في عماره و مسينها مركز تدريب متعرفيش بتا عمين ولا تبع مين يبقي انتي كده في السليم ....
بالنسبة للشغل .... هقولك تعملي التالي
1- تدخلي علي جوجل
2- تكتبي هيكل وظيفي لشركة
3- هتلاقي كل الوظايف الي المفروض تكون موجوده في الشركات جوا الهيكل من اول رئيس مجلس الادارة لحد البواب.
4- تمسكي وظيفة وظيفة و تدوري علي التوصيف الوظيفي بتاعها .
5- بكده انتي عرفتي كل وظيفه محتاجه ايه و بتتمارس ازاي و ايه المهارات المطلوبه .
6- الوظيفة الي هتعجبك و تحسي انها انتي هي دي :)
بسيطه صح؟؟؟؟