"بابا نويل"!!

تخيلوا يا سادة لو بابا نويل فكر ينزل مصر. ماذا يمكن أن يحدث له؟؟ شخصياً لا استبعد أن يتم "تثبيته" عند أي موقف ميكروباص. يعني معقول تبقي معاه "الشيلة" دي كلها ونسيبه في حاله.. حتلاقي الواد سعيد السواق بينادي علي صاحبه: يا "أشف" يقصد أشرف تعالي بسرعة حبيبك وصل.. دا غير أنه ممكن جداً يلقي القبض عليه "تحري" بسبب لحيته. فربما كان ينتمي لأحد الجماعات التكفيرية.. بالطبع سيطلب منه المصريون توفير السكر وحل مشكلة الدولار وارتفاع الأسعار وأزمة المرور والقمامة والتعليم والصحة.
عندها سيشعر بابا نويل بالندم لقراره العشوائي بنزول هذا البلد ولسان حاله يردد الأغنية القديمة "أنا اللي استاهل كل اللي يجرا لي". وبعدين هو الرجل دا ملوش "ست" تسأل عليه وتحاسبه علي الهدايا اللي قاعد "يبعزق" فيها يمين شمال. يعني ولاده مش أولي من الغريب؟!
فين "ماما نويل"؟!