ع المصطبة

فلافيس التليفزيون

عقد مجلس برلمان المصطبة جلسته الأسبوعية لمناقشة الموضوعات المطروحة علي الساحة السياسية.
الرئيس: حضرات الإخوة أعضاء المصطبة معروض عليكم تصريحات الكاتب الصحفي القدير حسنين هيكل الأخيرة ومطلوب التعقيب عليها.
العضو النمرود: أنا عاوز أعرف إيه حكاية الأستاذ اللي نازل كلام في كلام وكأنه في سنة خمسين وبيشتغل مستشار الرئاسة ونسي أنه أصبح داخل علي ميت سنة وكان أفضل له أن لا يكثر من تعليقاته لأن زمانه انتهي خلاص وكفاية عليه كده.
العضو الفلفوس: يا جماعة اعذروه الراجل أطال الله عمره داخل علي قرن من الزمان من عمره وعنده حيوية ووجد اللي يستغل أفكاره لأهداف معينة فاستغله لحسابه.
العضو زعيط: الحق علي اللي جابه يتكلم ودول ناس لهم مصالح معينة ويمكن وجدوها في كلام صاحبكم.
العضو معيط: الموضوع وما فيه إن البلد راح سداح مداح يعني فيه حوالي خمسين قناة ودول أصحابها كل واحد له هدف يعني خمسين هدفا وراء أصحاب القنوات والحدق يفهم.
العضو نطاط الحيط: ابحثوا عن أصحاب القنوات أهدافهم إيه تعرفوا السبب.
العضو بهلول: البلد كلها فلافيس يعني كل اللي بيشتغلوا في القنوات بيأكلوا لقمة طيبة فلازم ولابد يعملوا اللي عاوزه صاحب القناة بطريقة ذكية وطبعا كلهم محترمون لكن مفيش مانع من كلمة هنا وجملة هناك والحدق يفهم.
العضو النمرود: والله الناس دلوقتي بتعرف مين الصادق ومين الكداب وكله معروف وعمار يا مصر.
الفلاح الفصيح