إبداع

صلاح جاهين ..الضاحك الباكى

شعراؤنا شموس فى سماء الإبداع ينيرون لنا ببصيرتهم وبصرهم طريقنا ويخبرونا ما لم نخبره فيما فاتنا من أمورنا الحياتية فهم بمثابة توثيق وشهادة على عصرهم ونحن نخصص هذه المساحة من الإبداع للاحتفال بشاعرنا العظيم صلاح جاهين (25 ديسمبر 1930 - 21 إبريل 1986) والذى مارس رسم الكاريكاتير إلى جوار كتابة الشعر فعمل محررا فى عدد من المجلات والصحف، وقام برسم الكاريكاتير فى مجلة روز اليوسف وصباح الخير ثم انتقل منها إلى جريدة الأهرام، كما قدم للسينما المصرية العديد من الأفلام الخالدة فى تاريخها الحديث منها أميرة حبى أنا وفيلم عودة الابن الضال وغيرها، وكانت رباعياته قمة ما كتب من أشعار التى لحنها له الملحن الراحل سيد مكاوى وغناها المطرب على الحجار، كما ألف أوبريت «الليلة الكبيرة» أشهر أوبريت للعرائس فى مصر.

على اسم مصر

على اسم مصر التاريخ يقدر يقول ما شاء

أنا مصر عندى أحب وأجمل الأشياء

باحبها وهى مالكه الأرض شرق وغرب

وباحبها وهى مرمية جريحة حرب

باحبها بعنف وبرقة وعلى استحياء

واكرهها وألعن أبوها بعشق زى الداء

واسيبها واطفش فى درب وتبقى هى ف درب

وتلتفت تلقينى جنبها فى الكرب

والنبض ينفض عروقى بألف نغمة وضرب

على اسم مصر

النسيم فى الليالى وبياعين الفل

ومرايه بهتانة ع القهوة .. أزورها .. واطل

القى النديم طل من مطرح منا طليت

والقاها برواز معلق عندنا فى البيت

فيه القمر مصطفى كامل حبيب الكل

المصرى باشا بشواربه اللى ما عرفوا الذل

ومصر فوق فى الفراندة واسمها جولييت

ولما جيت بعد روميو بربع قرن بكيت

ومسحت دموعى فى كمى ومن ساعتها وعيت

مصر السما الفزدقى وعصافير معدية

والقلة مملية ع الشباك .. مندية

والجد قاعد مربع يقرا فى الجرنال

الكاتب المصرى ذاته مندمج فى مقال

ومصر قدامه اكتر كلمة مقرية

قريتها من قبل ما اكتب اسمى بإيديا

ورسمتها فى الخيال على أبدع الأشكال

ونزلت أيام صبايا طفت كل مجال

زى المنادى وفؤادى يرتجف بجلال

مصر .. التلات أحرف الساكنة اللى شاحنة ضجيج

زوم الهوا وطقش موج البحر لما يهيج

وعجيج حوافر خيول بتجر زغروطة

حزمة نغم صعب داخلة مسامعى مقروطة

فى مسامى مضغوطه مع دمى لها تعاريج

ترع وقنوات سقت من جسمى كل نسيج

وجميع خيوط النسيج على نبرة مربوطة

اسمعها مهموسة والا اسمعها مشخوطه

شبكة رادار قلبى جوه ضلوعى مضبوطة


الحدود

واحنا فايتين ع الحدود

مستمرين فى الصعوود

اختفى النيل الجميل من تحتنا

و المدن والريف و أول عمرنا

و ابتدى شيء ينجرح جوه الوجود

وابتدينا أسئلة ملهاش ردود

ميلنا عالشباك نخبي

دمعة فرت مننا

باصة مالشباك على البحر البعيد

واحنا داخلين بالأمل عالم جديد

كنت فاكرة يا مصر انى زهقت منك

و إكتشفت إنى محال أستغنى عنك

حتى دوشة صوت جيراني

و الزحام وحشونى تاني

بسمة حلوة لطفلة صغيرة

لما كنت أديها حتة سكرة

قبل مانفوتك وحشتينا

يا مصر يا أمنا

و ابتدى شيء ينجرح جوه الوجود

و ابتدينا أسئلة ملهاش ردود

ميلنا عالشباك نخبي

دمعة فرت مننا

كنت بتذكر و أنا فى غاية الأسى

لعبنا الكورة فى حوش المدرسة

و الشقاوة واحنا لسة صغيرين

