كلام في ودنك

* سبحان الله له في خلقه شئون.. كل الأجهزة بتدور علي ترشيد الانفاق علشان الدنيا تمشي والعجز يقل في الموازنة والأسعار تنخفض وهناك من يتحدث في مجلس النواب عن الإعداد لزيارات خارجية مكثفة يقول إنها ستبدأ أوائل الدورة البرلمانية القادمة وتشمل العديد من الدول الاوروبية وأمريكا كلاكيت تاني مرة حيث زارها وفد من النواب في ربيع هذا العام وياعيني طبعا الدول الاوروبية تشمل فرنسا وايطاليا وبلجيكا ودول تانية كده لزوم الشوبنج والذي منه طيب ميسافروا علي حسابهم هو اللي عايز يخدم بلده يطلع علي حساب البلد وبدل سفر عموما يمكن يحصل كده محدش عارف ادينا مستنيين يمكن حد يعمل كده.
-------------------------
* بصراحه هناك حالة من عدم الانسجام الوظيفي بين العاملين في البرلمان بين الاصليين والوافدين.. والوافدون عندهم حق في السابق كانوا يعملون اعمال خفيفه بل ويروحوا قبل ما تبتدي الجلسات والدنيا ماشية زي الفل دلوقتي راحت السكره وجت الفكرة ومش بس كده دا كمان فيه ناس يقال إنها غضبانه من تأخر الترقيات ليه لانهم كانوا يترقوا كل سنتين او ثلاثة بالكتير ياناس شوفوا حل علشان محدش يبقي زعلان.
-------------------
* تصدقوا أيه اللي كان معطل تشغيل الكولدير في المركز الصحفي والدنيا حر نار فالبرلمان قرر ان التشغيل لايكون الا بالمياه العاديه علشان توفير النفقات ياسيدي واحنا معندناش مانع بس شغلوها خلي الناس تشرب مياه ساقعه وبالفعل شغلوها وحطو مياه عادية والله طعمها حلو مية الحكومة ومفيش اي اعتراض عليها.
--------------------------
* شبكة الانترنت وللمرة المليون نقول انها والله ضعيفة جدا في المركز الصحفي ولو الصحفيين تجمعوا في يوم يقطع الارسال ونقعد نترجي التصليح ولاحياة لمن تنادي.
العملية دي بقت وحشه قوي وعايزه حل جذري والحل في ايد الناس بتوع مركز المعلومات يجيبوا شبكة اصليه تقدر تسوعب الهارد ورك بتاعنا.
-------------------------
* استكمالا لفلوس المصيف التي صرفت لكل نائب بواقع ثلاثة الاف جنيه في الاجازة الصيفيه طيب قولنا النواب الرجالة طبعا هم المكلفين بالانفاق كل بسعته طيب النائبات غير مكلفات بالانفاق بالصرف ولا صرفوا علشان خاطر المساواة بين الجميع زي بعضه اهو كل بيوسع علي كله وربنا يرزق الجميع.
-----------------
* يقال ان البرلمان وافق علي عقد اجتماعات للجان خلال الاجازة البرلمانيه لمناقشة الموضوعات العاجله وقالوا ان اللجان في الصيف معلهاش بدل نقدي علشان احنا في الاجازة.
طيب احنا المعلومات اللي عندنا بتقول الموضوع عادي والكل يصرف وهذا حقه وربنا يرزقنا جميعا.