شباك علي الثورة

مصر..يا بهية!

إلا صح يا عم أحمد ايه مصير الجاضي الفاسد اللي جبصوه؟
هكذا تساءل عبده شمه
فانفجر أحمد القزعة في نوبة ضح ثم قال عبده شمة
أنا سايق عليك النبي يا غيبوبة تقول دول كمان مرة
فقال عبده شمه غاضبا
خبر ايه امال يا واكل ابواك انت
فقال أحمد القزعة
خبرك اسود ومنيل هما مين اللي جبصوه وجبصوه يعني ايه
فقال عبده شمه
إذا كنت يا واكل ناسك مافاهمش عربي أعمل لك ايه
وضحك أحمد القزعة قائلاً
هي جبصوه دي عربي ما تحضرنا يا كبير
قلت
هو يا قزعة يقصد المستشار عبدالمعز إبراهيم اللي اتصل تليفونيا بالمستشار الجليل محمود شكري عشان يملي عليه القرار اللي رفضه القاضي الشريف وأعلن تنحيه عن القضية
فقال أحمد القزعة
ايوه ياكبير مانا عارف ومصر كلها عارفة الموضوع ده لكن اللي انا مش عارفه وما افتكرش أن حد في مصر كلها يعرفه هي كلمة جبصوه
فقال عبده شمه
الاكاده انك تافه زي اللي جاله يابا علمني الهيافة جاله وتعالي في الفارغة واتصدر يا ولدي
فقلت لعبده شمه
القزعة بيهزر معاك يا حاج عبده انت لسه حتعرف القزعة
قال عبده شمه
والله ياعم أحمد كانت معرفة سودا وياريتني ماعرفته
فقال أحمد القزعة ضاحكا
خلاص بقي يا غيبوبة ماتعملهاش قضية
هو أنت الواحد ما يعرفش يهزر معاك؟
فقال عبده شمه
يا جزيمة الهزار مش علي طول
قلت للقزعة
الحاج عبده النهارده مزاجه مش هو
فقال القزعة
لازم ام العيال مرنجشاه الصبح
قلت لعبده شمه
انت كنت بتسأل عن ايه يا حاج عبده؟
قال
مش القاضي الفاسد ده هو اللي كان ماسك انتخابات مجلس الشعب؟
قلت له
هو بعينه
قال
ودلوك الانتخابات دي تبجي سليمة؟
فقال أحمد القزعة
يا ابن الحرام يا غيبوبة تصدق ياكبير ان السؤال ده مهم
قلت له
ولسه أسئلة كثيرة حتنطرح ويمكن مالهاش اجابات لكن المهم ان الورق كله انكشف والشعب المصري صاحب الثورة وابو الثوار اتضحت امامه جميع الحقائق وانكشفت جميع الاوراق وانا رأيى أن ربنا سبحانه وتعالي يقف مع هذه الثورة ويريد لها أن تتم وتنتصر وتضىء الدنيا من حولها وسوف تنفذ ارادة الله وترتدي مصر المحروسة فستان الزفاف وتكون عروس الدنيا الفاتنة وسوف نغني لها
مصر يا امه يا بهيه
يا أم طرحة وجلابية
الزمن شاب وانتي شابة
هو رايح وانتي جيه