كلام مسئول

محمد صلاح:يا مساء الخير طول شهريوليو بنعيش فى اجواء ذكرى الثورة ناس كتيرحضرت يوليو جه علينا فى زمن كنا بنرتب امورنا على الشهرده افتتاح بقى مشروعات مصانع وضع حجر اساس لكن ذكرى الثورة اللى هى مازالت عيدنا القومى الرسمى بتفكرنى دايما بالفلاحين اللى قل عددهم ولا حد عاد بيفلح ولا يقلع وبالعمال اللى طلباتهم فى الغلا الل احنا فيه ده كترت واجورهم ماعدتش تنفع اعياد يوليو كانت بتيجى على الناس وخصوصا العمال بحاجات جديدة كده كنا بنهنيهم عليها بقت بتيجى بمشاكل وازمات واعتصامات عمال مصر فى اجواء يوليو اللى انصفتهم ثورة يوليو تعابنين بقى من الاجور وتعابنين اكترمن الاسعار والغريب اننا عندنا مجلس اعلى للاجور بينما الحد الادنى للاجور فى مصر 164 وفين ناس بتوصله ل170 محكمة قضاء ادارى قالت فى حكم اخيرا قالت انه ضرورى ان يكون فى حد ادنى عادل للاجور قد ايه الحد الادنى العادل ده ؟ فى ناس بتكلم انه فى حدود 500 جنيه وناس وصلته ل 1200 جنيه المهم انه الحد الادنى ده انه يخلى الناس تعرف تمسك فى الاسعار اللى طالعة زى الصاروخ ملهاش سقف تفاوت الاجور وعدم تناسبها مع الاسعار بيعمل حالة احباط مش بس عند الشباب لكن كمان عند الكبارالشباب بيقول بكره تتعدل لكن الكبارعليهم التزامات كبيرة تجاه اولادهم والجزار والبقال والمدرسين والدكاترة وايجارالبيوت والمصيف كمان علشان كده هما اللى شايلين الهم وعايزين الحل- العمال عايزين الامل عايزين يبطلوا يسمعوا كلام من نوعية تسريح تهميش معاش مبكر صاحب المصنع خلع فك ادارة بتتهرب برامج خصخصة مرت علينا احتجاجا واعتصامات على رصيف مجلس الشعب والشورى ومجلس الشورى كمان والناس بقت تتفرج عليها كانها حاجة عادى الناس كانت بتقلهم باى باى كده وتعدى واتصاحبوا عليهم اللى كان ما يشترى يتفرج عن العمال وثورة يوليو هيكون لينا النهاردة كلام مسئول
تقرير
كانت ثورة يوليو عام 52 وبعد ان استقر لها حكم البلاد تعتقد ان لا امكانية لمصر فى مواجهة تطورها الاقتصادى والاجتماعى وفى حربها ضد الاستعمار بكل اشكاله سوى الارتقاء بالصناعة ومن ثم تحسين احوال الطبقة العاملة حققت الثورة مكاسب للعمال كرستها سياسيا بتخصيص 50 % من اية مجالس منتخبة للعمال والفلاحين كما سنت تشريعات لحماية العمال فى مواجهة صاحب العمل حتى بعد ان اصبح صاحب العمل هوالدولة عندما سيطرت الاشتراكيه على وسائل الانتاج كما وضعت للعمال سلسلة من التامينات ودعما تعليميا وعلاج مجانيا فيما وسعت قاعدة التنظيمات النقابية ووضعت برامج التصنيع والخطط الخمسية للنهوض بالصناعة وبعد سياسة الانفتاح الاقتصادى واتباع سياسات السوق حاولت الحكومات المتعاقبة عدم المساس بحقوق العمال لكن يبدوا ان قطارالخصصة الذى يرى البعض انه ذهب بعيدا بينما يرى اخرون انه لم يفارق اذ انه خلف العديد من الازمات االعمالية وبعد ان ضخت الحكومة استثمارت كبيرة لاصلاح الشركات والمصانع اضرت بمصالح عمالها يسعى العمال بطبيعة الحال المحافظة على مكتسباتهم التى يضمنها القانون والدستور وعلى مصانعهم التى ارتبطوا بهم بمصانعم بحياة كريمة لهم ولاولادهم مما جعل الاحتجاجات العمالية اسلوب الكثير يطالبون بحقوقهم يبدوا ان الاحتكاكات ليس خطوة اواختيار اول للعمال اوالموظفين غالبا ما يتدرج الاحتجاج من التقدم بالمظالم وغالبا ايضا ما يمريبدوا انها بدورها لم تعد قادرة وغضب العمال سيكون الخروج الى الشارع الا ان قضايا عده تغيب وسط الاحتجاجات التطوير والتدريب والكفاءة النقابية التاهيل لسوق العمل ورفع مستوى الانتاجية بحيث تكون قادرة على المنافسة تبدوا هذه القضايا غائبة بينما هذه القضايا فى ظل الازمة الحالية لحل مشاكل العمالة والتوظيف والعلاقة بين الاجور والاسعار
محمد صلاح: كانت عندنا السنة دى مظاهرات كتيرة احتجاجات اعتصامات لدرجة اتعودنا عليها لكن خلاص اختفى العمال من على رصيف مجلس الوزرا ومجلس الشعب والشورى بعد ما اترشوا بالميه واتمنع عنهم الرصيف لكن لازم نعرف بقى الاعتصامات صحيح انتهت وانتهت على ايه؟ العمال رجعتلهم حقوقهم الحكومة هتحاسب اصحاب اللى خربوها وقعدوا على تلها ؟ ولا المسالة مشينا العمال من على الرصيف والمشاكل قاعدة زى ما هى ؟ وزيرة القوى العاملة والهجرة السيدة عائشة عبد الهادى هيكون لينا معاها كلام مسئول ومن كلام الوزيرعائشة عبد الهادى الاضرابات ليست ظاهرة .. عدد الاحتجاجات العمالية التى لا ترقى الى مستوى الاضراب بلغ 150 حاله منها 49 فى القطاع الخاص بنسبة واحد الى ال1000 و13 حاله فى قطاع الاعمال العام ثم حالات الاعتصام فى مقر العمل بعد انتهاء مواعيد العمل الرسميه وبلغت 88 حالة تدنى الاجورابرزاسباب تصاعد الاضرابات والاعتصامات العمالية ممارسة العمال لحق الاضراب هو الوسيلة للدفاع عن المصالح المهنية لهم وقالت الوزيرة عائشة عبد الهادى هناك بعض التيارات السياسية تحاول الدفع يوميا بعشرات العمال ليعتصموا ويجب عدم اللعب بقضايا العمال بهذا الشكل والحكومة حريصة على حقوق العمال وحل جميع المشاكل التى تواجه .. زيادة الاجورمرتبطة بزيادة الانتاج وتلك القضية مطروحة فى المجلس القومى للاجور ومهمتة ان يضع الحد الدنى للاجر فى بداية العمل .. العمال عايزين حلول جذرية لمشاكلهم مش مجرد مسكنات لعمال شركة صحابها ساب البلد وجرى ولا موظفين ما خدوش مرتباتهم اصلا ولا موظفين ماخدوش حوافزهم العمال ليهم حقوق عايزين يعيشوا يربوا عيالهم يهتموا بتطوير قدراتهم يحققوا ارباح يقدروا ينافسوا زى ما كانه بينافسوا زمان ماهو العمال دول ياجماعه هما اللى قام عليهم وعلى سواعدهم السد العالى وزيرة القوى العاملة والهجرة السيده عائشة عبد الهادى هيكون لينا لقاء معاه كلام مسئول .
