أخيراً بعد عذاب وطول انتظار..تم الافراج عن الكحك والبيتي فور والغربية..ما هو العيد جانا..ووصل بألف مليون سلامة..حاكم الولية سنيه مراتي المفترية دي عاملة زي الديكتاتور اللي كاتم على انفاس شعبه..ورغم ان المنطقة العربية كلها مليانة ثورات ونص الحكام العرب وقعوا..والنص التاني قرب يقع..الا أنهم كوم..وسنية المفترية كوم تاني.. قبل ما رمضان يخلص بأسبوع هات يا صويت وصريخ.."يالهوبالي..غطيني يامه وصوتي..بقى ييجي العيد السنة دي من غير كحك ولا بيتي فور ولا غريبة ناعمة بالسمن البلدي؟!..دانا كنت أصور لك قتيل في البيت يا زنكلوني يا بن بهية"..طبعاً الموشح ده عشان قلت لها ان مفيش معايا فلوس اجيب كحك العيد السنة دي..وكان لازم أغير رأيي بعد ما رجعت يوم من الشغل ولقيت ساطور كبير على ترابيزة السفرة..وجنبه كام كيس بلاستيك.. طبعا الرسالة وصلت!!..رحت تاني يوم عملت سلفة 300 جنيه من مرتب الشهر الجاي ونزلت آخر اليوم معاها أجيب الكحك..أنا قلت اجيب الحاجة كلها ب 100 أو 150 جنيه بالكتير وأخلى الباقى لعيدية العيال..اتخضيت لما شفت الاسعار..أقل كيلو كحك ب 35 جنيه..قلت أكيد ده مش هيعجب سنيه..واللي عملت حسابه لقيته..عاجبها الكحك اللي ب 45 جنيه..قال ايه..بالسمنة البلدي..وطبعاً الغريبة نفس الحكاية..والبسكوت..الخلاصة..جبنا حاجات ب 500جنيه!!..هتسألوني ازاي؟.. الست هانم لقيتها بتطلع من شنطتها 200 جنية عشان تكمل باقي الحساب..انا قلت يمكن صعبت عليها لما دموعي بقت أنهار في المحل..اتاري بنت اللئيمة كانت بترسم على حاجه تانيه..لقيتها قالت.."ولا يهمك ياسي زنكوني..انا هكمل المبلغ..بس ال 200 جنيه دول دين عليك ترجعهم بالفوايد..والفايدة عندي 10% شهرياً!! طبعاً خدتها من سكات ووافقت..المشكلة مش في ده كله..الأزمة الحقيقية ان سنية كانت عاملة حظر تجول في البيت الاسبوع الأخير من رمضان..كانت مانعاني انا والعيال ندوق حاجه من الكحك والبيتي فور..وكانت مخبياهم..والألعن انها كانت عاملة زي الشاويش ورايحه جاية تصرخ وتقول.."ها..مين هناك!" وياويله وسواد ليله اللي يفكر يدوق حاجة..يلاقي مضرب الدبان نازل يلسعه على ايده أو دماغه..وكل ما نسألها..عاوزين ندوق..ترد.."في العيد..الكحك اتعمل عشان يتاكل في العيد..اسمه كحك العيد مش كحك الوقفة ولا رمضان!!" سكت وامري لله..عدي يوم الوقفة على خير.. فضلنا سهرانين انا والعيال لغاية مارحت معاهم صلينا العيد..المصيبة اننا أول ما رجعنا البيت لقينا سنية نايمة وعلب الكحك والبيتي فور والغريبة فاضة..وسنية سايبالي ورقه مكتوب فيها: "ماتنساش تسيب لي العيدية يا زنكلوني..وماتنساش ال 200 جنيه اللي عليك زائد 20 جنيه فايدة تأخير!!" عمرو عكاشة المحروس والعيدية! دخلت علينا تفيده زميلتنا في الشغل وعليها ابتسامة واخده عرض وشها..سألتها اعتدال: "شكلك كده فيه حاجه.. قوليلنا فيه ايه!!"..