حامد أنور يحتفى بذكرى العندليب بقصيدة "عبدالحليم"

أعاد الشاعر حامد أنور طرح احدى قصائده الشعرية التى تحمل اسم «عبدالحليم»، وذلك تزامنًا مع ذكرى رحيل العندليب الأسمر عبدالحليم حافظ كنوعاً من الاحتفاء به..
وتقول كلمات القصيدة:
الغُربَة لِيل
وِالكِلْمَة كَات فِى المُبْتَدَا
سِلّم يِعَدِّى لأوّل الشَّط اللى فَارِش
صُبحُه لِيك
عَدِّيت مَعَاك
وكَان تَالِتنَا جَرح أكبَر م السِّنِين
وِعرِفنَا لِيه؟
كُل الحَاجَات الحِلوَة دَايمًا
يِلزَمْهَا مَسْحِة الحُزن الأخِير …
***
الرّحلَة لعيُونِك سَفَر
مِن كَام سَنَة "سَوّاح .. غَرِيب"
لا قدِرْت أَرصُد خَطوِتَك
وَلا خَدت بَعدَك فِى المِحَن ليَّا صَدِيق
مَعرَفشِى لِيه أَصبَحنَا بِنعَانى الفُرَاق
وَبنِتْقِطِف وِاحنَا يَا دُوب
لِسَّه مَاوصِلنَاش لِشِىء
لِسَّه مَاوصِلنَاش لأَوّل سِلِّمَه
مِ الأُمنِيَات
يَا هَلْتَرَى ..
الحِلْم رَافِض يِكْتِمِل؟
وَلَّلا الفُرَاق أَصْبَحْ سِمَه
فِ حَيَاتنَا وِف كُل اللِّى بَاقِى
وَاللّى بِنْحِسُّه ف حَاضِرْنَا
وَاللِّى فَات ..
***
يَا اسْكِنْدِرِيَّة
امْسَحِى دَمْعِة شُطُوطِك
قُولِى لِلبَحْرِ المِخَبِّى
حُزْنُه بِين مُوجَه ومُوجَه
عَنْدَلِيب مَصْر اسْتِحَالَه
يِنْسَى يُوم عِشْرِة صِحَابُه
لَمَّا فَات ضِلّ الشَّمَاسِى
فَات مَعَاهَا قَلْبُه ذِكْرَى
فَاتلَك الصُّحْبَه الأَصِيلَه
عَ الشُّطُوط تِزْرَع أَغَانِى
فَمَاتِزعَلِيش وَتلِمّى تُوبِك
لَجْل خَاطرِ العَنْدَلِيب
اللِّى فَارْقِك غَصْبِ عَنُّه
رَغْم كَان مُغْرَمْ صَبَابَه
***
مَلِّيت سَاعَاتِ الانْتِظَار
بَاسْتَنَّى فِيك
وِانْتَ بِتِرسِم آخِر العُمر الجَمِيل
وَرْد وقُبَلْ..
كَات الدَّقَايِق
بِتسَابِق النَّفَسِ المقَاوِح
وِالرَّحْلَه كَات مِشْوَار بِيفْرُك
فِى البِعِيد..
كُل صَعْب كِرِهْتُه غَاب
وِالمُحَال مَاقْدِرْش يُصْمُد
تَحْتِ رِجْلِين الرِّجَال
غَنّيت بِصُوتَكِ المَصْرِى الأَصِيل
قُمْنَا عَدِّينَا القَنَال ..
***
لِسَّاك بِتِحْلَم بِالأَمَل
وِتْعَانِدِ اليَّأسِ الطَّوِيل
لِسَّايَا بَاتْبَع خَطْوِتَك يَمْ الشُّرُوق
وَلَضَمْت حِلْمِى اللِّى اتْفَرَط
مَع حِلْمَكِ المَرْشُوش وُرُود
يِمكِن يِكُون آن الأَوَان
تِرْتَاح نُفُوسْنَا
بَعْدَ مَا حَطَّمْنَا شِىء..
اسْمُه الشُّرُود
***
وَاحْدَه .. وَاحْدَه
وِالخَطَاوِى اللِّى مشِينَاهَا
كُنَّا لازِم نِبْتِدِيهَا
وَاحْدَه .. وَاحْدَه
كُنت خَايِف
عِشْقَك المَجْنُون لَيَاخْدَك
يِحْدِفَك لِلانفِعَال
تِسْقَط حُرُوفَك بِين إيدَيَّا
وَارْجَع انْدَبْ فُرْقِتَك
دَانَا عُمرِى مَا فَكَّرت اشِدَّك لِلوَرَا
رَغْم انِّى بَاتْسَابِق مَعَ
رَعْشِة جُفُونِى اللِّى اتْكَوِت
وِاللِّى تخَاف تِرْتَاح سَاعَات
غِير لَمَّا تَرْتَاح مِ الشَّقَا فِ اللِّيل عِينِيك
مَعْقُول أَشِدَّك لِلْوَرَا؟!