محمد صلاح:برحب بوزيرة القوى العاملة والهجرة السيدة عائشة عبد الهادى منورانا
الوزيرة/ عائشة عبد الهادى:اهلا بيك يا استاذ محمد ازيك
محمد صلاح:حمد الله السلامة احنا كنا مستنينك فى عيد العمال كنا متفقين يعنى وحصل شوية مشاكل صحية الركب بقى اخبارها ايه طمينينا وعايزين نطمن الناس؟
الوزيرة/ عائشة عبد الهادى:الحمد الله انا كويسة الحمد الله الالام بسيطة كده بس الحمد الله
محمد صلاح:من المشاوير بتاعة العمال اللى بيحتجوا كتير ؟
الوزيرة/ عائشة عبد الهادى:اه طبعا هو تعب وارهاق وشوية يعنى رواسب صحية كده اثرت شوية فى الاخر على الركبة يعنى مع انى الحقيقة انا مديتهاش الاهتمام الكامل لما حصل الالم الشديد ده فمشيت عليها فترة طويلة كان فى عزالازمة فالواحد تعب فيها يعنى
محمد صلاح:الحمد الله الركب دلوقتى احسن يعنى الركب حديد يعنى ؟
الوزيرة/ عائشة عبد الهادى:لا مش حديد ولا حاجة لكن كويسة الحمد الله الركب ركب
محمد صلاح:الركب ركب برضه الوزير يعنى فى اجواء شهر يوليو واجواء الثورة بعد اللى شوفناه فى كام اسبوع الل فاتوا او كام شهر او الكام سنة اللى فاتوا ايه اللى باقى للعمال من مكتسبات ثورة يوليو ؟
الوزيرة/ عائشة عبد الهادى:لا بقالهم حاجات كتير مفيش حاجة اتاخدت اصلا من مكتسباتها علشان نقول نلاقى حاجة المكتسبات موجودة لان القوانين والتشريعات دايما بتشير للمكتسبات التى تمت اللى حصل عليها العمال يعنى قانون 203 اللى هو خاص بقانون قطاع الاعمال العام فى مواد الاصدار بتاعته بتنص على الحفاظ على كافة المكتسبات
محمد صلاح: اصل لو حد بيشوفنا دلوقتى زى الستينات والخمسينات
الوزيرة/ عائشة عبد الهادى: العمال كانوا قد ايه فى الخمسينات والستينات والعمال قد ايه دلوقتى ؟ التركيبة الاقتصادية اللى كانت موجودة فى الستينات والتركيبة الاقتصادية اللى موجودة دلوقتى
محمد صلاح:يعنى قصدك الزيادة والكثافة فى الاعداد خلقت مشاكل ؟
الوزيرة/ عائشة عبد الهادى:التركيبة الاجتماعية اتغيرت والمطالب والطموحات بتعلى مش بتقل محمد صلاح: طب خلينا نبقى على ارض توقع شوية يعنى من كام اسبوع ومن كام شهركده بدات ظاهرة الاحتجاجات والاعتصامات بدات فى المصانع اوفى الاماكن نفسها او فى مقر الشركات ثم نقلت الى مجلس الشعب ومجلس الشورى وبعدين رشوا ميه رشوا الناس يعنى هى الناس مشيت والمشاكل بقيت ؟ ولا الناس مشيت والمشاكل اتحلت ؟ انا عايز اقول لحضرتك مش بس من شهرين تلاته الاعتصامات والاضرابات بدات يمكن من فترة طويلة انتى جيتى الوزارة وجبتى الاعتصامات ولا علشان تحلى الاعتصامات ؟
الوزيرة/ عائشة عبد الهادى: انا مجتش وجبت الاعتصامات انا جيت فى مناخ الحراك السياسى فيه بيسمح بان الناس تعبرعن رايها وان الناس لقت ان فيه مناخ بيسمح ليهم مش انا اللى سمحت للمناخ ده المناخ ده موجود
محمد صلاح :هى دى حاجة تخوف ؟
الوزيرة/ عائشة عبد الهادى:لا المناخ موجود مش انا صاحبته لكن انا مستفيدة منه مستفيدة من المناخ الديمقراطى من الحراك السياسى اللى موجود فى مصر
محمد صلاح:زمان يا فندم يعنى زى ما بنشوف فى افلام فترة السبعينات والستينات لما اتنين عمال يقعدوا .... الاحوال كذا والموضوع كذا كانه بيقبضوا عليهم
الوزيرة/ عائشة عبد الهادى: فانا مستفيدة منه كمواطنة مصرية انما كوزيرة دا عبء عليَ عبء كبيرة لاكترمن سبب السبب الاول انى انا ورثت تركة كبيرة فيها تراكمات ومشاكل يمكن معظم المشاكل اللى كانت موجودة زى النوبارية والمعدات دى تراكمية انا مش مسئولة عنها انا لا بعت ولا اشتريت فانا توسط وخدت اشواط كبيرة جدا فى حلها يعنى الحراك السياسى ده خلى عند العمال رغبة فى انهم نعمل زى ما حصل فى المحلة فى كفر الدوار وانا اتكلمت فى المسائل دى قبل كده النقلة اللى حصلت دى ليها سببين السبب الاول تدخل المجتمع المدنى بشكل او باخر فى التيارات السياسية بمحاولة تضخيم حجم المشكلة
محمد صلاح :يعنى تضخيمها منظمات مجتمع مدنى زائد التيارات السياسية ضخمت المشكلة ولا حرضت العمال ؟
الوزيرة/ عائشة عبد الهادى: لا تقدر تقول الاتنين
محمد صلاح:انا بدورلك على الحلول
الوزيرة/ عائشة عبد الهادى:لا لا لا انت عارف انى انا صريحة انا قلت فى منظمة العمل الدولية المرة دى انا قلت انه البيانات والمعلومات التى وصلت للمنظمة معلومات مضللة والغرض منها هو زعزعة الاستقرار فى مصر
محمد صلاح:يعنى الحملة كانت كبيرة على مصر يعنى ؟
