شواكيش

فات الميعاد يا مرسى

«العصمة الرئاسية» في إيد الشعب.
- طبعاً في إيد الشعب.. واللي مش عاجبنا «نخلعه بالتلاتة»!!
حكمة لإخوانا البُعدة.
- إذا الشعب يوماً أراد الحرية فلابد أن يستجيب الإخوان!!
حد شاف العمة «باترسون»؟
- أيوووه.. شوفناها وهيه بتقتل القتيل وتمشي في جنازته!
قطار الإخوان رايح علي فين؟
- رااايح علي سكة اللي يروح ميرجعش!
الناشط ممدوح حمزة: الإخوان متميزون بالكدب والخداع.
- وإيه كمااااااان.
كلمة في أذن الرئيس «المعزول» وجماعته.
- الشعب الثائر لن يعيش أبداً في جلباب «الأهل والعشيرة»!
هل نحن نعيش في زمن الإخوان؟
- لأه.. إحنا بنعيش في زمن الاستعمار «الإخواني - الأمريكي»!
الإخوان خلعوا النقاب.
- متستعجلوش.. لسه هيخلعوا «ورقة التوت»!
دعاء ليلة الرؤية.
- اللهم بلغنا رمضان بدون إخوان.. قولوا: آآآمين.
الإنذار الأخير ل «مرسى» بعد عزله شعبياً.
- فات الميعاد يا مرسي!
«تمرد» أطلقت حملة «سلم نفسك يا مرسي».
- أكيد هيكون شعار «البورش» الإخواني «تأديب وتهذيب وإصلاح».
الإعلامي يسري فودة: قطر مبتدأ مرفوع.. ومصر اسم مجرور بالكسرة.
- وطبعاً الشعب المصري ثائر مهموز بالثورة!
مصر هبة النيل.
- نحمد ربنا مكنتشي «هبة الإخوان»!
ما الدنيا إلا مسرح كبير.
- دا كان زمااااان.. دلوقتي سيرك إخواني علي كبير!
من النهاردة مفيش خرفان.. ليه؟
- علشان الخرفان اندبحت!
بالمناسبة.. رمضان ع الأبواب.
- يبقي هنصوم السنادي من غير «الخرفان»!
إلي الإخوان المتأسلمين.
- غوروا.. تغور الحرية والعداوة!
لون الحياة في زمن الإخوان.
- «بتنجاني مشمشي».. يعني شوية «شرعية» وشوية «تكفير»!
كلمة أخيرة للإعلامي باسم يوسف.
- هتوحشنا فضايخ إخوانا البُعدة قوي في رمضان.. اللهم إني صااااائم.