وَانَا بَاعْشَقِ الطَّيَرَان لِفُوق
وَاتْمَنَّى لَوْ أَغْطَسْ مَعَاك
جُوَّه بُحُور عَمَّك نِزَار
نِطْلَع سَوَا
وِنزُور حَبِيبْتَك
جُوَّه قَصْرَهَا المَرْصُود أَلَمْ
جُوَّه فِنْجَانَك رَمِيت كُلّ الشُّكُوك
وِرْجِعْت شَايِل بِين ضُلُوعَك
كَام سُؤال
وِالأَسْئِلَه مَالْهَاش رُدُود
غِيرِ الفُرَاق
وِالأَلَم ..
***
وِانْتَ لِسَّاك فِى الوَرِيد
يَنْبُوع حَيَاه
تِدخُل قُلُوبنَا وَيَّا أَوّل فَجْرِ طَالِع
يِنْسِلِخ مِنُّه الخَلاص
ضَى شّمْسِ بِتِنْوِلِد / تِفْتَحِ الشِّبَاك
بَرَاح
نِدْخُل سَوَا جُوَّه مَلَكُوتِ البَشَر
تِرْسِم غَنَاوِيك الجَمِيلَة لِلْوَطَن
شَكْلِ وَمَلامِح
تِرْسِمُه سَاعِةْ صَفَا
لَمَّا بِيُحْضُن فَرْحِتُه
وِفْ كَبْوِتُه مَابتِنْسَاهُوش
مَانْتَ اللِّى سَرَّحتْ لِبَلَدنَا شَعْرَهَا
وَعَمَلت لِيها دِيل حُصَان
وِانْتَ اللِّى بَكِيت لأَدْهَم جُرأِتُه
لَمَّا خَان قَلبُه الرُّصَاص
وِانْتَ اللِّى مَاعْرِفْشِ الفَرَح
يَاخُد فِى قَلْبَك سِكِّتُه
"وِلَو كَانِ المَرَضْ لُه قَلْب .. مَكَانشِى صَابَك يَا حَلِيم"
فَبرَغْمِ جَبَرُوتِ الأَلَم بَانْحَاز مَعَاك
زَىْ كُلّ العَاشِقِين لِفَنَّك
زَى كُلّ ولاد بَلَدنَا الطِّيبِين
هَزُّهُم فِى اللِّيل غُنَاك
تِطلَعِ الآهَه بأَنِين
حَتَّى فِى عِزِّ الفَرْح يِطْلَع غُنَاك
مَدْهُون بِأَنَّاتِ الوَجَع
حَتَّى السُّكَات .. مَلْيَان شُجُون
***
وَانَا يَا حَلِيم
مَعْرَفْشِ لِيه؟
بَاحِس إنِّى بَاعْرَفَك
قَبلِ الزَّمَان مَا يِعْرَفَك
مِنْ قَبْل حَتَّى مَا تِتْحِرِم سِدْر الوَفَا
وِمْشِيت عَلَى الأَشْوَاك لِوَحْدَك
تِبْهِرَك أَشْعَار جَاهِين
وَامَّا نَارِ الفُرْقَة قَادِت
قُلتَهَا بَرْضُه ف غُنَاك
قُلْتِلَكْ سَاعِتْهَا عِيش
قُلت لِيَّا اسْكُتْ يَا شَاعِر
قُولْت لِيك سَاعِتْهَا .. عِيش
قُلْتِ لِى:
دَا المَرَار عَارِف طَرِيقُه لِلبَدَنْ
وِمْنِين حَنِهْرَب مِ القَضَا
وِالقَضَا سِيفِ اخْتَرَقْ قَلْبِ النَّهَار
وِبَرْضُه مَاقْدِرْتِش تِتُوب
***
وِابتَدَا المشْوَار يِقَرَّب لِلنَّهَايَه
أَتَارِيك مَوْعُود بِرِحْلَه
لِيهَا أَكْتَر مِنْ بِدَايَه
مِنْ بِدَايَه وِانْتَ نُونُو.. وِالرّضَاعَه كَات أَلَمْ
وِالفُرَاق كَان م البِدَايَه
وِالنَّهَايَه تُحَتَرَم
وَامَّا جِيت الدُّنيَا تِضْحَك
هَبْ رِيحِ الكُون شَجَنْ
"رَمِيت قَلْبَك فِى حُضْن .. سَقَاك الحُضْن حُزْن .. حَتَّى فِ أَحْضَانِ الحَبَايِب"
***
وِابْتَدَا قَلْبِى يِخَاف
مِ الفُرَاق لَوْ عَدَّى بِينا
يَا حَلِيم..
تِفْتِكِر لَوْ عَدَّى بِينا
صَعْب اصَدَّق.؟
اطْلِق نَشِيدَكْ لِلمَدَى
وِابْتِدِى يَلَّلا الحِكَايَه
وِانْسَى أَوْجَاعَك وِعِيش
دَانْتَ لَوْ فَارْقِتْ شَفَايفَك لابْتِسَامَه
بَرْضُه شَايْفَك عَ البِيبَان انْتَ وَبَلِيغ
الوِصَال عَايِش مَا بينَّا
حَتَّى لَو كَانِ الفُرَاق شَامِم مَرَار الانْتِهَاء
صَدَّقْنِى لَوْ قُلتِ اللِّى مَات
مُشْ عَبْ حَلِيم
***