أيهما أصلح؟

عقد مجلس برلمان المصطبة جلسته الأسبوعية لمناقشة جدول الأعمال.
الرئيس: حضرات الإخوة الأعضاء مطروح علي الساحة اليومين دول موضوع مهم وهو استعمال الطاقة النووية وظهر أيضاً من يطالب بمنع استخدام الطاقة النووية واستبدالها بالطاقة الشمسية والأمر معروض للمناقشة.
العضو الفلفوس: حضرات الإخوة إن موضوع استخدام النووية مطروح من عشرات السنين وفجأة ظهر علي السطح واتخذت فيه اجراءات تنفيذية وبعد الثورة المجيدة ظهرت آراء تانية تطالب بمنع استخدامها واستبدالها بالطاقة الشميسة وعلشان نبسط الموضوع نقول الطاقة النووية يعني توليد كهربا بكمية وفيرة والطاقة الشمسية نفس الشيء وللحق وللتاريخ ظهرت أضرار عديدة للطاقة النووية وآخرها أحداث اليابان والكارثة اللي وقعت هناك من جراء تدمير المفاعلات بواسطة الزلازل وطبعاً كلنا سمعنا عن اللي حدث من كوارث.
العضو النمرود: في الواقع ان مصايب الطاقة النووية لا يمكن منعها وكفاية دفن النفاية اللي بتطلع منها وأنا شايف ان الطاقة الشمسية أحسن لبلد زي مصر وفيه دول عاوزة تساعد في الحكاية دي ويبقي لها حصة.
العضو زعيط: إذا كان ربنا منح مصر شمس طول السنة وكلها ببلاش من فضل الله وظهر لنا ان فوايدها لا تعد ولا تحصي فلماذا لانستغلها ونستنفع منها زي باقي خلق الله.
العضو معيط: إذا كانت اليابان اللي تعتبر تاني بلد في العالم في التقدم حصل فيها اللي حصل من تحت رأس النووي يبقي احنا ياكحيانين حانقدر علي مصايب النووي لا قدر الله وقدامنا الحاجة السليمة ومانستخدمهاش وده معناه ان احنا مش وش نعمة.
العضو نطاط الحيط: انتم نسيتم حاجة مهمة خالص وهي ان احنا ممكن نبيع الكهربا الباقية عندنا بعد ما ناخد كل حاجتنا واللي يفيض نبيعه.
العضو الفلحوص: لكن المشروع ده عاوز ألوف الفدادين واحنا محتاجين الأرض للزراعة غير التكاليف.
الفلاح الفصيح: ياجماعة أنا قريت إن فيه دول عاوزة تحول المشروع ده واحنا عندنا أراضي لا تصلح للزراعة في سينا وفي الصحراء الغربية وفي البحر الأحمر وغيره يامه واللي حايساعد حياخد بفلوسه كهربا يعني احنا مستفيدين وعلي كل حال لازم الدولة تاخد الموضوع بشكل جدي وبلاش المهاترات والكلام اللي ملوش معني لا نحصل بلح الشام ولا عنب اليمن ذي ما بيقولوا ويطلع غيرنا يلهف المشروع وأعلنوا عنه فعلاً في منطقة المغرب العربي.
الرئيس:والله ياجماعة الموضوع حيوي لبلدنا وربنا يوفق المسئولين وينتهوا من تنظيم البلد وبعدين يفكروا في مثل هذه المشاريع.
الفلاح الفصيح
عثمان أبوزيد