بالفيديو.. سجينة ب"القناطر:"أنا تاجرة مخدرات بشرفى لا سرقت ولا مشيت مع رجالة"

” يومى بيبدأ منذ الصباح كونى مسئولة عن عنبر الأطفال .. و بنطلعهم لتناول الفطار وبعد كدا بنروح الجنينة للتريض وبعدها للمكتبة وأحيانا الكافتريا وبيتم قفل العنابر قرب مغيب الشمس” بهذه الكلمات بدأت “زينب عنتر” سجينة فى قضية بيع مخدرات وتبلغ من العمر 36 عام حديثها لكاميرا فيديو 7 قناة اليوم السابع المصورة .
وتابعت ” زينب ” عن ظروف اتجارها فى المواد المخدرة : ” أنا دلوقتى توبت عن الحرام وعمرى ما بفكر فى الرجوع للطريق دا تانى ولكن أيام ما كنت ببيع كنت ست ليا وزنى فى السوق ومسيطره ومكنتش أتوقع أن وقعت الشاطر بألف ولكن بعد ما اتسجنت بقول ولا أى فلوس الدنيا تقدر تعوضنى عن عيالى وإنهم يناموا فى حضنى”
وقالت عن أول ليله قضتها داخل جدران السجن : ” عدت عليا بالعافية كنت بحس أن الساعة مش بتحرك كنت مكتئبة ومش عايزه أكلم حد وحاسه بجبل على صدرى مخلينى مش عارفه أخد حتى نفسى وأنا بعيد عن ولادى وأهلى والسجن بيتقفل عليا وحاسه إنى مش عارفه أتحرك ومش واخده حريتى كل حاجه بحساب وأوامر “
وتابعت : ” أنا عندى 3 بنات وولد كل همى فى الحياة دلوقتى أنهم ميبقوش زى وميتكسفوش منى فى يوم لما حد يقولهم أمكم كانت تاجرة مخدرات ورد سجون لأنها ساعتها هتكون أصعب لحظه بالنسبى ليا “
وتابعت “السجن الحياة فيه مش سهله ودا بسبب تنوع السجينات فى منهم اللى مستبيع وقتل وفى منهم اللى بيتاجر فى المخدرات .. وكمان فئه مش سهله ودى اللى بتحترف الشغل فى الدعارة وفى قوانين من إدارة السجن واللى بيخالفها ويتسبب فى المشكلة بيتعاقب ويدخل التأديب”
وقالت :” جوزى دخل معايا فى نفس القضية وولادى مع والدتى وللأسف من يوم ما اتحبست مش بشوف جوزى لأنه ممنوع بالرغم من أن بعض السجينات بطالب بحقها الشرعى وخصوصا اللى بيقضى مدة طويلة فى السجن”
وعن احتياج السجينات للزوج قالت : ” كتير مننا بيتعود على كدا وبيحاول يأقلم نفسه أنو مفيش راجل وبنستحمل لأننا غلطنا والمفروض نتحمل النتيجة ونرضى بيها حتى لو كانت صعبه على الواحدة ولكن فى كتير منا بيفشلوا وبيقعوا فى ممارسة أشياء مخالفه وقليله الأدب ودا أخطر حاجه علينا إزاى نحافظ على نفسنا من الستات الشاذة اللى مش بتقدر تسيطر على نفسها وفى ساعات واحده منهم مثلا تكون حاطه واحدة فى دماغها .. وتتحرش بيها فى الرايحة والجاية .. ولكن الإدارة بتدخل وبدافع عن أى حد ممكن يحصل معاه كدا وتعاقب الستات دى ،فى كتير من المسجونات بتطالب بزيارة زوجها مرة فى الأسبوع ولكن أنا عن نفسى غير مؤيدة للفكرة دى وأكتر حد بيبقى بيطالب بحقه فى الحاجات العيب بتوع الأداب لأنهم إتعودوا على دا طول الوقت”
وقالت : ” أكتر حاجه بتاثر فينا كلنا الأطفال وهى طالعه من السجن بعد ما يبقى عندهم سنيتن وأنا كمان مريت بيها لان أبنى كان معايا هنا وحسيت بالانهيار اللى بيتعرضوا ليه بيقى دمار بتحسى أنهم بيقطعوا حته من جسمك وأنتى صاحيه بعد ما ربيته فى حضنك يمشى وانتى مش عارفه مين اللى هياخد بالله من ابنك اللى مش عارف حاجه وكمان نظره ابنك ليكى وهو بيبكى ومش فاهم حاجه وخايف من الحالة وهو عارف أنو مش هيشوف أمه كل يوم زى الأول ،أنا عن نفسى أول حاجه هعملها لما أخرج هاخد ولادى فى حضنى سنه ومخرجش من البيت “
وتابعت :” التعامل مع المسجونات مختلف اللى بتقتل غير اللى بتبع مخدرات ولكن الأقوى فى السجن والأكثر سيطرة اللى بيتسجنوا فى قضايا المخدرات مش عشان معاهم فلوس بس ولكن لأنها قويه ومش مهزوزه لأنها مش قاتله فى لحظه ضعف ولا باعت جسمها للرجالة .. بتبقى جايه بكرامتها