:الوزيرة/ عائشة عبد الهادى: لا مفيش حملة كبيرة علينا احنا ورقنا واضح ومحدد يعنى انا هقول لحضرتك عن حاجة احنا فى ظل الازمة المالية فى العالم كله وانا رحت مجتمعات دولية كتير كله خفض الاجور مصر الوحيدة اللى زودت الاجور مش شهادة دى ولا ايه ؟ اللى خفض اجوره 5% و10 % واللى وقف الاجور واللى جمد الاجور احنا فى مصربالعكس احنا فى مصرالسنة اللى قبل اللى فاتت سياد الريس قال الزيادة 30 % والسنة اللى فاتت 15 والسنة دى 10 فاحنا فى مراعاة للبعد الاجتماعى مراعاة للظروف المعيشية لان فعلا الاسعار بتزيد والتكلفة بتزيد والناس بتبقى عندها رغبة فى الزيادة يعنى
محمد صلاح: يعنى فيه حاجتين يعنى المجتمع المدنى او المنظمات وكذلك الازمة المالية
الوزيرة/ عائشة عبد الهادى:بعض المنظمات المدنية دى فى سجل الدولة فى برنامج محترم تتولاه هذه المنظمات تمول من الخارج فى منظمتين بيتم تمويلهم من
محمد صلاح: حضرتك رصداهم ؟
الوزيرة/ عائشة عبد الهادى: اه رصداهم وعارفاهم وهى الناس فى مصر طيبة طيبة بدون شك لا عندها اتجاهات سياسية يعنى هو عايش يومه عايش يعيش وعايز ياكل وعايز ناس تشوف مصلحته الناس بقى عندنا كانه 4 مواقع هما اللى عاملين الازمة دى مش كده ؟ كانت شركة عادل اغا وامين ذكرى وشركة المعدات التليفونية وشركة النوبارية وشركة الكتان
محمد صلاح: بتاعت الحكم الاخير ده هنتكلم فيه
الوزيرة/ عائشة عبد الهادى: هنتكلم فيه الشركات دول هقولك انا النوبارية دى
محمد صلاح :حواليهم كده 70 شركة فى حتت تانية
الوزيرة/ عائشة عبد الهادى : لا 100 مش 70 بس اتعملهم اتفاقيات مش 70 ، 100 اكتر من 100 كمان بس فى وقتها بنروح بنقعد مع صاحب العمل والتنظيم النقابى وبننهى المساله
محمد صلاح : الاربعة دول ؟
الوزيرة/ عائشة عبد الهادى : الاربعة دول شركة واحد صاحبها اللى هو عادل اغا ده خلع وكان عليه قروض بحوالى 240 مليون جنيه لبنك القاهرة مع الفوايد بتاعتهم وصلوا مليار وشوية الحكومة صرفت صرفتلهم 12 شهر اجر وبنك مصر صرفلهم 12 شهر اجروهذا خلاهم يشتغلوا فترة طويلة هما اللى سيروا الشركة وانتجوا وحاولوا ان هما يمشوا الشركة يعنى شوف بقى من 2006 ل 2010 تم فصلهم هما اللى بيشغلوا الشركة بنك مصر طبعا هو اكبر بديل للشركة عملنا اتفاق معاه على ضوء امكانياته ان هو يخصص مبلغ للمعاش المبكر علشان نبدا نسوى القانون بيقول ايه القانون بيقول فى حالة التصفيه او فى الحاله دى بحدد شهر ونص عن كل 5 سنين الاولانيه وبعد كده شهرين عن كل سنه احنا خدنا 50 مليون من البنك وعملنا حساب انه لم يتم التصفيه والشركة تتباع والاملاك بتاعته تتباع اذا فضل مبلغ يبقى ندفع للعمال ادى حاله الحاله التانيه النوبارية النوبارية قدمنا بلاغ للنائب العام احنا تم التحفظ على المستثمر ده 3 مرات شركة النوبارية دى هو مستثمر مصرى امريكى مراوغ جدا
محمد صلاح : مراوغ ؟
الوزيرة/ عائشة عبد الهادى : جدا فشلت معاه كل المحاولات انه هو يلتزم بلغنا النائب العام فى حكومة تبلغ النائب العام ؟ فى حد عمل كده قبل كده ؟
محمد صلاح : الحكومة هتعمل ايه يعنى ؟
الوزيرة/ عائشة عبد الهادى : بسال يعنى فيه حد عمل كده قبل كده ؟ مفيش
محمد صلاح :انتوا بقيتوا تبلغوا النائب العام دلوقتى
الوزيرة/ عائشة عبد الهادى : بلغنا النائب العام وفعلا ثبت ان هو راجل مراوغ وكده تم التحفظ على املاكه واملاك زوجاته عنده زوجتين وعلى اولاده وكده
محمد صلاح : علشان كده يمكن دا كان السبب يعنى ؟
الوزيرة/ عائشة عبد الهادى : دا رفع عليا 100 قضية المستثمر ده
محمد صلاح : المراوغ ؟
الوزيرة/ عائشة عبد الهادى : اه المراوغ انا بقول اهو مراوغ اهو المستثمر التانى بتاع الكتان دا راجل وقع تحت ايدين ناس ميعرفوش ربنا مصريين للاسف الشديد ضللوا الراجل ضللوه هو قاعد فى السعوديه وانا عايز اقولك انه بعد الحكم احنا وصلنا دا اول حد يعرف الحكاية دى تم التوصل معاه لتحسين اوضاع العمال واللى عايز يطلع المعاش المبكر زودناله المعاش المبكر وخدنا كل ما هو من استقرار انا مش عايزه ان انا اكون سبب فى قفل مصنع انا عايزه اكون سبب فى فتح مصنع ففى اتفاق علشان اعيد فتح المصنع مره تانيه واريح الامور بشكل كامل فضلت المعدات التليفونيه المعدات التليفونيه دى اتباعت سنة كام ؟ سنة 99
محمد صلاح : اتباعت من مين لمين ؟
الوزيرة/ عائشة عبد الهادى : اتباعت لمجموعة
محمد صلاح : اتباعت من مين ؟
الوزيرة/ عائشة عبد الهادى : من الشركة القابضة
محمد صلاح : يعنى خصخصة يعنى ؟
الوزيرة/ عائشة عبد الهادى : ما هو الكتان خصصة والنوبارية خصصة
محمد صلاح :وعمر افندى خصخصة عندنا خصخصة كتير .