و البراءة و الصحاب الطيبين

لما سألتنى اللى جنبي

إنت مصرى ؟؟...دق قلبي

إسم زى السحر رفرف عالمكان

زى نسمة مهفهفة بصوت الآذان

أيوة مصريين لآخر

كل نقطة فى دمنا

و ابتدى شيء ينجرح جوه الوجود

و ابتدينا أسئلة ملهاش ردود

ميلنا عالشباك نخبي

دمعة فرت مننا

الوجوه من ثلج و عيون من قزاز

شوقى زاد للعشرة و الناس العزاز

و ابتديت أكتب و أنا فوق السحاب

ابتديت يا حبيبى فى أول جواب

مصر إنتى حتة مني

مش مجرد اسم وطني

قالوا فاضل نص ساعة عالوصول

قلت ايه معنى الساعات و الا الفصول

إلا فى الأرض اللى فيها

ذكرياتنا و حبنا

و ابتدى شيء ينجرح جوه الوجود

و ابتدينا أسئلة ملهاش ردود

ميلنا عالشباك نخبي

دمعة فرت مننا


اصحى يانايم

النور ملو الشوارع

و مليون راديو والع

الساعة اتنين صباحا

لكن إيه الموانع ! ..

الخلق رايحة جايه

و الدنيا لسه حيه

مليانه بالهأَو أَو

و زعيق القهوجية

واحد يقول لواحد :

خليك يا عم قاعد

التانى يقول له :

شكرا

ده انا م المغرب مواعد

فيه سهره لسه عندي

فى بيت فلان افندى

ح ناكل حاجة حلوه

و نشرب تمر هندى

و اللى تروح دالقه جردل

فوق حضرة المبجل

طبعا صاحبنا يزعل

و ينفجر شتايم

و الحى كله يوصل

ما بين مصلح و لايم

اللى يقول : يا جماعة

و اللى يقول : يا بهايم

و مطرب الاذاعة

يصرخ ، و ف وجده هايم

و لو طرطقت ودنك

فى وسط دى العظايم

تسمع مسحراتى

بطبله صوتها واطى

بيقول

اصحى يا نايم






بحرى

آخر النهار هفهفت نسمة على الميّه

بعود الأيام على الجدعان وعليا

يا صيادين القاروص غيّة

رمى الشبك ع السمك له خِفيّة

طرحت طرحه لقيت فى الطرحة جنيّه

حلِّيت وعقدتهم على عينيا

ونزٍّلتنى القرار صرخ الشبار فيا

ارمى الشبك ع السمك يا واد بحنيّة

لا دق ع الباب و أقول للحلو يا جارى

رمىْ الشبك صنعتى والصبر دا كاري

أصبر على الرزق لما تمتلى بحاري

وأصبر على العشق لما تنطفى ناري

يا ميت ندامة على اللى البحر ما ادّاله

مفتوح عليه الحنك والكف مادّاله

عدّى الشطوط والخطوط اللنش عدى له

غفر السواحل يا صاحبى مستعدا له

أنا مذهبى الصبر واصبر حتى على تارى

واطعم شباكى وصنارى بصباري

أنا أعوم على الصبر لما أوصل لأوطارى

والصبر دا مركبى والقلع والصاري

أنا شاب لكن عمرى ألف عام
أنا شاب لكن عمرى ألف عام

وحيد لكن بين ضلوعى زحام

خايف و لكن خوفى منى أنا

أخرس و لكن قلبى مليان كلام

عجبى !!!!

أعرف عيون هى الجمال والحسن

أعرف عيون هى الجمال و الحسن

و اعرف عيون تاخد القلوب بالحضن

و عيون مخيفة و قاسية وعيون كتير

وباحس فيهم كلهم بالحزن

عجبى !!

يا باب يا مقفول

يا باب يا مقفول ... امتى الدخول

صبرت ياما و اللى يصبر ينول

دقيت سنين ... و الرد يرجع لى : مين؟

لو كنت عارف مين أنا كنت أقول

عجبى !!!

بحر الحياة مليان بغرقى الحياة

بحر الحياة مليان بغرقى الحياة

صرخت خش الموج فى حلقى ملاه

قارب نجاه .. صرخت قالوا مفيش

غير بس هو الحب قارب نجاه

عجبى !!!


انشد يا قلبي غنوتك للجمال

انشد يا قلبي غنوتك للجمال

و ارقص في صدري من اليمين للشمال

ما هوش بعيد تفضل لبكره سعيد

ده كل يوم فيه ألف ألف احتمال

عجبي