شباك علي الثورة

الثورة مستمرة

- مش عارف ليه كل ما اتخنق من حاكم عربي بافتكر ليه خالد الإسلامبولي؟
وضحك أحمد القزعة وقال:
- الله يرحمه أهو إحنا محتاجين منه دستة اليومين دول.
فقال عبده شمه:
- وه دسته كيف يعني يا جزعة؟
فقال أحمد القزعة:
- ويمكن دستة كمان ما تكفيش يا غيبوبة.
فقال شمه:
- ليه عاد دستة ماتكفيش؟ مش ع يجولوا «اضرب المربوط يخاف السايب» ركك بس واحد منيهم يجع.
قلت:
- وبعدين يا حاج عبده؟
قال:
- كلهم ع يفلسعوا.
قلت:
- علي فين؟
قال:
- علي جهنم الحمرا اللي تلمهم كلاتهم
فقال أحمد القزعة:
- الغريبة يا عم أحمد انهم منقشرين زي المرض الجلدي.
قلت:
- وبيكتروا بسرعة.
وضحك عبده شمه وقال:
- زي الأرانب عم يولدوا عمال علي بطال. شوطة من بتاعة الفراخ تاخدهم من المحيط للخليج خلينا نخلصوا عاد.
قلت:
إذا كان واحد بس في مصر بقالنا سنة مش عارفين نخلص منه.
فقال أحمد القزعة:
- اللي حاميه ودايشنا عنه هو المجلس العسكري طب نعمل إيه؟
وقال عبده شمه:
- أيوه صحيح يا عم أحمد نعمل إيه؟
قلت:
- هذا السؤال اجابته يملكها ثوار التحرير فقط لا غير.
وقال أحمد القزعة:
- ماهو ثوار التحرير لسه ما قالوش.
قلت:
- وهي الثورة خلصت؟
ضحك أحمد القزعة وقال بارتياح واضح.
- لأ لسه الثورة ما خلصتش فعلا.
فقال عبده شمه:
- وي اما كيف الاخوان بيحتفلوا بالثورة؟
قلت:
- هذا جزء من الصفقة يا حاج عبده.
فقال عبده شمه:
- وه صفقة إيه؟ وبيد مين ومين يا عم أحمد؟
فقال أحمد القزعة:
- انت لسه مافهمتش يابو خاله؟ ياخي ياريتها اتبطت عليك جابت خبرك.
وقال عبده شمه:
- صح الكلام دا يا عم أحمد؟
قلت:
- كلام إيه يا حاج عبده؟
قال:
- حكاية الصفقة اللي بين العسكر والإخوان.
قلت:
- يا خبر النهاردة بفلوس بكرة يبقي ببلاش.