الوزيرة/ عائشة عبد الهادى : فالمعدات التليفونية الحقيقة الدكتور احمد نظيف قعدنا مع الدكتور طارق كامل اخدنا اللى عايز يروح الشركة المصريه للاتصالات يروح لما جينا نعمل الدراسة بقى الاجور كان فيه تفرقة بين العمال اللى اتنقلوا من قطاع الاعمال الى القطاع الخاص وفيه عمال اتعينوا فى ظل القطاع الخاص عنده مثلا 79 واحد مرتباتهم اكترمن 15 الف جنيه فى الشهر
محمد صلاح : الواحد؟
الوزيرة/ عائشة عبد الهادى : اه الواحد العمال فى القطاع العام يعنى اقصى حاجة 4000 لما جينا عملنا دراسة ما انت برضه مش هتنقل مشكلة لمكان جديد يعنى واحد يرحلوا فى نفس الوظيفة دا بياخد كذا ودا يعنى هيعمل مشكلة هناك فقلنا ناخد اللى هما ايه متكافئين اللى اجورهم تتقارب مع الاتصالات فيه بقى مجموعة قالت احنا مش عايزين نروح اما بقى اقوى المعوقين فى القضية اللى احنا شغالة فيها دلوقتى رئيس اتحاد المساهمين ورئيس النقابة
محمد صلاح : ازاى وليه ايه مصلحته فى كده ؟
الوزيرة/ عائشة عبد الهادى : هقولك مصلحتهم لان هو لما الشركة ميبقاش فيها حد مش هيبقى فيه شركة اصلا
محمد صلاح : اه هيشيلوا العده
الوزيرة/ عائشة عبد الهادى : للاسف الشديد انا بقول اهو احنا عندنا صندوق للطوارىء صندوق الطوارىء ده بيساعد انا ساعدت بيه المعدات التليفونية ساعدت منه شركة ايران للغزل والنسيج كانت هتقع فلحقتها ايران للغزل دى فى السويس دى شركة ايرانية - مصرية لحقتها فى وقت شركة اندروما فى شبين الكوم
محمد صلاح :ما انا بقول لحضرتك 70 ، 80 شركة حضرتك بتقولى 100
الوزيرة/ عائشة عبد الهادى : اه فى لحظتها لحقناها يعنى عايزاقول لحضرتك ايه ان احنا لا كسلنا ولا تراجعنا و لاتقاعسنا
محمد صلاح : ايوه بس واضح كده
الوزيرة/ عائشة عبد الهادى: ان وزارة القوى العاملة عمالة تشيل اخطاء شركات تانية من قبل ما الشركة بالشكل ده مش المفروض يكون فيه حسابات تبيع شركة تابعة للحكومة اوللدولة لمستثمرة اواكتر واضح كده انه معظم الشركات اللى اتباعت حصل فيها مشاكل كبيرة يعنى
محمد صلاح : ازاى تقيمى اخطاء الشركات اللى اتباعت؟
الوزيرة/ عائشة عبد الهادى : اقيم ايه ؟
محمد صلاح: يا جماعة وقفوا الخصصة شوية
الوزيرة/ عائشة عبد الهادى : اصل محدش ينكر
محمد صلاح: اصل بصراحة انا بحب صراحتك
الوزيرة/ عائشة عبد الهادى : محدش ينكر لكن فيه تجارب ناجحة لا فيه لو تحب ان انا اعددلك لا فيه تجارب ناجحة وكويسة
محمد صلاح: قصدك قبل الخصخصة ما كنتش موجودة النوعية دى من المشاكل الاول المصنع لما كان بيخسر الدولة هى اللى بتتحمل
الوزيرة/ عائشة عبد الهادى : يعنى 33 مليار جنيه شركات قطاع الاعمال فى الفترة اللى فاتت ليه بقى ليه بقى لما هو كان صاحب القرار هنا فبيعنل ايه يسحب على المكشوف وهات من البنك وارضى الناس وبتقول الناس كانت قبل كده ما بتعملش اضرابات ليه ؟ لانه كان اى واحد مريح دماغه اه مش صاحب مال ييح دماغه ويروح ايه ساحب من البنك وبس
محمد صلاح: طيب الوزير مش دا برضه يرجعلنا للسؤال الاول انه دا من الحاجات اللى اهدرت حقوق العمال انه الخصخصة دى احد اسباب ماسى حصلت لعمال وثورة يوليو كانت بتتبنى الفكر الاشتراكى -الدولة لوسائل الانتاج حتى لما كان بيحصل بتخسر شركة او مصنع بيخسر كانت الحكومة بتتولى العمال
الوزيرة/ عائشة عبد الهادى : طب ما فيه صندوق
محمد صلاح: الصندوق هيكفى مين ولا مين ؟
الوزيرة/ عائشة عبد الهادى : المسالة مناخ مختلف وظروف اقتصادية مختلفة كنت بتحل على حساب ايه ؟ على حساب مودعين على حساب بنوك ممكن انها تنهارانا اصلا اميل الى الفكر الاشتراكى طبيعة تكوينى لكن انت لما تيجى تقيم الاداء قد يكون هناك اخطاء خلال الفترة الانتقالية دى قطاع الملابس انه هو يطور نفسه ان مثل هذه الشركات لم تساعدها زى شركة الغزل والنسيج تتحط فى البرنامج على انها تتباع فخلاص فضلت واقفة لا تطوير ولا تبديل شباب ولا المسائل دى وكانت النتيجة انك بتدفع اجور من غير عمل ومن غير عائد فبقت الديون علينا كتيرة مشكلة هذه المواقع هى مشكلة ادارة
محمد صلاح: ولا ادارة ؟
الوزيرة/ عائشة عبد الهادى : الاتنين المشكلة مشكلة ادارة لانها لم تكن ادارة تشعر باهمية المال العام ومشكلة ملكية لانك انت ما كنش عندك ضوابط للاقراض وضوابط للصرف وبالتالى كانت المساله هنا المصالح كانت مصالح يعنى مش متضاربه بقدرما كانت هى مصالح مرضية للاطراف كلها