تفيده قعدت تتدلع وهي بتقول: "اصل جوزي النبي حارسه هيطلعني انا والعيال العين السخنه في العيد".. ردت عليها اعتدال: "اما حتة عيديه..امك داعيالك"..قاطعتها تفيده معترضه: "عيدية ايه يا حبيبتي..دي مجرد اكراميه..لكن لسه مخدتش عيديتي" انا واعتدال ازبهلينا وقلنا في نفس واحد: "هو انتي كمان بتاخدي عيديه؟؟" راحت قايمه على حيلها وشاخطه : "حيلك حيلك انتي وهيا..متنحين كده ليه..الله اكبر من عين كل حاسد اذا حسد"..وراحت عامله بايديها خمسه في وشنا احنا الاتنين!! بصراحة عندها حق تخاف م الحسد..انا كبرت في دماغي حكاية العيديه دي..قلبت عليا المواجع..مكدبش عليكم انا اخر معرفتي بالعيديه كانت ايام الخطوبه..وساعتها المحروس اداني عشره جنيه..وبعدين رجع وقالي: "معلش..ممكن تاخدي خمسه وتديني خمسه اصلي عايز اجيب ايشارب لامي"..طبعا انا زي الهبله اتكسفت اوي وقلتله لو عايزها كلها خدها..راح فكر شويه وقال: "طب خلاص هاخد سبعة واسيبلك تلاته!!" بذمتكم لو واحده مكاني كانت عملت ايه؟ كانت رمت الدبله في وشه صح!! يخرب بيت أم الرومانسيه اللي ودتني ورا الشمس!! عديت على حلواني جنب بيتنا واشتريت كحك وبسكوت وغريبه..ما اهو انا لو ما اشتريتش المحروس حللني لما يجيب..ورجعت البيت وحكاية العيدية دي كابسه على دماغي..بعد ما المحروس فطر وحلى واجهته: "محروس..تفيده واعتدال اجوازهم بيدوهم عيديه في العيد!!"..انا طبعا حشرت اعتدال في الموضوع عشان يبقى عدد..اتخض وقال: "فيه ايه ياوليه..ما ياخدوا..انتي هتحسديهم..ياساتر!" رديت: "لأ يا محروس مابحسدش..بس بقولك ان الستات بياخدوا عيديه في العيد..واخد بالك!!" راح قايل بهدوء: "يا شيخه..ده من امتى؟ محدش قالي!!" رديت: "اديني قلتلك!"..بصراحه اتفرست منه..بس المفروض كده فهم..هاشوف بقى اذا كان هيحس على دمه ويديني عيديه ولا لأ. صباحية العيد استنيت يديني حاجه ولا الهوا..وشكله ولا على باله..وكل ما ينادي عليا اطلع جري عليه زي العبيطه متخيله انه هيديني حاجه وكل مرة نأبي يطلع على فشوش..المهم جهزنا عشان نروح كالعاده نعيد على امه..لقيته بيلف الكحك اللي انا جايباه والبسكوت والغريبه..استغربت اوي..راح قايل: "اصلي نسيت اشتري ومش معقول ادخل على امي ايدي فاضيه..هاشتريلك غيرهم واحنا راجعين"..شديتهم منه وانا بقول: "لأ يا خويا..اشتري لامك واحنا رايحين"..قعدنا نشد قصاد بعض لغاية ما كسب المعركه وهو بيقول: "بقى تشكي فيا يا عصمصم..وحياة غلاوة محروس عندك هجيبلك غيرهم"!! امه قعدت تاكل من الكحك والبسكوت والغريبه وتقول للمحروس وهي بتبصلي من تحت لتحت: "ايه الطعامه دي..ربنا ما يحرمني منك يا حبيب قلب ماما ياللي تملي فاكرني"..تنحت وانا شايفه المحروس تقريبا راح قاعد على حجرها وطلع ظرف وهو بيقول: "انساكي ازاي بس يا ماما.. دي عيديتك يا ست الكل"..الست كانت هتسورق لما شافت الظرف وقعدت تبوس في المحروس وقلبت أمينه رزق وهي بتقول: "فكرتني بالمرحوم ابوك..اهيء اهيء..رمضان ما يخرجش م الباب الا والعيديه في ايدي!!" رانيا صالح