الابن الجرئ

يا كل نظرة جمجمة اتهد طوب الدار وكونها
واتمد خوف الليل يجسمها
واتبح صوت لولاد وكلمها
واتمد صرح الخوف بيرسمها
واتكب ع الحلو المرار
لكن في عز البرد والليل المخيف طلع النهار
اتمد جوايا الطريق
واتبلبلت كل الحكاوي بدمعها
واتبسم الابن الجرئ
كان الطريق الماشي جنب الترعة يحضن صبحنا
هم الجرئ المالي كل الكل ريحة ارضنا
انا من هنا
انا في الزمان الباقي من كل الحروف
انا من كسوف الشمس وخسوف القمر
انا من ضلوع الحلم وجفون السهر
انا ع الشجر
لما النسيم الحي ينشر قصتي
انا في المطر
لما السحاب الجي يلحق دمعتي
انا هدمتي
مصنوعة من توب البساطة الطيبة
منقوشة في وشوش الدفاتر
والستاير والبلاد
مرسومة ف عيون الولاد المخلصة
يا منتهي كل الحدود
يا كل عود
مصر رجعت للولاد
مصر دقت ع الوتر كان الميلاد
يا كل عود
الفلاحين طالعين أمل
واتفرقت الفصل الربيع علي كتفهم
والنيل هنا
وانا مش هناك انا من هنا
انا في الانين المر لضلوع الوطن
انا في الميدان الحر عاشق للوطن
انا اصلي طين
معجون بحب الأرض ودموع الغلابة
الطيبين... الفلاحين
الهدمة منسوجة بأمل
ومطرطش الطين اللي طالع من حنين الأرض
كاتب علي الهدمة الامان
راسم كمان
جميز.. وتوت
وولاد.. ودار
صفصاف علي جفون الترع بيتفتح نهار
ما هي مصر رجعت لينا واحلو المرار
يا جوهرة
توبك بنقش الغرب وغروب الشموس
اوعي تفتكري الحكاية بنظرتك هيه الفلوس
اياكي مني ومن دموعي المسلمة
وان جيتي لجل الحب
حستأذن وأموت
ومش حسلم قلبي للدم الغربي
ومش حعالج جرحي
لو كنت الطبيب
ومش حغيب
حفصل في دم القلب واستني النهار
حصرخ في وش الفجر واسأل ع الغياب
حسكت وألاقي الفجر متبسم نهار
والشمس تسكن في السما
وتحاكم الارهاب وتنده ع القمر
اوعاك تنام
مهما السحاب يفرد عليك شمسيته
ولا الضباب ياخد ضياك ويفتته
يختل في اديك الزناد
ونعد كام حلم اتخنق قبل الميلاد
فات الميعاد
كتروا الولاد وتأملوا واتعلموا واتكلموا
قالوا الورق حي بآههات الكل
واتحني بألم
نامت في قلبه الروح
كان الوطن
جواه خيوط ماسكه في خيوط
مربوطه في قلوب الغلابة الطيبين
وتفوت سنين
والحب من غير القلوب شارد حزين
والقلب مش قادر يقول بيحب مين
واحنا اللي كنا مخلصين
واحنا اللي كنا معلمين
واحنا اللي بذر الأرض اتربي ف قلوبنا
والاحنا مين..؟
كنا الزمان الطفل من غير الملامح
كنا الولاد السمر من غير الدفاتر
كنا الرجاء والمصطبة
من غير سواعد أو كفوف
كنا الدفوف
بالولعة تبقي متفنجلة لما الصباح
بالدف تفضل تشتغل
وتسمع الناي الحزين كتر الكلام
كنا المعالق والشوك
تدي اللقم للكل وتحاول تدوق
لكنها
لجل النظافة بتستحي
وتكلم النور اللي طالع من شعاع الشمس وتقوله افتكر
انك في قلبي وجتتي ومحبتي
انك في توبي وهدمتي
وف طرحتي والشال كمان
انت الامان يا مصرنا
بس اوعدي
انك تعيشي ف كلنا
وتكلمي كل الخلايا ف دمنا
وتنوري كل الشقوق المزمنة
وتنضفينا مننا!