محمد صلاح: لا الادارة ولا الملكية لما كانت الدولة بتسيطر على وسائل الانتاج وكده يعنى وبعدين لما خصخصناه وقعت
الوزيرة/ عائشة عبد الهادى : كانت لسياسات قبل كده احنا الحكومة هنا مفيش خصخصة
محمد صلاح: مفيش خصخصة علشان الخصخصة عملت مشاكل
الوزيرة/ عائشة عبد الهادى : عملت مشاكل؟
محمد صلاح:هقول لسه الكلام ما خلصش وهرجع تانى لسه الكلام ما خلصش
فاصل
محمد صلاح: بيبقى جميل لما يكون ضيف وخصوصا لو كان وزير يقر انه فيه اخطاء حصلت بيريحنا يعنى بنقعد نجادل معاه بس بنتكلم بقى بتتعالج ازاى الوزيرة فى نفس الاطاركده ثورة يوليو ومكتسبات ثورة يوليو والعمال واللى حصلهم معايا ملف عن الموضوع ده من النائب مصطفى بكرى وانت عارفه بقى مصطفى بكرى
الوزيرة/ عائشة عبد الهادى : قوى قوى
محمد صلاح:نشوف مصطفى بكرى هيقول ايه .
النائب/ مصطفى بكرى*رئيس تحرير جريدة الاسبوع* لا شك ان الخصخصة كان لها تاثيرها السلبى على العمال وعلى حقوقهم حقوقهم سواء كانت حقوق فيما يتعلق بالعمل او استمراريته او الحوافزاوايضا فيما يتعلق بالمكتسبات الذين حصلوا عليها فى العديد من قوانين العمل الخصصة الحقيقة تجسدت اثارها السلبية فى العديد من المصانع على وجه التحديد ربما كانت المصانع المشتعلة بالازمات والمشاكل هى التعبيرعن هذه الازمة مثلا هناك عمال اسمنت اسيوط حتى الان لا يستطيعون الحصول على صافى الارباح المحدد لهم بمقتضى اللوائح هناك عمال فى مصانع عديدة انتقلت للخصخصة معرضون للتشرد معرضون للاحالة للمعاش المبكر بشروط مجحفة مثلا شركة عمرافندى بنود التعاقد 11 و 12 و13 و14 تنص على حقوق طبيعية سواء كان للعمال اوكان للشركة او كان للتطوير المستثمر الرئيسى باى من هذه الشروط يبقى الوضع على ما هو عليه شركة المعدات التليفونيه يمكن : الوزيرة/ لها دور مهم جدا هى الحقيقة على صعيد حل هذه المشكلة العمال شهور طويلة بدون اى مرتبات اللهم الاعانه التى تقدمها وزارة القوى العاملة المعاش المبكر احدثت اثار سلبيه جدا فى المجتمع المصرى الواحد ياخدله 20 الف ولا 30 الف يجيبلوا تاكسى ويبوظ او ]ضطر يجيب تلاجه او يجوز بنت ويبقى فى البيت وهكذا الحال فانت اضفت للبطالة مزيد من البطاله طبعا العديد من هذه الشركات كانت شركات ناجحة شركات ناجحه معنى كده انها كانت تنعكس بالايجاب على العمال وعلى اوضاعهم وعلى حقوقهم وعلى حوافزهم وعلى صافى ارباحهم لكن للاسف مع الخصخصة تحولت الشركات الى خراب
محمد صلاح : يعنى قبل ما يتكلم الاستاذ مصطفى بكرى كنا بنتكلم مع : الوزرة السيده عيشه عبد الهادى عن الشركات اللى اتباعت اللى اتخصخصت يعنى فتقريبا فهمت من كلام : الوزير انه معظمها كانت شركات خاسرة يعنى
الوزيرة/ عائشة عبد الهادى : شركات مخسرة حضرتك عارف طبعا انه شركات قطاع الاعمال كان بيفرض عليها سعر اجتماعى يعنى مثلا شركات الغزل والنسيج كانت بتستخدم الاقطان طويلة التيله الكستور والدمور
محمد صلاح : الكستور والدمورمدعوم
الوزيرة/ عائشة عبد الهادى : بالظبط كده وكانت بيفرض عليها سعر معين فطبعا هى خسرت فانت عندك مثلا قطاع زى قطاع الدوا ومازال فى القطاع العام من احسن ما يمكن
محمد صلاح : ومفيهوش لا اضرابات ولا اعتصامات
الوزيرة/ عائشة عبد الهادى : لا فيه اى حاجة قبل كده كان فيه ادارة وحشه وكام فيه مشاكل اتغيرت الادار واتظبطت الامور فى نجع حمادى شركات السكر لا ما احنا عندنا نمازج مثلا شركة الاسمنت فيه كتير جدا نمازج كويسه كانت اصلا قطاع عام وبعدين بقى فيها مشاركة لما احنا نسترجع شويه انت رجعتنى للحنين للثورة لما نسترجع المكتسبات كان الحد الادنى للاجر25 قرش يعنى حاجة بالنسبالنا كان شيىء جميل انا كنت باخد 14 قرش
محمد صلاح : فى الايه ؟
الوزيرة/ عائشة عبد الهادى : فى اليوم فلما ياخد 25 قرش طفرة لما نيجى بقى للمشاركة فى الارباح كانت 10% من الربح لما يجيى مثلا يقولك ساعات العمل 7 ساعات عمل المشاركة فى الادارة لما تيجى تشوف هى دى كانت المكتسبات و50% عمال وفلاحين وكده هى دى المكتسبات الحد الادنى للمرتبات احنا دلوقتى محتاسين فى الحد الادنى محتاسين فيه ليه ؟ لان سوق العمل عندك سوق العمل عندك سوق متناقض الهوه كبير جدا بين القطاعات المختلفه وبين القطاع العام والقطاع الاستثمارى وكده دى ضريبة السوق المفتوح لما تيجى تقول المشاركة فى مجلس الادارة اه ما زالت المشاركة قائمة احنا بنعمل انتخابات مجلس الادارة ولسه بعمل انتخابات الطيران شركات الطيران مصر للطيران الشركات القابضه يعنى عايزه اقول لحضرتك انه المكتسب موجود ما اتشلش المشاركة فى الربح هو دا اللى حصل عليه خلاف يعنى شركة زى شركة الاسمنت اللى اتكلم عليها : النائب دى بتربح فيه خلاف انا بقول لا هما من حقهم فيه قضية
