وزير الطيران ردا على مقال يهاجمه: يفتي الجهلاء ويضطر العاقلون أن يردوا

علق شريف فتحي، وزير الطيران المدني، على ما أثارته سحر طلعت مصطفى رئيس لجنة السياحة والطيران المدني بالبرلمان، بشأن أحد المقالات التي هاجمته في إحدى الصحف من خلال وقائع بعدد من الشركات، قائلا : " للأسف يفتى الجهلاء و يضطر العاقلون أن يردوا، وكل واحد اشتغل في شركة طيران بقي خبير، و في ناس بتستغل دا علشان مصالح شخصية".
وأضاف الوزير خلال الاجتماع المشترك للجنتي السياحة و الشئون العربيَة، للحديث عن تنشيط السياحة البينية العربية: "أى حد شايف حاجه غلط يروح علي النيابة علي طول، وأنا أول واحد هدعمه، إنما دا مقال طبق سلطة ، حاجه حصلت في إحدى الشركات، اشترت طيارة ومعرفتش تشغلها فأجرتها لشركة تانية، وراح مدخلها بموضوع تاني خاص بالتذاكر في الخارج".
وتابع الوزير: "اتهام الناس مش لعبة ، اى حد يفكر ان الواحد بيبقى عنده ولاد، و بيقولولهم في المدارس الكلام دا، ونظرة الجيران ليك بتتغير، دا يرضى ربنا؟"، فرد عليه أحد النواب: "والله كلامك صح ، الولاد بيقولوا لولادى في المدرسة أبوكم ما بيخلصش مصلحة، علشان مفيش حد بيمضي حاجة".