الأقوال المستباحة في النقد والصراحة

إلي الرئيس اليمني علي عبدالله صالح:
في دوري كفاح الثوار
بعد خروج القذافي
مضروب بالنار
اللي باقي
تخرج انت وبشار
مقتولين في الماتش النهائي!.
إلي رئيس جمهورية مصر الجديد:
لازم تكون مننا
وتشيل همنا وتاكل من أكلنا
ومتكرهناش في بعضنا
ولو سرقتنا
متسرقناش كلنا!.
إلي المطربة شيرين عبدالوهاب:
الفنان الغريب ينشهر
في مصر ويعيش فيها
مع أنك بنتها
بعد م انشهرتي
تسكني في بيروت
وتهجريها... يا خسارة!
إلي الفقيد معمر القذافي اللي كان رئيس ليبيا:
اللي ميحترمش شعبه وأمته
وميعملش حساب آخرته!
العالم يتفرج علي جثته!
إلي خالد مشعل رئيس المكتب السياسي لحركة حماس:
كان عشان يتم الافراج
عن عشر تلاف أسير
فاتكم موضوع بسيط
كان لازم تستنسخوا
عشر عساكر كمان
من جلعاد شاليط!
إلي النادي الأهلي:
الشبكة مجروحة
والتعادلات مسموحة
والحنفية بتنقط
من بدري مفتوحة!
إلي محافظ الدقهلية اللواء صلاح المعداوي:
بيقولك ربيع عبدالله
المنصورة من بره ها للا هاللا
ومن جوه يعلم الله!.
إلي رسام الكاريكاتير حجازي:
أعزي فيك مين
يا فنان يا كبير
أعزي فيك نفسي ومصر
ومجلة صباح الخير!.
إلي مجلس إدارة جمعية المؤلفين والملحنين:
في جمعيتكم يا سادة
المرضي عنه ياخد حقه وزيادة
والمغضوب عليه يوصلوه للعيادة!
ملفوف في سجادة!.
إلي المركز الطبي العالمي طريق اسماعيلية الصحراوي:
بعدما كنت مستشفي
بتعالج المريض والموجوع
حولوك لفندق سبع نجوم
مخصوص للرئيس المخلوع!
إيه الموضوع؟!!.
إلي الإعلامي محمود سعد:
البيت بيتك كانت فرصة
والقدر طيرها
ومش حتلاقي غيرها
افتح لك مجلة فنية
واشتغل رئيس تحريرها!.
إلي الشعب المصري الغلبان:
لو نجح رئيس جمهورية
وعمره سبعين سنة
نتبرع كلنا. بأسبوع من عمرنا
عشان يفضل كابس علي نفسنا
يحرق في رمنا ويذلنا تلاتين سنة!.
إلي الإعلامي والصحفي الأستاذ إبراهيم عيسي:
بيقولك الاستاذ كرم
ابن البلد المحترم
علشان تفضل علم
ابعد عن الشاشة
والعالم البكاشة
واتفرغ للورقة والقلم!.
-----
لبخيت بن بيومي صاحب المساحة