فى الوقت ده من اليوم الناس اللى بتكون صاحيه غالبا طلبة بيذكروا و غالبا طلبه ثانويه عامة فى نفس الوقت من تسع سنين انا كمان كنت صاحيه و شايله هم المذكرة بس فى نفس الوقت ما باذكرش حاته الكتب و الملازم و الورق كله قدامى و اذاكر كل خمس ساعات صفحه كنت بسرح كتير و اقوم اكل و اشرب و الف فى الشقه و احلم و الاحلام ما بتخلصش. مين ماحلمش هايكون ايه؟ و هايعمل ايه لما يكبر! سؤال كانت بتسأله ماما ساميه للاطفال فى البرنامج و احنا كنا بنجاوب معها, كان نفسى اطلع ضابط مع انى بنت كنت عايزه ابقى زى بابا و كل جيرانا كانوا كمان ضباط يعنى معرفش شكل الشغلانات التانيه ايه؟,كان هو مثلى الاعلى فى النجاح و الاعتماد على النفس,كنت بحب الرسم و كان نفسى اطلع مذيعه و باليرينا و مهندسه ديكور , كان نفسى ابقى مشهورة و اطلع فى التليفزيون اتكلم عن نجاحاتى و ازاى حققتها او اتكلم عن رشاقتى اللى محافظه عليها طو ل السنين ديه. فى الحقيقه كل اللى حلمت بيه كان جميل حتى لما حلمت اطلع من اوائل الثانويه العامة و اتكرم و اقولهم برده عن سر نجاحى و تفوقى , ليه لأ هما الاوائل احسن منى فى ايه !! منا اصلا كنت عاوزه ادخل هندسه قسم كمبيوتر عارفين ليه؟, عشان مهندسين الكمبيوتر بياخذوا مرتبات كويسه !!,امال ايه؟! مهو المستقبل فى الكمبيوتر مش بس كده ,كمان هتبقى شغلانه فيها تفكير و ذكاء و ممكن بيها تبقى عبقرى زمانك , مرة سألت بابا هما مهندسين الكمبيوتر اول لما بيشتغلوا بيخدوا كام ,طبعا ضحك ضحكه سخريه بس انا كنت بتكلم بجد أنا مشتغلش باقل من 1000 جنيه و لو زى ما بيقولوا اتين و ثلاثه دول يبقوا جامدين قوى !! (ماديه حقيره) فى الحقيقه انا فكرت فى كل حاجة ؛ اللى بحبه واللى يشغل وقتى واللى يشغل دماغى واللى يجيب فلوس كنت عملية وفى نفس الوقت خيالية وكمان مادية و كنت بحلم ان يكون ليا زوج احبه و يحبنى و اولاد حلوين كنت باقول اتنين مع تنظيم الاسرة( اصل اعلانتهم كان مفزعه !) لكن فى الحقيقه انا عايزه عيال كثيرة يعملوا هيصه و دوشه يكونوا اصحاب و عزوه و اعلمهم و اكبرهم كل واحد فيهم يحقق حاجة.. حاجة بيحلم بيها. كل ده ولسه مقلبتش صفحة ملزمة الفيزيا فى نفس العنوان الضغط! هى الملزمه دى هاتخلص امتى طيب مش مشكله نرجع للاحلام طيب جوزى بقى ده هايكون شكله ايه ؟ مش مهم الشكل طبعا المهم الاخلاق و الشخصيه ,بس لو يطلع شبه هانى سلامة (ممثلى المفضل فى الوقت ده) و لابراد بيت و طبعا يكون كريم هدايا بقى و خروجات و سفر يعمل لى كل حاجه قبل ما اتمناها و يكون ناجح و طموح عشان لو انا مطلعتش فى التليفزيون يطلع هوه يقول برده سر نجاحه و تفوقه و طبعا هيكون أنا زوجته اللى وقفت جنبه... الخ , وتطور بقى الهدايا زى الافلام عقد لولى، خاتم سوليتر، عربية (ماديه حقيرة برده) و سعاده ابديه و كلمه النهايه. الحياه بسيطه جدا يمكن الافلام والمسلسلات و الثقافه اللى حوالينا هى اللى معقدها خلتنا نبص على الدنيا من خرم ابره من فتحه ضيقه قوى و الدنيا واسعه. يمكن تكون الثورة و سعة الفتحه دى ,خلتنا نخرج عن المعتاد ونبص من بره الفتحه ,نبص زى ما احنا عاوزين نبص المهم نكون صح الواحد كان دايما لما يقول لحد انا نفسى اكون كذا و كذا يقولك خليك واقعى ؛ الطب سنينه طويله و مامنوش فايده ,الهندسه كويسه بس ممكن ما تلقيش شغل او تشتغل فى اى حاجه تانيه , نظام التعليم اساسا فاشل ويعنى لو طلعت الاول فى الكليه و عينوك اللى بيشتغل بره هايخود اكتر منك , ولو عملت مشروع ممكن تخسر كل فلوسك و السوق زى ما انت شايف مش مضمون ,خليك فى وظيفه ثابته احسن.و بكده تغير رأيك و تحبط و انت اصلا كنت يا دوب بتحلم. لو عرفت انت عايز ايه بجد, ايه اللى هايسعدك ,ايه اللى هايخلى ليك فايده فى المجتمع ،قيمه ايه اللى هايكبر و تكبره تبقى فيه الاول ,ايه اللى هاتبدع فيه و مش هاتبقى زى اى حد تانى مش هاتبقى فيه عادى ؟؟ هتلاقى عنيك بتشوف الدنيا زى ما انت عايزها , بتشوفها بنظرتك انت مش بنظره الللى حواليك يمكن من فوق فتصغر فى عنيك و يكمن من قرب فتحبها و يمكن من بعيد فتشوفها صعبه, شوفها زى ما انت عايز بس اتأكد انك انت اللى بتشوفها و مش حد اللى فاتحلك شباكها . و يكمن تبص تلاقى فى وشك ملزمة فيزيا فتعييط على الوقت اللى فات وانت عمال بتحلم و مذكرتش كلمه و اخرتها حاتدخل الامتحان و تكتب نفسى اطلع ايه؟! يا فاشل خالى الاحلام تنفعك!!!