ثورة ... كلاكيت تانى مرة

بقلم كارم عمران
عدت سنة على الثورة .... ومش عارف .... هو فى ثورة حصلت فعلا ؟؟ !!.... ولا ده كان فيلم وخلص .... ورفعوه من السينما !!! ..... ولا انا كنت بحلم !!! ... وصحيت من الحلم ... اكيد كنت بحلم .... اصل انا كنت موجود فيها .... وحضرت احداثها ..... يبقى اكيد مكنتش بمثل دور فى فيلم .... يبقى كنت بحلم ... طب الحلم راح فين ؟؟ !!.... حد يرد عليا ... انا حاسس ان حلمى اتسرق .... مين سرقه .... مش عارف ... المجلس .... ولا الاخوان .... ولا السلفين ..... ولا الشعب نفسه ... اللى اتقسم بقى 100 رأى ... وبقى 100 جبهة ... حبة حزب الكنبة ... واللى تحت الكنبة .... واللى فوق الكنبة ... وحزب ميدان العباسية .... وحزب ميدان التحرير .... واللى بلطجى ... وتلاقيه اصلا شيخ ازهرى ... او طالب فى كلية من كليات القمة ... وبردو مصريين انه بلطجى ... والله ما بقتش عارف
الغريب بقى ان من بعد سقوط النظام السابق ... بقت كل الناس بتخون فى بعضها ... وشباب ائتلاف الثورة اللى كانوا على راسها .... اختفوا .... وائل غنيم ... فين ؟؟؟؟!!!!! .... مش عارف
السلفيين اللى كانوا بيقولوا انهم ضد التظاهر ... وماينفعش نخرج على الحاكم .... بقوا بينزلوا الميدان .... فى نفس الوقت اللى كان الاخوان بيقولوا مش هينزلوا الميدان ... مع ان الاخوان كانوا بينزلوا قبل النظام مايسقط وبعد ما سقط .... انا مابقتش فاهم حاجة .... الادوار كلها اتبدلت ... اللى كان مع بقى ضد .... واللى ضد بقى مع ... كل حاجة اتلغبطت ... وكل ده ليه !!!!!! ... عشان مجلس الشعب .... ولا عشان ايه ؟؟؟؟؟
والاغرب بقى ... تلاقى حوالى 20 شخصية من الشخصيات العامة والسياسية ... اللى المفروض بيفكروا لمستقبل مصر ... ما ورهمش حاجة غير انهم يتنقلوا بين القنوات الفضائية ... هما هما ... ونفس الكلام هو هو .
طب انا عندى استفسار .... بيجيبوا وقت منين عشان يفكروا وينفذوا افكارهم السياسية والاقتصادية ... لنقل مصر من الفترة اللى هى فيها دلوقت ... وهما مش لاقين وقت اصلا يكفى القنوات ؟؟؟؟؟ !!!!
والله انا احترمت جدا البردعى لما انسحب من الترشح للرئاسة ... ضرب كرسى فى الكلوب
والله انا مابقيت عارف مين صح ومين غلط ... انا اصلا مابقتش عارف انا مين .... بس اللى انا متأكد منه ان فى ناس ركبت الموجة ... وركبت الثورة .... لحد ما انعدمت ملامح الثورة اصلا
طب ياترى ... هنام واحلم الحلم ده تانى ... وتبقى ثورة ... كلاكيت تانى مرة ... ولا ملامحها هترجعلها .