لسا يا واقف في الميدان

كان أول مره يشوف النور
في شوارع مصر المطفيه
كان أول مره يفكر انه يطارد حراميه
كان أول مره يبلع ريقه ويرفع صوته
ويقول.... يسقط
كان جسمه ينفض غضبه
فوق رصفان الشارع
أتحمل ضرب العسكر
و الدخان
والجوع والجري بطول الليل
والنوم علي إسفلت الشارع
أتحمل
صمد الخايف جواه
قهر العلة الدايبه....
مالنا ومال الحاكم
وكلاب الحاكم
احنا جنب الخيط عايشين
اشتد العود وخرج
في ميدان التحرير
وف كل الميادين ناس
أول مره يشق زعيقهم حلق الصمت
كان مستغرب يسمع صوته يعارض
بيقول لاه ولو مره
عاش الطاعة العامية سنيين
المر يدوقو
علي انه التمر
كان بيطيع الأمر
كان وسط ألوف
وشوش مصريه جميله
وبنات شيبه عواجيز
وولاد من عمر الزهر الأخضر
لسه متعكرش هواهم
خارجين للنور بيقول لا
انا باصرخ ويا الناس
بعلو الصوت يسقط
وحلفت مارد لبيتي الا بالنصر
واللي أتحصن بالقصر الرعب ماليه
وبيوعد
ماغادرش يهدد تاني خلاص
بس وعوده خلاص
الناس ممصدقهاش
الناش عشقت كلمه تغيير
الناس بتلحن سطر كلام ..
الشعب يريد إسقاط النظام
وسقط اعلن انه أتخلي
مبقتش مستوعب ايه أتخلي؟
وليه متنحاش!!
ساب الحكم ف ايد العسكر
بطلت أفكر
جريت وصرخت زي الخلق
مشينا م التحرير لمحطة مصر
ووشوش الناس فرحانه
شايفها راحت منها الغبرة
رايقه والنور بيطل بقوه
بيلمع من حكاويها
حطينا ورود ف أيدين العسكر
أتصورنا معاهم
وبننستني الحلم
.....
إن العتمة تفك
إن الصبح يهل
انه يتحاكم او يتلم في سجن
محصلش
أتجمعنا نخرج تاني ..
ولسايا واقف ف الميدان .