محمد صلاح : قوليلى ايه حكاية القضايا دى ؟ انت لجات فى موضوع الكتان للقضاء للنائب العام لما تحسى انه مفيش امل يعنى
الوزيرة/ عائشة عبد الهادى : ما انا بناقش حالة الكتان دى بقالى سنه بناقش حالة النوبارية بقالى 5 سنين فى حاجات انت بتلجا للنائب العام فى حالة ما بتفقد كل الوسائل الشرعيه والقانونيه اللى من شانها حالة الحوار فهى الحالة اللى ممكن التفاض هو اللى يوصلك لنتيجة لما انت بتفقد دى خالص فبضطر انك تلجا لى كده قد يكون ده فى بعض المدارس يقولك انه دا ضرب للاستثمار
محمد صلاح : لا دا استقرار للاستثمار
الوزيرة/ عائشة عبد الهادى : انا برضه اقول كده لا لا لا دا استقرار ليه بقى اللى عايز يجيى يشتغل فى مصر لازم يحترم قوانينها ويحترم عمالها واللى بيشتغل فى مصر لازم يحترم القوانين والتشريعات و لا يفرط النهارده فى حق اى عامل فى بلدى
محمد صلاح : هفرط فى حق بلدى
الوزيرة/ عائشة عبد الهادى : بالظبط كده هى دى القاعدة اللى انا بنطلق منها يعنى وانا حاسة ا،وا دا صح مش بعمل حاجة غلط
محمد صلاح : هما العمال يعنى اللى بيعملوا اضراب واعتصام بيبقوا نايمين والصبخح بيقولو يلا نعتصم
الوزيرة/ عائشة عبد الهادى : انا هقولك خطوات كده علشان نحط الظاهرة فى حجمها الطبيعى انت عندك كام مليون عامل فى مصر ؟ 23 مليون عندك كام منشاه؟ اكتر من 4 مليون منشاه لما يكون عندك مشالكل فى 5 ، 10 ، 100 منشاه دا مش ظاهرة دا طبيعة الاحوال يا استاذ محمد
محمد صلاح : امال ليه كل الناس بتتكلم عليها ؟
الوزيرة/ عائشة عبد الهادى : لانها دى طبيعة العلاقات ولان الاعلام الحقيقة ييعنى بوظلنا الدنيا بصراحة الفضائيا اه والله انت عارف قبل الولاد ما يووا على الاضراب تكون الكاميرات سبقاهم
محمد صلاح : قبل الاضراب ؟
الوزيرة/ عائشة عبد الهادى : قبل الاضراب انا بقولك الكاميرات سبقاهم ويتكلموا فيها
محمد صلاح : بس انا عايزاقٌولك حاجة انا هحن للمهنة يا سيادة الوزيرة برضه انا بقول اسميحلى يعنى انه الاعلام بيبحث عن الحدث يعنى بالتالى لما هيحس انه عمال الشركة دى غاضبنين او زعلانين او ناويين يضربوا الطبيعى انه يروح
الوزيرة/ عائشة عبد الهادى :مش كل الاعلام لا لا لا فيه اعلام موضوعى وفيه اعلام محرض
محمد صلاح : يعنى يخلى الناس يضربوا علشان يصورهم ؟
الوزيرة/ عائشة عبد الهادى : ممكن تتناول المسالة من كل وجهات النظر وتصل الى نتيجة حجم هذه القضية وتعرضها وامكانية حلها ايه ؟ وفيه بقى ان انت تحط شوية غازعلى الكبريت وتولع الدنيا هو دا يعنى احنا دلوقتى شغالين وبنحل الحمد اللى الناس بتدورعليه
محمد صلاح : طبعا حضك متابعة حكم القضاء الادارى اللى اتكلم على ضرورة وضع حد عادل مرتبات انتى شايفة ممكن يبقى كام وصلتها لى 1200 قبل المسقعة والحاجات الحلوة دى
الوزيرة/ عائشة عبد الهادى : تانى تانى
محمد صلاح : يعنى بتعرفى التكلفة يعنى الفلفل بكام والبدنجان بكام واللحمة المفرومة والحاجات اللطيفة دى الحد الادنى للاجورمن وجهة نظرك يبقى كام علشان حد يعيش عيشة كريمة
الوزيرة/ عائشة عبد الهادى : شوف فيه معاييردولية
محمد صلاح : اصل احنا بنخرج المعايير بقى خلينا
الوزيرة/ عائشة عبد الهادى : ما هو انا بقولك اهو فيه حاجة اسمها سلة الغذاء عارفاها طبعا
محمد صلاح : بس السلة بتاعتنا فاضية
الوزيرة/ عائشة عبد الهادى : وانا عايشة مسالة الاجور فى مصر انت عندك حاجة عامل بيشتغل فى دكان بقال هوالمجلس القومى للاجور مطالب بايه ؟ بوضع حد ادنى على المستوى القومى يعنى دا للاسترشاد بيه انا عندى شركات دلوقتى بتطلب عماله ب1000 جنيه فى الشهر وب800 جنيه فى الشهر
محمد صلاح : حضرتك بتعتبرى دا كويش يعنى 800 جنيه دا كتير حلو يعنى ؟
الوزيرة/ عائشة عبد الهادى : اه كويس انا اكدب عليك لواقولك انا احدد حد ادنى لكن على الاقل على الاقل فى الحكومة 500
