على المصطبة

حددوا أعداد الكليات النظرية

عقد مجلس برلمان المصطبة جلسته الاسبوعية وسط صحراء وادي النطرون في ضيافة صاحب المزرعة الحاج عادل عبيد ودار النقاش حول ما يذاع عن تطوير التعليم.
الرئيس: حضرات الضيوف الكرام طبعاً كلنا سمعنا الكلام حول سياسة تطوير التعليم في بلدنا والموضوع مطروح للمناقشة.
العضو الفلفوس: إحنا شبعنا كلام عن التعليم وتطوير التعليم لدرجة اننا خلاص وصلنا السماء وأصبحنا متفوقين على الدول اللي التعليم فيها 98 في المائة من عدد السكان زي أمريكا والسويد وغيرهما واحنا يا حسرة محصلناش أفقر دولة حوالينا.
العضو معيط: والله يا جماعة حاجة تحزن لأن عندنا كليات لا حصر لها ولا عدد لها مع إن كل اللي بيتخرجوا فيها قاعدين عواطلية عالة على أهاليهم وبالشكل ده التعليم العالي ملوش لازمة.
العضو النمرود: زي ما إحنا شاطرين في الكلام فلازم ولابد من عمل ثورة حقيقية في التعليم بمعنى أننا لو استدعى الأمر اننا نلغي كليات ونعمل بدلاً منها مدارس فنية عالية المستوى لسد احتياجات الدولة علشان نلاقي عمل للقاعدين على قلوب اهلهم بعد التخرج لا شغلة ولا مشغلة.
العضو الفلحوص: أنا عاوز أقول إني سمعت في الراديو وكيل نقابة العمال قال كلام دخل دماغي خلاصته أن التعليم لغاية سن معينة يتحول التعليم لتعليم انتاجي يعني نقفل الكليات اللي بيتخرج فيها ألوف من غير شغل.
العضو نطاط الحيط: يا فرحتي لما ابني يتخرج ويقعد جنبي في الدار حتى إنه يرفض يساعدني في شغل الغيط لأنه متخرج من كلية التاريخ فأنا من رأيي انه يقفلوا الكليات اللي ملهاش سوق عمل.
العضو معيط: والله كلام أخويا اننا نقفل كليات شىء غلط لكن ممكن نقلل الأعداد اللي بتطلع من الكليات غير المطلوبة زي الجغرافيا والتاريخ والفلسفة وغيرها ونحولهم لمدارس عالية للزراعة والصناعة.
العضو بهلول: أنا مش عارف ليه ساكتين على الحكاية دي يعني البلد ناقصة عواطلية وأنا عاوز حد يطلع يقول إيه فايدة اقسام الجغرافيا والتاريخ والاجتماع والمكتبات والفلسفة وغيرها فلازم نحدد العدد المطلوب اللي محتاجاه الدولة والباقي يدرس المطلوب لحاجة السوق بدل مانستورد عمالة مدربة من بلاد بره ويبقي عندنا فايض نصدره للدول العربية وغيرها.
الرئيس: الموضوع مهم وخطير ويحتاج دراسة خبراء في هذا المجال.
الفلاح الفصيح