استخدام المكواه لشعرك باستمرار يؤدي إلى كوارث

هذه التجربه اتينا بها اليكم من احد المواقع لكى تستفيدوا اكتر
انا هتكلم الاول عن الحاجات الغلط اللى كنت بعملها اثناء او بعد الكوي واثرها السلبي على شعري وبعدين هكتب الحاجات السليمة اللى عرفتها فيما بعد
انا طبيعة شعري او اللى كان شعري انه مجعد والفتلة نفسها تخينة وكان تقيل جدا قبل ما يقع طبعا
وكنت عادى بتعامل معاه زيوت وكريمات ولف وبكر وكده واهو كان شغال يعنى بس طول عمرى طبعا كان نفسي يبقى ناعم ومفرود
لحد ما عرفت موضوع مكاوى الشعر ده من المنتدى هنا وبدأت اشوف واقارن لحد ما رسيت على مكواة بابي ليسpro230 اللى هى الحمرا اللى بالبخار اكيد كلكوا عارفينها وشوفتوها كتير وكتير مدحوا فيها وفى نتايجها
كنت الاول باستخدمها لوحدها من غير ما احط حاجة قبلها لحد ما عرفت انه المفروض نحط قبلها حاجة للحماية من المكواة عشان تخلى الشعر حلو وتحميه واستخدمت بناء على البحث كريم بالمرز بتركيبة الزيوت لكوى الشعر
مفيش شوية وبدأت اعرف عن سيرم زيرو فريز انه بيتحط قبل الكوي واشتريته ولاقيت نتيجته اجمل بكتيير من بالمرز
طبعا بالمرز ده تركيبة زيوت والسيرم برده مادة لزجة شبيهة بالزيت والاتنين لما بنحطهم بنخلى تأثير المكواة أسوء بكتير على الشعر ده مش كلام بقوله وخلاص عشان محدش يقولى انا بستعملهم ومش بيعملوا حاجة او يقولى ان بالمرز مكتوب عليه انه للكوي انا بتكلم بناء على تجربة وماليش دعوة بالهري اللى بيتكتب على المنتجات التجارية .وطبعا ممكن ترموا كلامى ده ورا ضهركم عادى كده وتستمروا بنفس الطريقة بس لا تلوموا الا انفسكم بعد كده انا مش كسبانة حاجة من كتابة التجربة دى خالص
انا كنت بكوى يا بنات شعري باستمرار يعنى ممكن مرة كل اسبوع ممكن مرتين بالاسبوع او ممكن كل اسبوعين مرة كده يعنى وفترات كانت تيجي عليا مكويهوش خالص بس بالاجمال يعنى يعتبر كنت بكويه كتير لانى كنت فاهمة انى بحط وسائل الحماية فمفيش خوف بقى وكمان فاهمة انه شعري تقيل وفتلته تخينة فهيستحمل العذاب ده كله
تعالوا شوفوا شعري دلوقتى بعد ثلاث سنوات من شراء المكواة وصل لحالة لا يعلم بيها الا الله
مقصف من كل مكان واقف ارايل ماشاء الله
هايش
باهت
الشعرة تالفة لاقصى حد
تساقط رهيب وخف لاقل من النص
حتى لما بيتكوى شكله سخيف لانه خفيف جدا وتالف جدا فالبتالى الشعراية نفسها مفيهاش صحة كده ومظهر الشعر كشكل عام محزن غير انه فى مناطق الشعر قل منها
طبعا التساقط ده ليه اسباب اخرى غير المكواة بس التلف سببه الرئيسي المكواة ولما الشعر بيتلف بيبقى وحش جدا حتى لو كان تقيل وكده كده لما يتلف بيضعف ويقع يعنى فى النهاية التلف من اسباب التساقط
طيب هل كل كلامى ده معناه اننا هنبطل نستخدم المكواة اكيد لاء بس يبقى الاستخدام صح وبحساب وناخد بالنا من التطورات اللى بتحصل فى شعرنا اول بأول عشان نلحق نعالج اى مشكلة
المفروض لو الشعر اجعد ومحتاجين نفرده يا اما نلجأ لوسيلة من الطرق الامنة الى حد ما زى البروتين والكرياتين (وانا شخصيا مجربتش حاجة منهم بس مجرد قرأة يعنى حتى لو هنعمل حاجة من دى نبحث كويس ونشوف افضل شئ ) مش هنقدر على اسعارهم يبقى نهتم بشعرنا وهو على شكله لما يكون مجعد وصحى احسن مليون مرة لو كان مفرود وتالف وانا شفت فيدوهات لبنت سوداء وشعرها اجعد وبتهتم بيه وتعمله تسريحات جميلة جدا من غير فرد ولا اى حاجة وشعرها شكله حلو والتسريحات لايقة عليها واكيد برضو الشعر الاجعد مش جريمة يعنى تسريحة حلوة واكسسوارات هيبقى ممتاز لحد ما نقدر نعمله فرد محترم عشان منبهدلوش
بالنسبة لو هنكوي شعرنا يبقى لمناسبة مثلا مش عمال على بطال كده ونستخدم قبل الكوي حاجة تحمي من الحرارة وفى منتجات كتير وفي مواضيع عنها هنا فى المنتدى واللى انا بستخدمه من تريسيمي ووحش جدا الحق يتقال يعنى بس المفروض انه بيحمي الشعر ملوش دعوة بمظهر الشعر
وبرده منكويش والشعر مبلول او مندى لانه بيكون ضعيف يا جماعة جدا
والله يكرمكوا سيبوكوا من موضوع الكوي اللى بالبخار ده هو مش بنطلون هنكويه بالبخار يبقى الكوي على الناشف وقبليه حامى من الحرارة ونحافظ عليه بعد الكوي واخر حاجة نعملها نتصور صور كتيييييير عشان اول ما نفسنا تهفنا على الكوي نشوف الصور وكاننا كويناه