محمد صلاح : فى الحكومة 500 خليكى معايا بقى يا سيادة الوزيرة هنشوف بقى الحد الادنى
فاصل
محمد صلاح : الوزيرة بتقولى انه 500 جنيه كويس يعنى دا عاشان فرد ؟
الوزيرة/ عائشة عبد الهادى : دا علشان شخص فى بداية حياته فى وظيفة حكومية او فى محل او فيه مصنع 500 جنيه دى لى ايه للى بيشتغل من غير مؤهل ولا عنده حاجة اقل حاجة
محمد صلاح : طب عندنا تقريركده عملناه لاهالينا فى الشارع نشوف الناس هتقول ايه ؟
الوزيرة/ عائشة عبد الهادى : نسمع الناس واحنا عندنا حاجة غير ان احنا نسمع الناس
محمد صلاح : طب ياللى نسمع الناس طالما معندناش حاجة غير انه احنا نسمعهم نسمع الناس
تقرير
مواطن : هى المسالة مش مسالة هتقبض كام 2000 جنيه ، 10000 جنيه المهم انت هتصرف كام انت النهارده اكلك بكام شربك بكام الدولة هدعمك بكام ولا مش هدعمك بكام يعنى فاهمنى انت ازاى هى الفكرة فى كده الدولة عارفة الانسان فى مصر محتاج يعيش بكام
مواطن : انا من وجهة نظرى يعمى ما يقلش عن 2000 لانه النهارده الشاب من دول عايز يتجوز طب هياخد شقة بكام فيه النهارده ايجار شقه اقل من 500 جنيه مفيش النهارده هناكل بكام فى الشهر ؟ ولا كان مثلا بيعول والده او والدته او اخواته عايزيساعد فى جهاز اخواته البنات هيساعدهم منين ؟
مواطن : المرتب ما اعتقدش يقل من 1500 الى 2000 علشان انه هو يوفى متطلبات بيته من اكل من شرب من علاج من مدارس من دروس خصوصية من مواصلات يعنى الحد الادنى يعنى دا او الحياة اصبحت لا تطاق
مواطن : والله الايام دية ما يعتبرش فيه حاجة اسمها الحد الادنى للاجور يعنى الموظف اللى بيشتغل بياخد 400 جنيه وفيه موظفين بياخدوا 300 جنيه فى الشهر دا هيعيش ازاى حتى بالنسبة للاعمال الحرة كلها بتتخنق دلوقتى يعنى لومثلا حد بيكسب ال1000 جنيه فى الشهر دلوقتى ما بيعرفش س يكسب ال1000 جنيه فى ظل ارتفاع الاسعار المهول واللى للاسف الدولة مش قادرة تتحكم فيه باى شكل من الاشكال
مواطن : يعنى هنقول ايه جشع التجار ماشى انما فى الاخر خالص انه الدولة مش قادرة تسيطر على ارتفاع الاسعار كل السلع كل الخدمات الككهرباء زادات الميه زادت السلع الغذائية زادت الخدمات زادت التليفونات زادت هل يعقل انه سلعة خدمية تتاخد على ضريبة مبيعات ازاى ؟ واحد ممكن يتكلم فى ال3 تشهر اللى هى قيمة الفاتورة بيتكلم ب19 جنيه 36 جنيه تامين بس فى التلت تشهر مين يقول كده ؟ مين فى الاسعار دى وفى ظل البطاله وفى ظل المشاكل اللى مصر فيها يعنى نهار ما تقول مثلا اسرة مكونة من 3 تنفار او 4 تنفار راجل وزوجته وولد وبنت مثلا مش ممكن باى حال من الاحوال دا لو حياة عادية كده يعنى بدون دروس خصوصية دا اقل حاجة يعنى
محمد صلاح : الراجل بيقول ......
الوزيرة/ عائشة عبد الهادى : طب ما احنا مغلطناش يعنى
محمد صلاح : الراجل بيقولك انه الكهربا زادت والمية زادت وبالتالى مش حد ادنى بس ما انا ممكن اخليه 2000 جنيه
الوزيرة/ عائشة عبد الهادى : والتضخم يزيد والاسعار تزيد هى هى هو المجلس القومى للاجور والاسعار لان هو بيعمل نوع من التوازن بين الاجور والاسعار هو مهمته دى مهمته الاساسية المجلس فيه مجموعة من الخبراء وفيهم ممثلين للاتحاد العمال المصريين واصحاب الاعمال والغرف التجارية فهما هنا المفروض يتفقوا يعنى الدولة نا ليست طرف فى تحديد
محمد صلاح : عمرما حد سالك يا سيادة الوزيرة ان الاسعار هتزيد وتاثيرها على العمال وعلى دخول العمال ؟
الوزيرة/ عائشة عبد الهادى : لا مفيش
محمد صلاح : هما يزودوا وبتاع وتروحى بقى تجرى والاعتصامات والاحتجاجات
الوزيرة/ عائشة عبد الهادى : يعنى هكدب عليك ربنا يقدرنى
محمد صلاح : الناس فى فترة من الفترات لما حصل انفتاح حبت تسيب شغل الحكومة وتجرى وتقولك بنك استثمارى وشركة استثمارية شغل استثمارى يعنى وبعدين بعد الخصخصة لقينا الناس عمالة تجرى من الاستثمارى ده طبعا الدولة وقفت التعين من سنة 81 الا فى ظروف معينة بالطلب يعنى دلوقتى الناس كلها عايزتسيب الشركات الاستثمارية لانها يا اما بتخفض يا اما واقفه زى ما هى يا اما معدش بيدى الفرق الكبير ما خلينا بقى مع الحكومة اضمن المعاشات والتامينات اضمن ما اتفنيشى صاحب المطعم ما يخلعشى مش كده ولا ايه ؟
الوزيرة/ عائشة عبد الهادى : شوف انا هقول لحضرك على حاجة انت عارف دلوقتى الشباب عايز يشتغل فى 4 قطاعات فى الاتصالات والبترول والكهرباء والمالية هو مش عايز الحكومة معدش فيه حكاية انه عايز يشتغل فى الحكومة دى دى نمرة واحد
محمد صلاح : لا ما هو البترول حكومة والمالية حكومة والاتصالات تبع الحكومة
الوزيرة/ عائشة عبد الهادى : بس ليهم كادرات خاص نمرة اتنين احنا كل شهر بنطلع نشر بالوظائف انا من اسبوعين كده عملنا حلاقة وجبت رجال الاعمال لان انا عندى مشكلة تانية مع رجال الاعمال ايه هى المشكلة؟ المشكلة ان هما عايزين يجيبوا عمالة من الخارج
محمد صلاح : ما انا كنت هكلمك ما الصينيين ملو البلد والهنود وبنجلادش بقى
الوزيرة/ عائشة عبد الهادى : طب ليه بقى دللوقتى الشركات دى عايزة عمالة ومش لاقيه عمالة
محمد صلاح : امال ايه الناس اللى قاعد على القهاوى ؟
الوزيرة/ عائشة عبد الهادى : مش عايزين يشتغلوا فى المصانع
محمد صلاح : امال بيطلعوا يتكلموا فى البرامج ليه ؟
الوزيرة/ عائشة عبد الهادى : ما احنا بنقول اهو تعال اشتغل فى المصنع هو مش عايز يشتغل فى المصنع وبعدين قلت لرجال الاعمال اطلعوا قولوا انه انتم هتامنوا عليهم وانه انتم هتخلوهم وان انتم كذا فطلعوا وقالوا الكلام ده انا عندى على الاقل مش اقل من 50 ، 60 الف وظيفة مطلوبة فورا بس فين بقى ؟ فى المناطق الصناعية المدن الصناعية فى المناطق الحرة الناس مش عايزة تنقل يعنى يتنقل من مكان يروح لمكان تانى
محمد صلاح : امال بتاع بنجلادش بيجى وبينقل ؟
الوزيرة/ عائشة عبد الهادى : ما هو بتاعنا برضه ده بيطلع برا وبيروح الاردن وبيروح السعودية وبيروح ليبيا وبيروح يشتغل اى حاجة ومش عايز يشتغل هنا
محمد صلاح : يعنى قصد حضرتك دقتى عندنا وظايف ومش لايقين عمال وعندنا عمال مش لاقيين وظايف؟
الوزيرة/ عائشة عبد الهادى : يعنى اديك مثل وانا عندى مشكلة دلوقتى اونا يبقى معاه بكالوريوس تجارة ويطلع بتاشيرة عامل وبيروح يشتغل لما تيجى مثلا تقولوا تعال اشتغل فى مصنع يقولك لا انا ما اشتغلش ليه ؟ نرجع تانى لثقافة المجتمع وانه الثقافة السايده انه تعلى من قيمة اللى بتسموه ذوى اللياقات البيضاء
محمد صلاح : اصحاب اللياقات البيضاء اللى ما بيتعبوش فى الشغل اللى ما بيعرقوش فى الشغل
الوزيرة/ عائشة عبد الهادى : ومعلتش من قيمة اللياقات الزرقا المهنى والفنى والصنايعى ده العمل الاارى اكتر ما بتعلى قيمة العمل المهنى قيمتة الاجتماعية بتقل فى المجتمع انت بتدى خريج دبلوم الصننايع قيمة اقل من خريج دبلوم التجارة بتعلى قيمة الادارى عن المهنى دى مسالة ثقافة مجتمع اللى يغيرها مشا انا ولا انت النهاردة اللى يغيريها كل الناس يعنى انا عندى مصنع بينتج احدث انهع النجف والكريستال وطالب 10000 عامل ب 1000 فى الشهر غير بقى مشكلة مصانع الملابس الجاهزة اللى بتدور على البنات علشان تشتغل مش راضيين البنات يشتغلوا
محمد صلاح : فين اتحاد العمال ؟ قوليلى بقى دا جميل
الوزيرة/ عائشة عبد الهادى : انا مقلتش جميل ولا اى حاجة انا بحترم استقلاليتهم اسالهم هما هو الاتحاد عضويته 4 مليون وبعدين بقدرالامكان هما بيتحركوا هى المشكلة بتكمن فى ايه يا استاذ محمد ان الناس دلوقتى رافضة الشرعية يعنى يقولك ايه لا دول ما بيعبروش عنى الناس بقى عندها نوع من الرفض او عايز يعبر عن اللى جواه
محمد صلاح : طب هو رافض ليه ؟
الوزيرة/ عائشة عبد الهادى : هو متصور ان النقابى ده خلاص خد المكان وهو ......
محمد صلاح : اه بقى بتاع الحكومة يعنى انا بقول هو بيفكر ازاى ؟
الوزيرة/عائشة عبد الهادى: اه هو بيفكر كد طب ما هى الحكومة اللى بتحل هو مين عنده الحل ؟
محمد صلاح : فيه ناس شايفة ان الحكومة مش بتحل
الوزيرة/ عائشة عبد الهادى : يشوفوه اعمله ايه يعنى يشوفه يقلعوا النضارة السودا بقى يشوفوا الحاجة الكويسه مرة فى حاجات كتير زى ما اديتك مثل من شوية انه فيه عندك كام عامل بيشتغل ؟ فيه عندك كام منشاة ؟ فيه كام منشاه عندك فيها مشاكل ؟ هو دا اللى احنا عملناه وحلول كلها حلول غير تقليدية وحلول كلها اخدت وقت وخدت جه انا بقلهالك فى نص ساعة شوف احنا بقالنا قد ايه ؟
محمد صلاح : وزيرة القوى العاملة السيدة عائشة عبد الهادى احتفلنا معاها بذكرى ثورة يوليو واتكلمنا عن مكتسبات ثورة يوليو اللى باقى منها ومننا, الوزيرة كلامها معانا النهارده كلام جميل كلام معقول اكيد دا كلام مسئول خلص الكلام سلام ونلتقى فى الحلقة المقبلة .